Ermənistanda anti-Rusiya siyasəti getdikcə daha açıq müstəviyə qədəm qoyur. Bu hal Qərb missiyalarının regiona gətrilməsi ilə özünü daha qabarıq formada büruzə verməyə başlayıb.
Erməni əsilli rus politoloq Semyon Bağdasarov İrəvanın əli ilə Rusiyanın Ermənistandan, buna görə həm də Cənubi Qafqazdan tamamilə qovulması zaman məsələsidir və bu baxımdan müddət çox qısadır: “Ermənistan Cənubi Qafqazda yeganə ölkədir ki, orada Rusiyanın əhəmiyyəti, o cümlədən hərbi varlığı var. Türkiyənin Rusiyanı qabaqladığı Gürcüstan və Azərbaycandan fərqli olaraq, Ermənistanda bizim mövqelərimiz güclü idi”.
Ekspert bildirib ki, Ukraynada xüsusi əməliyyat geciksə, bir-iki ilə Rusiyanın Cənubi Qafqazda iştirakı ciddi şəkildə azalacaq: “Nikol Paşinyan açıq şəkildə amerikalılarla işləyir, bu da çox şey deyir. Paşinyan Rusiyanın Cənubi Qafqazdan qovulmasına səbəb olacaq sənəd hazırlaya bilər”. Məsələ ilə bağlı “armenianreport” portalı da yazır ki, Paşinyan ruslardan üz döndərib. Ermənistanda anti-Rusiya təbliğatının artması, Rusiyanın cinayətlkar obrazının yaradılmasında da məqsəd budur: “Biz hamımız istənilən məlumatın sürətlə ötürüldüyü bir dövrdə, internet dövründə yaşayırıq. Və biz hamımız görürük ki, rus qoşunları Ukraynada mülki obyektləri, eləcə də mühüm infrastruktur obyektlərini bombalayır. Əslində, hətta Rusiya telekanallarının efirində də bu açıq şəkildə müzakirə olunur. Orada çıxış edənlər bütün Ukraynanı bombalamağı tələb edirlər ki, əhali işıqsız və qazsız donsun. Eyni zamanda, rus təbliğatçılar bunun “məcburi tədbir” olduğunu deyir. Bu, Rusiyanın bütün qalan müttəfiqlərini çətin vəziyyətdə qoyur. Axı, Ermənistan da rəsmi olaraq Rusiyanın strateji müttəfiqi hesab olunmaqda davam edir. Nə 2016-cı ilin aprelində, nə 2020-ci ilin payızında, nə də Azərbaycanın ölkəmizə qarşı hərbi-siyasi təzyiqləri artırdığı bu iki ildə bizi müdafiə etməyən ölkəmiz hələ də KTMT-nin üzvüdür. KTMT sadəcə söhbətə üstünlük verdi. İndi məlum olub ki, bütün bunlar Rusiya və Belarus Ukraynaya qarşı müharibəyə hazırlaşdıqları üçün edilib. Bizə xəbər vermədilər. Amma indi yalnız Moskva və Minsk üçün başa düşülən məntiqə görə, onlar bütün müttəfiqlərindən qartopu kimi böyüyən problemlərinin yükünü bölüşməyi tələb edirlər. İndi isə iş o yerə çatıb ki, hətta Almaniyada da Rusiya əleyhinə səs-küylü bəyanatlar verməyə başlayıblar. Almaniyanın keçmiş kansleri Merkelin siyasəti Ukraynada müharibənin başlamasına səbəb olub. Bu xüsusda səs-küylü bəyanatı Almaniyanın Ədliyyə Nazirliyinin rəhbəri vəzifəsini icra edən Marko Buşman “Welt”ə müsahibəsində verib. O deyib: “Bu gün bildiyimizə görə, biz almanlar “Şimal axını” qaz kəmərindən sonra “Şimal axını-2” qaz kəmərini dövriyyəyə itələmişik. Krımın ilhaqı bizim Ukraynada müharibənin başlanmasına töhfəmiz oldu”. Bundan başqa, Almaniyanın xarici işlər naziri Annalena Berbok və müdafiə naziri Kristin Lambrext Almaniya Maliyyə Nazirliyindən Ukraynaya yardım üçün üç dəfə çox pul ayrılmasını tələb edirlər. Bu barədə “Spiegel” nazirlərin məktubuna istinadən xəbər verir. Almaniyanın 2023-cü il büdcəsində Ukraynaya silah tədarükü üçün cəmi 697 milyon avro nəzərdə tutulub. Bununla belə, Xarici İşlər və Müdafiə nazirliklərinin rəhbərləri üç dəfə çox – 2,2 milyard avro tələb edirlər. Söhbət silah yardımı üçün xüsusi fondun pulundan gedir. Nazirlərin fikrincə, yalnız belə bir büdcə ilə Almaniya beynəlxalq tərəfdaşlarının gözlədiyi məsuliyyəti konkret və gözəçarpan şəkildə öz üzərinə götürə biləcək. İndiki müharibənin əvvəlində belə dönüşü təsəvvür etmək mümkün deyildi. Ancaq gördüyümüz kimi, Ukrayna ordusunun cəbhədəki uğurları hər şeyi kökündən dəyişdi.
