Ermənistan xarici işlər naziri Ararat Mirzoyan İranın Təbriz şəhərində Baş Konsulluq açmaq niyyətində olduqlarını bildirib. A.Mirzoyan bu barədə Qafanda İran Baş Konsulluğunun açılış mərasimində açıqlama verib.
Əvvəlcə onu vurğulayaq ki, Azərbaycanın mənəvi paytaxtı Təbrizdə Ermənistanın Baş Konsulluq açmaq niyyəti xüsusi məkrli siyasi plandır. Onlar Baş Konsulluq açmaq istəyirlərsə, niyə Azərbaycan şəhərini seçirlər, gedib elə Tehranda açsınlar. Məlum olduğu kimi, vaxtilə Təbrizdə Azərbaycan Konsulluğunun açılması ilə bağlı məsələ uzun müddət gerçəkləşmədi. Yəni Ermənistandan fərqli olaraq, Azərbaycanın bu istəyinə gec reaksiya verildi. Söhbət keçən əsrin 90-cı illərinin ortalarında Azərbaycanın Təbrizdə konsulluq açmaq təşəbbüslərindən gedir ki, Azərbaycana bunun üçün çox çətinliklə imkan, icazə verilib, özü də alayarımçıq. Yəni sonradan İran hökuməti buna razılıq versə də, uzun illər bizim Təbrizdəki konsulluğumuza bina vermədilər. Azərbaycanın Təbrizdəki Konsulu gedib Tehranda səfirliyimizdə otururdu. Bizim neçə illər konsulumuz oldu, amma Təbrizdə oturmadı. Amma indi Ermənistana qucaq açırlar ki, gəlin Təbrizdə Baş Konsulluq açın. Yəni İran Təbrizdə Azərbaycan konsulluğuna uzun illər mane oldu, amma indi Təbrizdə erməni konsulluğunu həvəslə açır.
“Təbriz şəhərində Ermənistanın Baş Konsulluğunun açılması ilə bağlı fikirlər Azərbaycanda qıcıq yaratmaq məqsədi daşıyır”
Siyasi ekspert Rövşən Rəsulov “Bakı-Xəbər”ə şərhində təəssüflə bildirdi ki, İranın Azərbaycana münasibətində hansısa yenilikdən, inkişaf dinamikasından, qarşılıqlı münasibətlər fonundakı müsbət amillərdən danışmaq olmur. O qeyd etdi ki, xüsusən də son dövrlərdə, Vətən müharibəsi zamanı, ondan əvvəl və sonra İranın Azərbaycana qarşı olan bütün davranışları göz önündədir. “Bu davranışların da hər birinin arxasında ermənilərə dəstək dayanır. Onların əsas işi işğalçılara həm silah-sursat, həm də digər vasitələrlə kömək göstərməkdir. Bildiyimiz kimi, bu yaxınlarda Qərbi Azərbaycanın qədim şəhərlərindən biri olan Qafanda İranın Konsulluğu açıldı. Eyni zamanda, Ararat Mirzoyan bəyan etdi ki, Ermənistan Təbriz şəhərində Baş Konsulluq açmaq niyyətindədir. Bu, İran tərəfindən çox müsbət qarşılandı. Lakin Təbrizdə Ermənistanın baş Konsulluğunun açılması bilavasitə Azərbaycanın əleyhinə atılan növbəti müştərək addımdır. Çünki burada fars şovinstləri ilə erməni millətçilərinin, revanşistlərinin bir sıra məkrli fikirləri üst-üstə düşür. Məhz Təbriz şəhərində Ermənistanın Baş Konsulluğunun açılması ilə bağlı fikirlər Azərbaycanda qıcıq yaratmaq məqsədi daşıyır. Təbii ki, İran öz ərazisində hansısa ölkənin konsulluğunu aça bilərdi. Məsələn, Ararat Mirzoyan deyə bilərdi ki, Rəşt şəhərində, yaxud başqa bir şəhərdə Ermənistanın Baş Konsulluğunu açmaq fikirləri var. Niyə məhz Təbriz? Sual yaranır ki, nə üçün İran hökuməti Ermənistanın Təbrizdə Baş Konsulluq açmasını şadlıqla qarşılayır, amma vaxtilə Azərbaycana ciddi süni əngəllər yaradırdı? Bizim çoxminli soydaşlarımız əsasən Təbriz şəhərində yaşayır, burada Azərbaycan konsulluğunun fəaliyyətinə böyük şərait yaradılmalı idi, amma biz əksini gördük. Bu gün İranın və Ermənistanın bu məkrli planı açıq-aşkar Azərbaycana meydan oxumaq niyyəti daşıyır. Mirzoyan deyir, İran bunu məmnunluqla qarşılayır, amma görək Təbrizdə Ermənistanın Baş Konsulluğu açılasa da, fəaliyyət göstərə biləcəkmi? Yəni İran hökuməti konsulluğa ərazi, bər-bəzəkli bina verə bilər, amma Təbrizdəki narazı kəsim, milli-azadlıq mübarizəsi aparan azərbaycanlılar o binanı yerlə-yeksan edəcəklər. Təbrizlilər Ermənistanın Baş Konsulluğunun fəaliyyət göstərməsinə belə icazə verməzlər”.
R.Rəsulov xatırlatdı ki, bu günlərdə İrəvanda İran vətəndaşı (onun hansı millətə mənsub olduğu hələlik bəlli deyil) İranın səfirliyini partlatmaq istəyib. R.Rəsulovun sözlərinə görə, bu halda Təbrizdə Ermənistanın hər hansı bir konsulluğu fəaliyyət göstərə bilərmi? Siyasi ekspertə görə, bunu təsəvvür etmək çətindir. R.Rəsulovun fikrincə, soydaşlarımız orada Ermənistanın bu şəkildə əl-qol açmasına imkan verməz. “Digər tərəfdən, artıq ox yaydan çıxıb. İran açıq şəkildə öz kirli niyyətini ortaya qoyub. Bu kirli niyyətini realizə etmək istəyir. Lakin onun bu niyyətləri öz başında çatlayacaq. Azərbaycan 30 il bundan əvvəlki Azərbaycan deyil. O, regionda, eləcə də dünyada öz sözünü deyən ölkədir, müstəqil siyasət yürüdür və siyasəti heç bir ölkə, heç bir siyasi dairə aradan qladırmaq gücündə, qüdrətində deyil. Bu gün Azərbaycan regionda yeni çağırışlar edir, regionun inkişafı və sülhün bərqərar olması üçün lazım olan bütün addımları atır. Ölkəmizə qarşı atılacaq hər hansı bir addım, qoyulacaq baryer darmadağın ediləcək. İran unutmamalıdır ki, bu gün onun ərazisində 35 milyon azərbaycanlı yaşayır. Bu 35 milyon da hələ tam ayağa qalxmayıb. Təsəvvürünüzə gətirin, soydaşlarımız tam ayağa qalxsalar nə olacaq. Bu baxımdan, Ermənistanın kukla xarici işlər naziri Mirzoyan hansısa bir fonda danışa bilər, lakin o danışarkən ağzına ağızlıq məhz Azərbaycan tərəfindən vurulacaq. Bunu da fars şovinistləri və erməni revanşistləri unutmamalıdır”-deyə R.Rəsulov qeyd etdi.
İradə SARIYEVA
