Prezident İlham Əliyev oktyabrın 24-də Mçxeta rayonundakı Muxrani sarayında “Qarabağ xanlığının irsi” sərgisi ilə tanışlıqdan sonra Gürcüstanın Baş naziri İrakli Qaribaşvili ilə mətbuata bəyanatla çıxış edərkən deyib ki, Gürcüstan, Azərbaycan və Ermənistanın məsləhətləşmələrə başlaması haqqında fikir mübadiləsi aparıblar:
"Biz hesab edirik ki, Qarabağ münaqişəsi başa çatandan sonra vaxt gəlib çatıb ki, Azərbaycan və Ermənistan sülh müqaviləsi imzalasınlar. Hər halda, bizim niyyətimiz bundan ibarətdir. Biz beş əsas prinsipdən ibarət təkliflərimizi Ermənistan tərəfinə təqdim etdik. Ümid edirəm ki, Ermənistan tərəfi də siyasi iradə göstərərək beynəlxalq birlik tərəfindən tanınan bu əsas təməl prinsiplər əsasında Azərbaycanla sülh müqaviləsini imzalayacaqdır. Əgər belə olarsa, Cənubi Qafqaza sülh gələcək və eyni zamanda, əməkdaşlıq üçün imkanlar yaranacaqdır. Bu gün eyni zamanda, söhbət əsnasında Gürcüstan-Azərbaycan-Ermənistan məsləhətləşmələrə başlaması haqqında fikir mübadiləsi apardıq. Əgər Ermənistan tərəfi buna hazırdırsa, biz buna hazırıq".
ABŞ-ın Gürcüstandakı səfiri Kelli Deqnan deyib ki, Prezident İlham Əliyevin Gürcüstan-Azərbaycan-Ermənistan məsləhətləşmələri ilə bağlı bəyanatı çox müsbət və ümidvericidir.
Onun sözlərinə görə, region ölkələrinin liderlərinin istənilən görüşü vacibdir:
"Gürcüstanın vasitəçilik roluna gəlincə, biz Gürcüstanın saxlanılanların təhvil verilməsində oynadığı rolu çox yaxşı xatırlayırıq. Bu, Gürcüstanın prosesdə uğurlu vasitəçiliyi faktıdır. Bununla belə, üç ölkə arasında əməkdaşlıq və dialoqun inkişaf edə biləcəyi bir çox müxtəlif sahələr var. Bunlar enerji, iqtisadiyyat və qarşılıqlı əməkdaşlıq əsasında inkişaf etdirilə biləcək digər sahələrdir. Prezident İlham Əliyevin bəyanatı çox müsbət və ümidvericidir”.
Prezident İlham Əliyev Praqada keçirdiyi görüşlər zamanı bəyan etdi ki, region ölkələrini əhatə edən 6-tərəfli format alınmasa, Ermənistan və Gürcüstanla üçtərəfli formatda da əməkdaşlığa hazırıq.
Bu formatın ərsəyə gəlməsi mümkündürmü və Prezident İlham Əliyev bu formatın perspektivinə hansı amillərə görə inanır?
Siyasi çərhçi Sahil Kərimli “Bakı-Xəbər”ə açıqlamasında bildirdi ki, Azərbaycan Prezidenti İlham Əliyev Gürcüstana səfəri zamanı bir çox mühüm bəyanatlar səsləndirdi:
“Burada əsas məqamlardan biri də Ermənistanla Azərbaycan arasında sülh müqaviləsinin imzalanması ilə bağlı prosesin təzələnməsi ilə bağlı bəyənatlar idi. Azərbaycan Prezidenti xüsusilə vurğuladı ki, Azərbaycan bölgədə sülh və təhlükəsizlik istəyir. Ermənistan sülhə məcbur edilməsi istiqamətində bütün mümkün imkanlardan istifadə edilir. Hətta, bununla bağlı Gürcüstanla da xüsusi məsləhətləşmələr aparılması istiqamətində zəruri addımlar atıla biləcəyini cənab Prezident vurğuladı. Bu o deməkdir ki, Azərbaycan bütün imkanlardan: həm qonşuları ilə, həm də digər beynəlxalq dairələrlə olan əməkdaşlığından istifadə edir. Ermənistanı sülhə cəlb etmək üçün bütün addımları atır. Yəni, burada Gürcüstanla Azərbaycanın illərə söykənən, dərin köklərə malik olan dostuq və qardaşlıq münasibətlərini də xüsusi vurğulamaq lazımdır. Bu münasibətlər bölgənin digər dövlətlərinə də örnək olmalıdır. Azərbaycan uzun illərdir ki, öz dostları, qardaşları ilə səmimi əməkdaşlıq münasibətləri qurur. Yeganə istisna Ermənistandır. Çünki, Ermənistan uzun illərdir bölgədə işğalçı, terroçu, separatizm meyllərinə söykənərək öz siyasətini qurur. Azərbaycanın ərazi bütövlüyünün bir neçə faizinin 30 ilə yaxın işğalda saxlanılması, ərazilərimizin dağıdılması, Azərbaycan xalqına qarşı kütləvi soyqırım cinayətləri, terrorların törədilməsi göstərir ki, bölgədə sülh və təhlükəsizliyə təhdid olan yeganə ölkə Ermənistandır. Azərbaycan çalışır ki, Ermənistanı bu cinayətkar addımlarından çəkindirsin və bölgədə sülh əldə olunsun. Əlbəttə, Gürcüstan da bu proseslərə töhfə verə bilər. Çünki, Gürcüstan da bölgədə nüfuzlu ölkələrdən biridir. Ümumilikdə, bölgənin təhlükəsizliyi həm Gürcüstan, həm Azərbaycan, Ermənistan, həm də Rusiya və Türkiyə üçün, hətta İran üçün belə inkişaf, tərəqqi deməkdir. Bilirsiz ki, Azərbaycan bu ərazilərin sürətli bərpasını həyata keçirir. Bölgənin iqtisadiyyatına inteqrasiya istiqamətində çox böyük addımlar atılır. Nəhəng infrastruktur layihələri həyata keçirilir ki, bu təkcə Azərbaycan yox, bütün bölgə ölkələri üçün önəmlidir. Biz buna çalışırıq ki, bölgədə rifah və sülh olsun. İnanırıq ki, Azərbaycan Prezidentinin bu qətiyyətli, konkret hədəflərinə hesablanmış siyasəti həmişə olduğu kimi, yenə də öz müsbət nəticəsini verəcək. Biz nəhayət Ermənistanla sülh müqaviləsi imzalaya biləcəyik. Sülh əldə olunandan sonra Ermənistanın özü bu formatda əməkdaşlığa maraq göstərəcək”.
Məhəmmədəli QƏRİBLİ
