Azərbaycana qarşı Fransa Senatında müzakirəyə çıxarılacaq qətnamə layihəsi hazırlanıb. 6 senatorun hazırladığı qətnamə layihəsi Bakıya təzyiq xarakteri daşıyır.
Qətnamədə Azərbaycan “hərbi cinayətlərdə və insan haqlarının pozulmasında” ittiham olunur;
Avropa İttifaqı ölkələrinə Azərbaycandan neft və qaz idxalını dayandırmaq çağırışı edilir;
Ermənilərin Qarabağa “qayıdış hüququ”, işğaldan azad edilmiş ərazilərdə “erməni mədəni irsinin qorunması” kimi məsələləri özündə ehtiva edir.
Noyabrın 15-də Senatda müzakirəyə çıxarılacaq qətnamənin qəbul edilməsi ehtimalı böyükdür.
Qeyd edək ki, Prezident İlham Əliyev bir müddət əvvəl Qazaxıstanda səfərdə olanda Fransanın belə bir qətmanənin qəbuluna hazırlaşdığını bəyan etmişdi. Sitat: “Fransanın xarici işlər naziri Azərbaycanın əleyhinə yalan bəyanatlar verib, Fransa Senatı və aşağı palata İkinci Qarabağ müharibəsi dövründə qondarma “Dağlıq Qarabağ”ı tanıyan qətnamələr qəbul ediblər. Baxmayaraq ki, hətta Ermənistan özü onu tanımayıb. Bizə məlumdur ki, noyabrın ortalarına Fransa Senatında Azərbaycan əleyhinə növbəti qətnamə hazırlanır. Beləliklə, təəssüf ki, Fransanın indiki rəhbərliyi əvvəlkilərdən fərqli olaraq, - mənim isə Prezident Şirakla da, Prezident Sarkozi ilə də, Prezident Ollandla da kifayət qədər sıx ünsiyyət qurmaq imkanım var idi və münasibətlər kifayət qədər ölçülüb-biçilmiş, kifayət qədər mehriban idi və Fransada müəyyən erməni diasporu amilinə baxmayaraq, biz həmişə Fransanın əvvəlki prezidentlərinin fəaliyyətini, balanslaşdırılmış qəbul edirdik, - mahiyyət etibarilə bütün bunların üstündən xətt çəkdi. Buna görə də istərdim ki, həmkarlarımı bu vəziyyət barədə məlumatlandırım”.
Göründüyü kimi, İlham Əliyevin bu xəbəri də düz çıxdı. Fransa senatı noyabrın 15-də Azərbaycan əleyhinə növbəti qətnamə çıxarmağa hazırlaşır.
Qətnamə qəbul edilsə, Azərbaycan-Fransa münasibətlərinin perspektivi necə olacaq?
