ABŞ Dövlət Departamentinin Qafqaz İşləri və Regional Münaqişələr Departamentinin direktoru Mark Kemeron Ermənistanın Qeqarkunik rayonuna səfər edib, Vardenis və Sotk yaşayış məntəqələrinə baş çəkib.
Bu barədə ABŞ-ın Ermənistandakı səfirliyi məlumat yayıb.
M.Kemeron Ermənistan Silahlı Qüvvələrinin 2-ci Ordu Korpusunun komandanı ilə görüşüb və onlarla Ermənistan-Azərbaycan sərhədində vəziyyətlə tanış olub. Səfər zamanı o, Ermənistanın suverenliyi və Cənubi Qafqazda davamlı sülh məsələlərində ABŞ-ın davamlı dəstəyini vurğulayıb.
Artıq neçənci dəfədir ki, Ermənistanın suverenliyinə dəstəklə bağlı mövqe sərgilənir. Bununla bağlı ən ardıcıl şəkildə mövqe ortaya qoyan ölkə Birləşmiş Ştatlardır. Maraqlıdır, Ermənistanın suverenliyi üçün bölgədə hardan, kimdən təhlükə var? Regionda Ermənistanın özünə düşmən hesab etdiyi 2 ölkə var – Azərbaycan və Türkiyə. Türkiyə NATO-da ABŞ-ın müttəfiqidir. Üstəlik, Türkiyənin Ermənistana yönəlik hansısa ərazi iddiası yoxdur. Azərbaycanın da Ermənistana yönəlik ərazi iddiası yoxdur. O zaman ABŞ kimi supergücün Ermənistanın suverenliyinə hörmət barədə belə dəfələrlə bəyanat verməsinin arxasında nə dayanır? Bunlar Ermənistanın suverenliyinə nə kimi təhlükə görürlər, haradan gəlir bu təhlükə?
“Belə məntiqsiz mövqe Vaşinqtonda Sallivanın vasitəçiliyi ilə keçirilən görüşə də kölgə salır”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə hesab edir ki, ABŞ-ın bu kimi addımları Azərbaycanla Ermənistan arasında sülhün əldə olunmasını təhdid edir: “ABŞ-ın Ermənistanın suverenliyi ilə bağlı verdiyi bəyanat və müşahidə missiyasının tərkibinə nümayəndə göndərməsi sülh imkanlarını təhdid edir. Bu, ümumi işə xeyir yox, zərər vurur. İlk növbədə Vaşinqton nəzərə almalıdır ki, Azərbaycan və Türkiyə Ermənistanla danışıqlarda konusturiktiv mövqe ortaya qoyub. Prezident İlham Əliyev dəfələrlə bununla bağlı çağırış edib. Bir sıra kompromis xarakterli addımlar atılıb. Ancaq reallıq ondan ibarətdir ki, Ermənistan bunlara məhəl qoymur. Göründüyü kimi, rəsmi İrəvanın mövqeyində düşmənçilik davam edir. Təəssüf ki, Birləşmiş Ştatların belə məntiqsiz mövqeyi Vaşinqtonda Sallivanın vasitəçiliyi ilə keçirilən görüşə də kölgə salır. Ümumiyyətlə, Azərbaycan Ermənistanın ərazi bütövlüyünü tanıyır. Sərhədlərin delimitasiya və demarkasiyasi üzrə işçi qrupunun yaradılması istiqamətində fəal iş aparıb. Bunu Avropa da, ABŞ da çox yaxşı bilir. Sadəcə olaraq anti-Rusiya siyasəti və bu ölkədə Moskvanın siyasətinin zəiflətmək üçün tutduqları siyasətdə Azərbaycanla bağlı strateji səhv var. Sülh imkanları və danışıqlar prosesini Azərbaycan təşviq edir. N.Paşinyan isə, praktiki olaraq manipulyasiya ilə məşğuldur. Bu minvalla Qərbi Azərbaycana qarşı qoymağa çalışır. ABŞ regionda sülh istəyirsə, Bakı ilə koordinasiyalı çalışmalıdır. Erməni lobbisinin maraqları naminə ortaya qoyulan mövqe, həmçinin öz ambisiyalarından dolayı Vaşinqtonun strateji Qafqaz siyasəti uğurlu olmayacaq. Ermənistanı növbəti fəlakətə hazırlayırlar və bu ölkə onların təlimatı ilə avantüraya gedir”.
Bir sözlə, politoloq hesab edir ki, Vaşinqton Cənubi Qafqazla bağlı siyasətinə düzəlişlər etməlidir.
Vidadi ORDAHALLI
