Ermənistanda səfərdə olan İranın xarici işlər naziri Hüseyn Əmir Abdullahian bu ölkənin Baş naziri Nikol Paşinyanla görüşüb. Tərəflər bir sıra məsələləri müzakirə ediblər.
XİN rəhbəri bildirib ki, İran Ermənistanla münasibətlərə önəm verir: “Həmkarlarım və mən cənab Ararat Mirzoyanla birlikdə hər iki ölkə üçün uzunmüddətli “yol xəritəsi”ni müəyyən etmək məqsədilə Ermənistana səfər etdik”.
Abdullahiyan ölkəsinin prezidenti İbrahim Rəisinin adından Nikol Paşinyanı Tehrana səfərə dəvət edib. Halbuki, yaxın tarixdə Paşinyanla Rəisi Nyu-Yorkda görüşüblər. Belə olan halda bu mehribançılığın kökü nədir ki, Paşinyanı bir də Tehrana səfər etməyə çağırıblar? Ermənistan parlament sədri Alen Simonyan isə İran parlament sədrini İrəvana dəvət edib. İkincisi, İran xarici işlər naziri deyib ki, nümayəndə heyəti ilə gəlmişik ki, İranla Ermənistan arasında uzun bir dövr üçün “yol xəritəsi”ni müzakirə edək. Bunlar nə yol xəritəsi hazırlayır, bir belə yaxınlaşma nə deməkdir?
“Paşinyanın Tehrana dəvət olunması molla rejiminin Azərbaycana yönəlik həyasızlığıdır”
Sözügedən məsələyə aydınlıq gətirən siyasi ekspert Elşad Həsənov bununla bağlı bir sıra məqamlara toxundu: “Son zamanlar Ermənistanla İran arasında intensivləşən görüşlər, münasibətlər və fars rejiminin sərgilədiyi mövqe təəssüf doğurur. Əfsuslar olsun ki, belə bir reallıqlar mövcuddur. İran aşırı dərəcədə Ermənistanın maraqlarına oynayır. Abdullahiyanın Paşinyanla görüşdə sərgilədiyi canfəşanlıq da bundan irəli gəlir. Məlum olduğu kimi, İran ordusu 17-20 oktyabrda Arazboyu genişmiqyaslı hərbi təlimlər keçirdi. Bu, Erməistanın maraqlarına hesablanmış Azərbaycana yönəlik güc nümayişi idi. Bunun səbəbi onunla bağlıdır ki, İran Azərbaycanın öz ərazilərini azad etməsini həzm edə bilmir. Bizim “din qardaşlarımız” nədənsə ərazilərimiz 30 il işğal altında qalanda bir dəfə də hərbi təlimlər keçirmədilər. Qarabağın ətrafında 7 rayon işğal ediləndən sonra, atəşkəs dövründə bütün evlər sökülərək oradakı tikinti materialları İrana daşındı. Bir dəfə olsun fars rejimi bunun qarşısını almaqla bağlı tədbir görmədi. Qarabağda 67 məsciddən 65-i dağıdıldı, məscidlərə donuz bağlanıldı. İslam həmrəyliyindən, şiə təəssübkeşliyindən dəm vuran molla rejimi bir dəfə olsun buna etiraz etmədi. Halbuki, bütün bunlar dünya mətbuatında geniş yayıldı. 10 noyabr Bəyanatında göstərilib ki, Ermənistan silahlı qüvvələri Qarabağı tərk etməlidir və Naxçıvana maniəsiz gediş-gəliş təmin olunmalıdır. İndiyə qədər Ermənistan buna əməl etməyib. Ancaq biz həm də görürük ki, İran Zəngəzur dəhlizinin açılmasından daha çox narahatdır və buna öz etirazını bildirir. Paşinyanın Tehrana dəvət olunması molla rejiminin Azərbaycana yönəlik həyasızlığıdır. Nümayişkaranə şəkildə göstərirlər ki, biz Ermənistanın yanındayıq. Qarşılıqlı səfərləri artırmaqla öz aləmlərində güc göstərirlər. Tərəflər arasında uzun bir dövr üçün “yol xəritəsi” isə Azərbaycana qarşı hansısa tədbirlərin görülməsini özündə ehtiva edir. Ancaq onların bu arzuları gözlərində qalacaq. Çünki Azərbaycan regionda lider ölkədir və fars rejimi heç vaxt bu reallığı dəyişə bilməyəcək. Üstəlik, Azərbaycan həm ABŞ, həm də Avropa üçün strateji tərəfdaşdır. Başqa bir tərəfdən, regionda Türkiyənin nüfuzunun artması İranı narahat edir”.
Bir sözlə, siyasi ekspert hesab edir ki, İranın Azərbaycana qarşı məkrli oyunları iflasa məhkumdur.
Vidadi ORDAHALLI