Politoloq Yeganə Hacıyeva “Bakı-Xəbər”ə açıqlamasında bildirdi ki, ən yeni tarixdə Fransanın Azərbaycana münasibətində bizim milli maraqların əleyhinə gedən çoxlu sayda ciddi fəaliyyəti olub: “Bu ciddi fəaliyyətə istər Fransa Senatı, istər Milli Assambleyası, istərsə də siyasi qrupları qol qoyub. Son günlərdə Fransa prezidenti şəxsən Azərbaycanın milli maraqlarının əleyhinə mövcud reallığı təhrif etməklə şərhlər verib. Bu şərhlərin hamısını Fransanın yanlış Qafqaz siyasətinə aid edə bilərik. Bunları Azərbaycana qarşı olan beynəlxalq səviyyədə kompaniyalara rəvac verən vacib səylər adlandırmalıyıq. Azərbaycan Prezidenti, həmçinin Azərbaycanın Fransada olan Səfirliyi Fransanın daha əvvəl gizlətdiyi, amma indi açıq oynadığı oyunlar barədə məlumatlı olub. Azərbaycana məlum idi ki, bu prosesin arxasında sadəcə digər ölkələrdəki kimi ermənipərəst siyasi qruplar, birbaşa erməni lobbisi deyil, münasibətləri daha da gərginləşdirmık istəyən Fransa rəhbəri şəxsən durur. Fransa Senatında müzakirəyə çıxarılacaq Azərbaycanla bağlı qətnamə qəbul olunacaq. Daha öncə də Qarabağın “müstəqilliyi” ilə bağlı absurd bir qətnamə məhz bu Senat vasitəsilə dəstəklənmişdi. Bu qətnamənin daha sonra Avropada hər hansı ciddi nəticələrə səbəb olacağı ilə bağlı heç bir perspektivi yoxdur. Ancaq digər ölkələr: Lüksemburq, Hollandiya da bunu qəbul etmək üçün addımlar atacaq. Bu, Azərbaycana qarşı bir koalision fəaliyyətdir. Görün, Azərbaycanı nədə günahlandırırlar. Bizi hərbi cinayətlərdə və insanlarının hüquqlarının pozulmasında ittiham edirlər. Onu da qeyd edim ki, Avropa Şurasının öz rəhbərliyi səviyyəsində bu yaxınlarda, guya sentyabrın 13-ü və 14-ü baş verən şübhəli bir videoroliklə bağlı da Azərbaycan Xarici İşlər Nazirliyinə “təcili araşdırılmalı” qrifiylə məktub göndərilmişdi. Həmin dövrdə o məktubun paylaşılması ilə bağlı mən tviterdə yazmışdım ki, nəyə əsasən belə bir araşdırılma tələb edirsiz? Gəncədə baş verən hadisələr, ondan bir gün qabaq Azərbaycan əsgərinin qulağının kəsilməsi ilə bağlı görüntülər var idi. Müharibə cinayətlərinin Ermənistan tərəfindən pozulmasi ilə bağlı daha ciddi görüntülər olub. Bununla bağlı təcili araşdırılma çağırışı etməyən Fransa indi niyə belə bir çağırış edir? Bu suallarımız, təbii ki, cavabsız qaldı. Digər bir məqam, Avropa İttifaqı ölkələrində Azərbaycanın neft və qaz idxalının dayandırılması ilə bağlı çağırış da bu qətnamədə öz əksini tapır. Bu, Avropanın Rusiya qazından özünü sığortalamaq və azad olmaq istiqamətində Azərbaycanla imzalanmış memoranduma qarşı olan bir fəaliyyətdir. Onu da qeyd etmək lazımdır ki, Fransanın beynəlxalq təşkilatlarda sosialist təbəqəsi adlandırdığımız siyasi qrupa aid olan, ənənəvi olaraq Kreml tərəfindən dəstəklənən qruplarının da aktivliyini izləməkdəyik. Aydın məsələdir ki, bu qətnamə həm də Avropa Birliyinin Rusiyanın qaz asılılığından kənarlaşması üçün atdığı addımları sabotaj etmək siyasətinə verilən dəstəkdir. Bu məsələ uzun müddət Rusiya qazının Avropada paylaşmasından milyardlar qazanan dairələrin marağındadır. Ermənilərin Qarabağa qayıdışı, erməni mədəni irsinin qorunması məsələləri də qeyri- ciddi hesab olunur. Ermənilərin Qarabağa qayıdış, erməni mədəni irsinin qorunması məsələləri də qeyri - ciddi hesab olunur. Son illərin geniş təcrübəsi göstərdi ki, Azərbaycan Prezidenti nəinki bu məsələ, digər vacib inkişaf ssenariləri barədə də mötəbər məlumatlara malik olub və xarici siyasət konturlarını buna uyğun aparıb. Bu uğurlu siyəsətin müəyyənləşməsində Fransanın bizə qarşı olan demarşlarının zərərsizləşdirilməsi də vacib yerlərdən birini tutur”.
Məhəmmədəli QƏRİBLİ
