Sirr deyil ki, İran özünü islam ambisiyalı dövlət sayır. Bunu açıq da bəyan edir. Hətta özünü İslam dünyasının lideri kimi qələmə verir. Amma apadığı siyasətlə elə İslam dünyasının nifrətini qazanıb.
Elə bir müsəlman ölkəsi yoxdur ki, İran onunla normal yola getsin. Tam səmimi desək, məhz müsəlman aləmində Azərbaycanın hörməti İrandan qat-qat çoxdur. 30 illik işğal dövründə İran həmin ərazilərdə Azərbaycan xalqına məxsus milli mədəni irsin dağıdılmasına, məscidlərin uçurulması və təhqir olunmasına göz yumub, İrəvanda, Şuşada məscidləri bərpa etməklə Ermənistanın "humanist" simasını qoruyub saxlamağa çalışıb, qondarma şəkildə tarixi Azərbaycan tikililərini, xüsusilə Gövhər Ağa məscidini “təmir” etdirməklə ermənilərlə paralel olaraq onu “fars tarixinin arxitekturası” adlandırıb. İranın qeyri-müsəlman xarakterli xain rəftarı bununla da başa çatmayıb. Faktlardan biri də budur ki, 44 günlük Vətən müharibəsi dövründə İran rəhbərliyi ən sonuncular sırasında, artıq müharibənin taleyinin həll edildiyinı və Azərbaycanın şəksiz qələbə qazandığına əmin olduqdan sonra ölkəmizə dəstək ifadə edən bəyanat verib. Amma müharibənin gedişində Ermənistana silah göndərilməsindən tutmuş Azərbaycanın təhdid olunmasına kimi ölkəmizə qarşı hər cür vasitələrdən istifadə edib. Nəticədə Azərbaycanın torpaqları işğal altında olan dövrdə yalnız növbətçi bəyanatlarla kifayətlənən İran rəsmiləri indi Ermənistanın ərazi bütövlüyünün "qırmızı xətt" olması ilə bağlı ardıcıl bəyanatlar verir, Azərbaycana qarşı hədələr səsləndirir, hərbi təlimlər keçirir, bütün mümkün vasitələrlə Ermənistanı müdafiə edirlər. Belə olan halda isə müsəlmanların qanını axıdan bir dövlətə dəstək verən İranın islami dəyərlərin müdafiəsi haqqında danışmağa heç bir haqqı yoxdur!
İranın məhz İslam dünyası tərəfindən qəbul edilməməsinin başqa hansı səbəbləri var?
İlahiyyatçı Tural İrfan “Bakı-Xəbər”ə açıqlamasında bildirdi ki, İran teokratik mahiyyətli bir ölkədir: “Yəni özünü İslam ölkəsi elan edib. Həm də deməliyik ki, İran məzhəbçi bir ölkədir. Pakistan da mahiyyətcə islam ölkəsidir, ancaq orada məzhəbçilik yoxdur. Onların modeli elədir ki, İslamın heç bir təriqəti digərindən dominant hala gəlməyib. Ən radikal islam əsaslı ölkələrdən biri sayılan Səudiyyə Ərəbistanıdır ki, onların özündə belə İrandakı kimi repressiv ideologiya mövcud deyil. İran diplomatlarından biri dedi ki, Türkiyə ilə Azərbaycanı yalnız ortaq dil birləşdirir. Çünki İran bizi türk saymır. Onlar hesab edirlər ki, biz türk dilində danışan farslarıq. Onlar düşünürlər ki, şiəliyi əsas tutaraq, Azərbaycanı da Suriyanın, Yəmənin, İraqın vəziyyətinə sala bilərlər. İran islam pərdəsi altında öz inqlab modelini dünyanın müsəlman ölkələrinə ixrac etməyə çalışır. Maraqlıdır ki, İran hakimiyyətinin başında duranların böyük əksəriyyəti heç fars deyil, onlar başqa millətlərin təmsilçiləridir. Həmin ölkədə yeganə milli azlıq kimi ermənilərə istədikləri şərait yaradılıb. Milli çoxluq olan azərbaycanlılar həmin ölkədə təqibə məruz qalırlar. Onlar “vilayəti fəqih” sistemi ilə bütün dünyanı idarə etməyə çalışırlar. Son 30 ildə İranda təhsil alan bir nəfər də azərbaycanlıya ayətullah, yəni İslamın professoru titulu verilməyib. Belə olsa, Azərbaycandakı şiələr onu təqlid etmiş olurlar. Bu da İrana sərf etmir. Problem bundadır ki, İran bu siyasəti yalnız Azərbaycanla bağlı deyil, digər ölkələrdə də edir. İrandakı rejimin modeli heç teokratiyaya da uyğun gəlmir. İran İslam ölkəsidirsə, niyə tam fərqli təqvimlə gedir? Ayların adı da İslam təqvimi ilə uzlaşmır. Qədim Sasani dönəmindəki ay adlarından istifadə edirlər. Təəssüf ki, bizim ölkədəki ideoloji boşluqlardan istifadə edərək, öz ideologiyalarını burada yaya biliblər. Xalqı ayıltmaq lazımdır ki, inanclı insanlarımız onların təsiri altına düşməsin. İranın buradakı agentura şəbəkısi lazım gələndə özlərini gizlədə bilir. Bütün dünyaya məlumdur ki, İran heç bir prinsipial məsələdə müsəlmanları müdafiə etmir. Azərbaycan öz problemini həll edir, İran bizim yox, məscidlərə donuz bağlayan ermənilərin yanında yer alır. Bütün bunlar təsdiq edir ki, lazım gələndə İran istənilən bir ölkə ilə birləşib müsəlmanlara zülm edə bilər. Bu səbəbdən də, heç bir müsəlman ölkəsi onu səmimi qəbul etmir. Necə olur ki, islam ölkəsi olan Pakistan bizi dəstəkləyir, İran isə erməniləri? Deməli, problem İran rejimindədir. Azərbaycan dünyəvi ölkə olsa da, bütün dini dəyərləri dünyaya nümunə olacaq tərzdə qoruyub saxlayır. Hələ bir dəfə də olsun ki, bizdə təriqətlər arasında ixtilaf olmayıb”.
Məhəmmədəli QƏRİBLİ
