2022-ci il iyunun 24-də Bakıda “Azərbaycan Respublikası Hökuməti ilə Rusiya Federasiyası Hökuməti arasında beynəlxalq informasiya təhlükəsizliyinin təmin edilməsi sahəsində əməkdaşlıq haqqında Saziş” imzalanarkən düşünürdük ki, bu sənəd təsdiqləndikdən sonra artıq Rusiya mediasında anti-Azərbaycan mövqeyindən çıxışlara yol verilməyəcək, ermənilərə Azərbaycanın suveren ərazilərinə qarşı bölücülük müstəvisində açıqlamalar verməyə şərait yaradılmayacaq, dövlətimizin ərazi bütövlüyü üçün təhdid yaradan fikirlərə meydan tanınmayacaq. Amma təəssüf ki, belə olmadı.
Dəfələrlə Rusiyanın dövlət mətbuatında və özəl mediada Azərbaycana qarşı təhdid dolu fikirlərə şərait yaradılıb. Məlum olduğu kimi, 2022-ci il oktyabrın 20-21-də Rusiyanın Birinci Kanalında yayımlanan “Böyük oyun” verilişinin efirində rusiyalı politoloqlar və erməni əsilli ekspertlər tərəfindən açıq-aşkar antiazərbaycan çıxışları edilib, Azərbaycan Respublikasının ərazi bütövlüyünün şübhə altına alınması və dövlət xəritəsinin təhrif edilməsi halları baş verib. Bununla əlaqədar Azərbaycanın Rusiyadakı səfirliyi Rusiya XİN-ə rəsmi sərt etiraz notası göndərib. Bu öz yerində.
Qeyd etdiyimiz kimi, bir neçə ay əvvəl Rusiya ilə Azərbaycan arasında informasiya təhlükəsizliyi barədə sənəd imzalansa da, Azərbaycan bu sənədin bəndlərinə əməl etsə də, Rusiyada buna əməl edilmir. Yenə də Azərbaycanın ərazi bütövlüyünə xələl gətirən fikirlər, anti-Azərbaycan proqramları, yazılar ortaya çıxır, yenə ermənilər Rusiya mediasında, kobud səslənsə də, meydan sulayır.
“…Bu həm də Rusiyanın dövlət başçısı, prezident Putinə qarşı aşkar təxribat cəhdidir”
Mövzuya şərh verən “SƏS” qəzetinin baş redaktoru, siyasi ekspert Bəhruz Quliyev bildirdi: “Rusiyanın telekanallarında, xüsusilə dövlət kanallarında Azərbaycanın ərazi bütövlüyünə qarşı əsassız iddiaların səsləndirilməsi ilk belə hal deyil. Biz bu cür münasibəti 44 günlük müharibədən qabaq da, sonra da, elə hazırda da təəssüf ki, müşahidə etməkdəyik. Bu baxımdan, bəri başdan deyim ki, mövcud davranış tərzi Rusiya ilə Azərbaycan arasında olan müttəfiqlik münasibətlərini kölgədə qoyur və bunun da arxasında dayanan əsas qüvvələr Rusiyada fəaliyyət göstərən, habelə Rusiyanın media məkanında kök salmış erməni lobbisinin nümayəndələridir”.
Onun sözlərinə görə, belə olan halda Rusiyanın müvafiq qurumları da sözügedən halların yaşanmaması üçün hərəkətə keçməli, həmin təxribatlara yol açan fərdləri aşkarlamalı, cəzalandırmalıdır: “Çünki həmin məsələ yalnız Azərbaycan dövlətinə, xalqına, həmçinin ərazi bütövlüyünə qarşı yönəlmiş təxribatçılıq deyil, bu həm də Rusiyanın dövlət başçısı, prezident Putinə qarşı aşkar təxribat cəhdidir. Çünki o da zamanında və dəfələrlə vurğulayıb ki, Qarabağ Azərbaycanın suveren ərazisidir və belə olan halda Rusiyanın 1-ci kanalının Azərbaycanın beynəlxalq hüquq daxilindəki ərazi vahidini “dqr” kimi göstərməsi nə dərəcədə doğrudur? Təsəvvürünüzə gətirin ki, həmin təxribatı Ermənistan TV-ləri də edir, Rusiya da. Demək, burada həmin maraqları bölüşən müəyyən qruplar var və həmin qrupların zərərsizləşdirilməsi istiqamətində qəti tədbirlər görülməlidir”.
“Görün vəziyyət nə həddə çatdı ki, Rusiya Federasiyası ilə müttəfiqlik münasibətində olan Azərbaycan Respublikası diplomatik səviyyədə öz etiraz notasını həmin ölkənin xarici işlər nazirliyinə təqdim etdi”, deyə xatırladan siyasi ekspert hesab edir ki, artıq bu kimi təxribatların qarşısının alınması üçün daha sərt addımların atılası zəruridir: “Bu gün Azərbaycan dövləti özünün müstəqil siyasəti ilə heç bir ölkənin daxili işlərinə müdaxilə etmir, eləcə də imkan vermir ki, ölkəmizin də daxili işlərinə hansısa dairələr müdaxilə etsinlər. Belə faktlar isə kifayət qədərdir. Ona görə də artıq rəsmi Moskva da Bakının tələblərinə biganə qalmamalı, bəlli ermənipərəst lobbilər Rusiya Federasiyasının qanunları, o cümlədən, müttəfiqlik sazişindəki müvafiq bəndlər əsasında cəzalarına çatdırılmalıdırlar. Əks halda, belə addımlar davam ediləcəyi təqdirdə həmin addımlar ölkələrimiz arasındakı münasibətlərə də kəskin təsirlərini göstərə bilər. Yəni bu cür halların yolverilməzliyi yönündə yalnız Azərbaycanın etiraz notası deyil, Rusiyanın da qarşılıqlı addım atması vacibdir”.
İradə SARIYEVA
