Ermənistanda yarım milyon insan aclıqdan əziyyət çəkir. Bu barədə statistik məlumat BMT-nin Ümumdünya Ərzaq Proqramının “Aclıq xəritəsi”ndə yer alıb. Məlumata görə, Ermənistanda 500 min insan qida çatışmazlığı ilə üzləşib.
Qeyd edilir ki, hazırda Ermənistan əhalisinin sayı 3 milyon nəfərdir. Eyni zamanda qeyd edilir ki, son bir ayda qida çatışmazlığından əziyyət çəkənlərin sayı daha 10 min nəfər artıb.
Xəritəyə əsasən, ölkədə 5 yaşa qədər uşaqların təxminən 4,4 faizi kəskin, 9,4 faizi isə xroniki qida çatışmazlığından əziyyət çəkir.
Bu, dünya erməni lobbisinin təsiri əsasında Ermənistana külli miqdarda yardım edilməsi məqsədilə BMT-nin qəbul etdiyi saxta qərar ola bilərmi? Hansı aclıqdan söhbət gedə bilər ki, Ermənistan Hindistandan dəyəri milyardlarla ölçülən silahlar alır? Növbəti erməni hiyləsi saya bilərikmi?
Aydın Quliyev: “Ermənistanda kütləvi aclıq barədə məlumatlara mötəbər baxmıram”
“Bakı-Xəbər” Media Qrupunun rəhbəri Aydın Quliyev hesab edir ki, Ermənistanda "kütləvi aclıqla” bağlı başlanmış beynəlxalq hay-küy dalğasının təsirinə uymazdan öncə onun mahiyyətinə diqqət etmək lazımdır: “BMT-nin Ərzaq Proqramının yaydığı “Aclıq Xəritəsi”nə görə, guya Ermənistanda 500 min adam acından ölmək həddindədir. Bəlkə bu məlumatı BMT kimi mötəbər qurumun yaymasının avtomatik təsirinə uymadan təftişçi nəzərlə yanaşaq? BMT olanda nə olar ki? Məgər erməni lobbisi və diasporun təsiri altında ən mötəbər dünya təşkilatlarında saxta, yalan, qərəzli qərar və hesabatların qəbul etdirildiyini azmı görmüşük? Onlar BMT-ni də öz cənglərinə keçirdə bilməzmi? Ermənilər bütün türk dünyasına qarşı təcavüz siyasəti apardıqları vaxtda həm də özlərinin "yazıq millət"obrazını yaratmırdılarmı?..
Az olub ki, Serj Sarkisyan, Paşinyan BMT-nin baş katiblərinin gözlərinin içinə baxa-baxa BMT prinsiplərini ayaqlayıblar və bircə irad belə eşitməyiblər? Baş katiblər baxa-baxa erməni prezidentlər tribunada demirdilər ki, Azərbaycan "Artsaxa" təcavüz edib? Bunu o təşkilatın baş katibinin düz gözünə deyirdilər ki, həmin təşkilatın ən ali qurumu Azərbaycanın özünün təcavüzə məruz qaldığı barədə düz 4 icrasız qətnamə qəbul edib. Demək, BMT də yanlış edə, təsirə uya bilər. İndi necə inanaq ki, Erənistanda həqiqətən kütləvi aclıq var? Bu necə ac ölkədir ki, Çindən, Hindistandan, Yunanlardan ən müasir silahlar almağın üstündə intensiv işləyir? Bu necə ac ölkədir ki, Rusiya oliqarxiyası son bir neçə ayda öz kapitalları ilə bu ölkəyə axışır? Bu necə ac ölkədir ki, regionun inkişaf və tərəqqi layihələrinə inadla müqavimət göstərir? Ac ölkə belə olur? “Ac oynağan, lüt qudurğan olar" məsəli bu mövzuda qətiyyən işləmir .
Bir sözlə, BMT-nin əli ilə Ermənistanda guya kütləvi aclığı göstərən rəqəmlərin yayılması bir "ümumdünya erməni oyunu" ola bilər. Məqsəd bu ad altında Ermənistan rejiminə ümumdünya yardım kampaniyası başlatmaqdan ibarət ola bilməzmi?..
