Prezident İlham Əliyev oktyabrın 24-də Mçxeta rayonundakı Muxrani sarayında “Qarabağ xanlığının irsi” sərgisi ilə tanışlıqdan sonra Gürcüstanın Baş naziri İrakli Qaribaşvili ilə mətbuata bəyanatla çıxış edərkən deyib ki, gələn il Bakı-Tbilisi-Ceyhan neft kəməri xətti ilə ixrac artırılacaq:
"O ki qaldı, ikitərəfli gündəliyimizə, əlbəttə ki, ticarət dövriyyəmizin artması bizi sevindirir. Bu ilin 9 ayında qarşılıqlı ticarət dövriyyəsi bir milyard dollara yaxınlaşıb. Əlbəttə ki, Azərbaycanın sərmayəsi ilə həyata keçirilən layihələr bizim əməkdaşlığımızı daha da gücləndirir. Azərbaycan Gürcüstana 3 milyard dollardan çox sərmayə qoyub. Bu sərmayə qarşılıqlı faydalı sərmayədir, çünki hər iki tərəfin maraqlarına cavab verir. Əlbəttə, biz bu gün gələcək enerji siyasətimizlə bağlı geniş fikir mübadiləsi apardıq. Baş nazir də qeyd etdiyi kimi, həyata keçirilmiş layihələr artıq uğurla fəaliyyətdədir. Biz yeni layihələr haqqında düşünürük. Biz dünya bazarlarına qaz ixracatını artırmaq fikrindəyik. Bu il 22 milyard kubmetr ixracımız olacaq, gələn il daha da artacaq. Bu ilin iyul ayında Avropa Komissiyası ilə Azərbaycan arasında imzalanmış enerji sahəsində strateji tərəfdaşlığa dair Memorandumda göstərilir ki, növbəti 5 ildə Azərbaycan Avropaya qaz ixracını iki dəfə artıracaq. Yəni, bizim niyyətimiz bundan ibarətdir, imkanlarımız da buna çatır. Beləliklə, biz planlaşdırırıq ki, 2027-ci ildə Azərbaycanın təkcə Avropaya qaz ixracatı 20 milyard kubmetrə çatacaq. Əlbəttə ki, bununla əlaqədar görüləcək işlər həm ikitərəfli formatda müzakirə olundu, həm də gələcək müzakirələrə ehtiyac var. Eyni zamanda, gələn il Bakı-Tbilisi-Ceyhan neft kəməri xətti ilə ixrac artırılacaq. Biz bununla bərabər hazırda istismarda olmayan Bakı-Supsa neft kəmərindən də istifadə etmək istəyirik. Bu barədə də danışmışıq. Mən bizim planlarımız haqqında cənab Baş naziri məlumatlandırdım. Buna da böyük ehtiyac və böyük potensial var".
Göründüyü kimi, Prezident dünyanın enerji böhranı ilə uzlaşdığı bir dönəmdə Gürcüstanla birgə daha böyük layihələrə imza ata biləcəyimizi bildirib. Prezident bununla nələrə eyham vurur və hansı perspektivi göstərir?
Beynəlxalq idarəetmə standartları üzrə ekspert, iqtisadçı Asif İbrahimov “Bakı-Xəbər”ə açıqlamasında bildirdi ki, əslində bu suala Prezident Gürcüstandakı çıxışında ətraflı cavab verib: “ Ölkə başçısı hansı layihələrin həyata keçiriləcəyini bəyan edib. Biz bir sıra meqa layihələrimizi Gürcüstan üzərindən reallaşdırırıq. Ancaq mövcud şərtlər, Azərbaycana olan etibarın artması başqa reallıqları ortaya qoyur. Bizim ölkə olaraq logistik əhəmiyyətimiz daha da artır. Gürcüstana getməzdən əvvəl – oktyabrın ortalarında Prezident İlham Əliyevin Qazaxıstana rəsmi səfəri baş tutub. Orada aparılan müzakirələr arasında Qazaxıstan məhsullarının, həmçinin digər ölkələrin məhsullarının Qazaxıstan vasitəsilə Azərbaycan üzərindən dünya bazarına çıxarılması məsələsi əsas yeri tutub. Xatırladaq ki, bu ilin yazında Qazaxıstan Azərbaycan üzərindən ildə 18 milyon ton quru yükü ötürməyə hazır olduğunu bəyan edib. Azərbaycan bu yükləri, həmçinin Türkmənistan üzərindən gələcək yükləri öz ərazisindən ötürmək üçün həm öz infrastrukturunu hazırlayır, həm də stratreji tərəfdaşı olan Gürcüstana dəstək verir. Bakı-Tiflis-Qars dəmiryol xəttinin Gürcüstan ərazisindəki hissəsinin tikintisini çox əlverişli şərtlərlə maliyyələşdirən Bakı xəttin ötürücülük imkanlarını genişləndirmək üçün də dəstəyini əsirgəməyəcək.
Azərbaycan Xəzər dənizindən əldə edəcəyi böyük həcmdə elektrik enerjisini məhz Gürcüstan üzərindən Avropaya nəql etməyə hazırlaşır. Prezident İlham Əliyevin qonşu ölkədə olarkən verdiyi məlumatdan aydın olur ki, Azərbaycan elektrik enerjisi ixracında da əsas tranzit ölkə olaraq Gürcüstanı görür. Bu isə Gürcüstan iqtisadiyyatı üçün əlavə gəlir mənbəyinin formalaşması deməkdir. Təbiidir ki, bütün bunlardan həm Azərbaycan, həm də Gürcüstan qarşılıqlı olaraq mənfəət əldə edəcəklər. Hazırda Rusiyanın embarqosu səbəbindən Avropanın alternativ enerji mənbələrinə böyük ehtiyacları var. Bu tələbatı əhəmiyyətli hissəsini bizim həyata keçirəcəyimiz birgə layihələrimiz qarşılaya bilər. Ölkə başçımız məhz bu istiqamətlər üzrə ciddi işlərin görüləcəyini nəzərdə tutur”.
Məhəmmədəli QƏRİBLİ
