Son vaxtlar daha da yaxından əməkdaşlıq edən Ermənistan -İran tandemi qəribə bir hiyləyə əl atıb. Bunun nədən ibarət olduğu ilə yaxından tanış olmaq üçün Ermənistanın “Aravot” qazetində yayılan bir məlumatı nəzərdən keçirmək lazımdır. Qəzet bildirir ki, Ermənistanda yaşayan bir qrup İran vətəndaşı İranın İrəvandakı səfirlik binasını partlatmağı planlaşdırır:
“Adı hələ ki gizli saxlanılan İran vətəndaşı (M.A.) bir neçə gün əvvəl Ermənistan Təhlükəsizlik Şurasına izahat yazıb. İzahata əsasən, onun tanışlarından biri də Ermənistanda olan İran vətəndaşı (Ş.Z.) olub. Onların planı İranın İrəvandakı Budaqyan küçəsi-1 ünvanında yerləşən səfirlik binasını partlatmaq olub.
Əsas məqsəd İranın Ermənistana qarşı dostluq ritorikasının yalnız hakimiyyət tərəfindən yeridildiyini bildirməkdir. Qrup üzvləri daha sonra Zəngəzurdakı yeni açılan konsulluq binasını da yox etmək niyyətində olduqlarını bildiriblər”.
Diqqət çəkən məqam budur ki, məlumatda hədəf olaraq birbaşa Azərbaycan və Türkiyə götürülür. Çünki orada söhbət həm də yeni açılan Qafandakı İran konsulluğunun partladılmasından gedir. Avtomatik olaraq erməni cəmiyyətinə mesaj ötürülür ki, güya İran-Ermənistan yaxınlaşmasından son dərəcə narahat olan Türkiyə və Azərbaycan bunun qarşısını almaq üçün hətta terrora əl atmağa belə hazırdır.
Ermənilərin bu provokasiyası ilə bağlı uyğun sahənin mütəxəssisləri nə düşünür?
Xüsusi xidmət orqanlarının sabiq əməkdaşı Elşən Həsənov “Bakı-Xəbər”ə açıqlamasında bildirdi ki, bununla Ermənistan bizə qarşı provakasiya etməyə çalışır: “Əslində özünüz də qeyd etdiyiniz kimi, qəzet cəfəng, uydurma bir fikirlə çıxış edir. Burada fikrin uydurma olması əsas məsələ deyil. Əsas məsələ fikrin nəyə qulluq etməsidir. Ermənistan-İran münasibətlərinə, erməni ictimaiyyətinin İran dövlətinə olan münasibətə nəzər yetirsək, bu münasibətin radikallıqdan kənar olduğunu görmək olar. Əslində Ermənistan üçün həyat yolu olan İrana qarşı belə bir addımın atılması son dərəcə inanılmazdır. Görünür, qəzet belə açıqlamanı verməklə Ermənistan hakimiyyəti tərəfindən və ya xüsusi təşkilatlar tərəfindən verilmiş məlumatı nəyəsə hesablayaraq tirajlayır. Bu əlbəttə bu, sonradan Türkiyə və Azərbaycanı terrorda ittiham etmək istəyindən də irəli gələ bilər. Lakin belə bir məlumatın yayılmasının başqa səbəbləri də ola bilər.
Əgər bu xəbər beynəlxalq aləmdə İranla dostluq münasibətlərinin heç də normal olmamasına hesablanırsa, bu, əslində avantüradır. Hamının bildiyi bir faktı bu yolla əbəs yerə gizlətmək cəhdi sadəcə mümkün deyil.
Əslində, burada ifşa etməli bir şey də yoxdur. Sadəcə, iki dövlət və dövlətlərin ictimai münasibətlərinə nəzər yetirib, bu münasibətləri əsas götürərək ön planda göstərmək lazımdır.
Variantlardan biri də sadəcə İrana hesablanmış variant ola bilər. Ola bilər ki, bu, İrana təzyiq istəyindən də irəli gəlsin. Görünür, Ermənistanın umacağı, İranın isə yerinə yetirməkdən boyun qaçırdığı nələrsə var. İstənilən halda, məkrli erməni xisləti özünü bu məsələdə açıq göstərir. Özləri dı belə cəhdi edib, bizim üstümüzə ata bilərlər”.
Məhəmmədəli QƏRİBLİ