Bu, təkcə Avropada deyil, Mərkəzi və Orta Asiyada da müşahidə olunur. Və hər kəs yeni tərəfdaşlar seçir. Yəni bu gün bütün dünya Putindən sonrakı mərhələyə - Rusiyanın zəifləməsi dövrünə hazırlaşır. Bir çox ölkələr onilliklər ərzində öz strategiyalarını bu amil əsasında qururlar. Ermənistan da bu yolla getməkdən çəkinməməlidir. Putinin Rusiyası keçmişdir və biz gələcək haqqında düşünməliyik. ABŞ, Fransa, Almaniya ilə birlikdə. Bəli, nəyisə qurban verməlisən. Və təbii ki, biz Ukrayna ilə əlaqələri sürətlə və hərtərəfli inkişaf etdirməliyik. O, indi Rusiyanın dağıdıcısı rolunu oynayır. Hansısa mərhələdə Ermənistan hətta Türkiyə və Azərbaycanla da eyni qayığa düşə bilər. Böyük siyasətdə belə olur. Bu, mümkün olanın sənətidir. Amma bu həm də, siyasi uzaqgörənliyin təzahürüdür. Rusiyanın qaçılmaz məğlubiyyətindən sonra dünyada hər şey başqa cür olacaq. Ermənistan isə istənilən halda Kremlin təzyiqindən qurtularaq, sivil, demokratik Qərbin dəstəyini alaraq güclənəcək. Bunun üçün Türkiyə və Azərbaycan heç də əbədi və tarixi müttəfiq deyil, sadəcə müvəqqəti yoldaşdırlar”. Portal onu da yazır ki, rus qoşunları Ermənistandan çıxarılmalı, ölkə KTMT-ni tərk etməlidir. Dövlət Dumasının MDB işləri üzrə komitəsi sədrinin birinci müavini, ermənipərəst Konstantin Zatulin də iindiki vəziyyətdən narazılıq edir. O bildirir ki, Ermənistan Qərblə münasibətlərdə bal ayını yaşayır, Rusiya ilə aktiv təmasları dondurub. O qeyd edir ki, Ermənistan, xarici işlər naziri Sergey Lavrovun münaqişə zonasına KTMT missiyası göndərmək təklifinə baxmayaraq, öz ərazisində Avropa İttifaqı müşahidəçilərini yerləşdirir. Eyni zamanda, Aİ birbaşa Rusiyanı Cənubi Qafqazda sabitliyin pozulmasında maraqlı olmaqda ittiham edir: “Missiya hərbi deyil. Əvvəldən bu barədə heç bir söz-söhbət olmayıb. Təşəbbüs Rusiya tərəfi ilə razılaşdırılmayıb və görünür, Azərbaycanla da tam razılaşdırılmayıb. Bu təşəbbüsün özü onu göstərir ki, Aİ Ermənistan-Azərbaycan münaqişəsi və onun nəticələrinin həlli istiqamətində səylərdə vasitəçilik təşəbbüsünü ələ keçirməyə və Rusiyanı bu prosesdən sıxışdırıb çıxarmağa çalışır. Eyni zamanda, Rusiya Qarabağda sülhməramlı missiyasını tam şəkildə yerinə yetirməkdə davam edir. Ermənistan rəhbərliyi Qarabağ problemini mahiyyətcə Rusiyanın üzərinə atıb. Öz növbəsində, münaqişə zonasında heç bir öhdəlik daşımayan Qərb faktiki olaraq Ermənistan hakimiyyəti ilə münasibətlərdə bal ayını yaşayır. Söhbət İrəvanın Moskva ilə müttəfiqlikdən imtina etməsindən getmir, amma bildiyimə görə, son vaxtlar Rusiya ilə aktiv təmaslar faktiki olaraq dondurulub”.
Nahid SALAYEV
