“İstər siyasi təşəbbüslər, iqtisadiyyat, enerji, nəqliyyat - bütün bu sahələrdə bizim işbirliyimiz artıq regional çərçivədən çıxıb, beynəlxalq səviyyəyə qalxıbdır”. Bu fikirləri Prezident İlham Əliyev Cəbrayıl şəhərində Türkiyə Prezidenti Rəcəb Tayyib Ərdoğanla görüşdən sonra mətbuata bəyanatında deyib.
Ölkə başçısının sözlərinə görə, İkinci Qarabağ savaşından sonra Türkiyə-Azərbaycan qardaşlığı, birliyi daha da yüksək pilləyə qalxıb: “Yəqin siz də görürsünüz ki, hər yerdə Azərbaycan və Türkiyə bayraqları bir yerdə dalğalanır. Bu, ürəkdən gələn duyğulardır, bu, əcdadlarımızdan qalan mirasdır, onların vəsiyyətidir və bu, zəmanəmizin tələbidir. Bu gün əziz Qardaşımın böyük heyətlə, hökumət nümayəndələri ilə burada olması bir daha onu göstərir ki, biz hər zaman olduğu kimi, bir yerdəyik və bir yerdə olacağıq. Bundan sonra bölgədə gedən işlər, əlbəttə ki, Türkiyə və Azərbaycanın fəal iştirakı və izni ilə aparılacaq. İstər siyasi təşəbbüslər, iqtisadiyyat, enerji, nəqliyyat - bütün bu sahələrdə bizim işbirliyimiz artıq regional çərçivədən çıxıb, beynəlxalq səviyyəyə qalxıbdır”.
Maraqlıdır, iki ölkənin işbiriliyinin regional çərçivədən çıxıb beynəlxalq səviyyəyə qalxması nə deməkdir?
“Türkiyə ilə Azərbaycan dünya üçün optimal elastik dəhlizə çevrilib”
Məsələyə münasibət bildirən iqtisadçı-ekspert Fuad İbrahimovun fikrincə, burada çoxsaylı məsələlərdən söhbət gedir: “İki ölkənin işbirliyi bir neçə ildir beynəlxalq səviyyəyə qalxıb. Son vaxtlar bu, daha da böyüyüb. Söhbət ondan gedir ki, Azərbaycan illərdir qardaş Türkiyə ilə böyük layihələr həyata keçirir. Bu layihələr ilkin layihələndirmə dövrlərində hətta böyük ölkələr tərəfindən rişxəndlə qarşılanırdı. Məsələn, Bakı-Tbilisi-Ceyhan neft kəmərinin çəkilməsini real hesab etmirdilər. Ancaq biz nəinki BTC-ni, digər layihələri də uğurla həyata keçirdik. Vəziyyət o həddə gəlib çatıb ki, iki ölkə bu kimi layihələrin icra mexanizmini beynəlxalq müstəvidə tətbiq edir. Azərbaycan 2020-ci ilin sonundan Avropaya qaz ixrac edir. Bu gün iki ölkə Asiya ilə Avropanı birləşdirən kommunikasiya rolunda çıxış edir. Türkiyə ilə Azərbaycan dünya üçün optimal elastik dəhlizə çevrilib. Rusiyanın Ukraynada hərbi əməliyyatlara başlamasından sonra Çindən və digər ölkələrdən Azərbaycan üzərindən daşımalar artıb. Yaxın dövrlərdə bunun daha da artacağı gözlənilir. Həm nəqliyyat xəttləri, həm də boru kəmərləri Türkiyənin üzərindən keçir. Avropanın qaz alışı ilə bağlı ümid bəslədiyi ölkələrdən biri də Azərbaycandır. Azərbaycanın dünya üçün önəmi artır. “Şimal-Cənub” nəqliyyat dəhlizi də Azərbaycandan keçir. Bu gün iqtisadi məsələlərdə, ticarət dövriyyəsində zaman itirmək ən böyük məsələlərdəndir. Azərbaycanın hesabına ticarət yolları qısalır. Türkiyə-Azərbaycan işbirliyini beynəlxalq müstəvidə şərtləndirən faktorlardan biri də budur”.
Bir sözlə, iqtisadçı-ekspert hesab edir ki, bütün bunlar böyük əhəmiyyət kəsb edir.
Vidadi ORDAHALLI