Mən bütün hallarda Ermənistanda kütləvi aclıq barədə məlumatlara mötəbər baxmıram”.
Abutalıb Səmədov: “Bu bir daha onu göstərir ki, dünyada ermənilərin yaydığı təbliğat hələ də öz işini görür”
Azərbaycan Naminə Alyans Partiyasının sədri Abutalıb Səmədov “Bakı -Xəbər”ə açıqlamasında bildirdi ki, Ermənistanda 500 min adamın acından ölmək həddində olduğu barədə BMT ərzaq proqramının yaydığı hesabatda göstərilənlər obyektiv sayıla bilməz: “Ermənistan hökümətinin rəhbəri təntənə ilə qeyd edir ki, son dövrlər Ermənistan iqtisadiyyatı inkişaf edir. Dövlət büdcəsində hərbi xərclər 1 milyard 200 milyondan artıq nəzərdə tutulur. Bu, əvvəlki dövrlərə nisbətən xeyli çoxdur. Ermənistan Rusiyaya silah almaq üçün pul ödəyir. Baş nazir Paşinyan isə şikayət edir ki, müttəfiqimizə pul vermişik, ancaq silahları onlar təhvil verməyib. Nəzərə almır ki, müttəfiqi Ukraynada hansı vəziyyətə düşüb və imkanı olsa bütün dünyadan silah yığar. Eyni zamanda o da elan olunur ki, Ermənistan Hindistandan 250, bəzən 270 milyon dollarlıq silah almaq barədə müqavilə imzalayıb. Bu vəziyyətdə BMT-nin ərzaq proqramı elan edir ki, guya Ermənistanda 500 min nəfər aclıq həddindədir. Bu bir daha onu göstərir ki, dünyada ermənilərin yaydığı təbliğat hələ də öz işini görür. Özünə hörmət etməyən, sızlamağı, ağlamağı peşə həddinə çatdıran bu qonşularımız dünyanın bu zəifliyini hamıdan əvvəl anlayıblar. Çox təəssüf ki, hələ də ağlamağı bacaranları dünya daha çox eşidir. 30 il Azərbaycanın torpaqlarını işğal edən ermənilərə gözün üstündə qaşın var deyən olmadı. İndi hələ müəyyən olunmamış sərhədlərdə guya Azərbaycanın 45 min kv km “erməni ərazisini” tutması barədə nağıllara dünya inanır. Fransa Senatı Azərbaycana qarşı sanksiyalar hazırlamağa başlayıb. Mən hesab edirəm ki, bu ilk növbədə bizə dərs olmalıdır. Biz kiminlə üz-üzəyik, bunu ilk növbədə siyasətçilər və hamı dərk etməlidir. “Biz niyə Xankəndiyə daxil olub məsələni birdəfəlik qurtarmadıq? ", deyən dırnaqarası siyasətçilər erməni təbliğatının, erməni lobbisinin nəyə qadir olduğunu bir daha düşünməlidirlər. Biz Xankəndiyə girmədik, yalnız BMT-nin Təhlükəsizlik Şurasının 4 qətnaməsini icra etdik. Azərbaycana qarşı törədilən erməni təxribatlarına cavab verməklə kifayətləndik. Ancaq yenə də ermənilər dünyanı üstümüzə qaldırmağa cəhd göstərirlər. Müəyyən qədər də buna nail oldular. BMT Təhlükəsizlik Şurasında sərhəddə baş verən insidentlə bağlı müzakirələrdə olan çıxışlar hamısı yadımdadır. Orada böyük əksəriyyət, günahımız olmadığı halda, Azərbaycanı günahlandırdı. Biz bu reallığı daim nəzərə almalı və bu cür təxribatların, erməni məkrinin qarşısını almaq üçün hamımız birlikdə çalışmalıyıq. Azərbaycan siyasətçisi, özünə azərbaycanlı deyən şəxs ermənilərin yanında yer almamalı, onların təbliğatında yardımçı olmamalıdır”.
Məhəmmədəli QƏRİBLİ
