İran Qafanda konsulluq açan kimi, Zəngəzurdakı ermənilərə müdafiə vəd edib. Belə ki, yeni konsul Qafan şəhərində bəyan edib ki, İran Zəngəzurdakı ermənilərə müdafiə vəd edir və bu səbəbdən ermənilər narahat olmasın. Qafanda konsulluğun açılış mərasimində İran və Ermənistanın xarici işlər nazirləri iştirak edib.
News.am saytının “Konsul Azərbaycanla sərhəddən 2 kilometr aralıda “daim qorxu atmosferində” yaşayan Sünik sakinləri haqqında nə düşünür?” sualının cavabında konsul Mortez Varamin deyib: “Qafan sakinlərinə narahat olmamağı tövsiyə edirəm, biz erməni xalqından ötrü buradayıq”.
Bundan əvvəl İrəvanda brifinqdə İranın xarici işlər naziri Abdullahiyan bir daha təkrarlayıb ki, İran Ermənistanın sərhədlərinin dəyişdirilməsinə imkan verməyəcək.
Məlumat üçün qeyd edək ki, Qafanda (İranla sərhəddən 60 kilometr aralı) İran diasporu və ya İranın biznes maraqları yoxdur. Adətən konsulluq sözügedən iki amilə görə açılır. Görünür, iranlıların yeganə məqsədi Azərbaycanın sərhəddəki hərəkətlərinə görə casusluq etmək olacaq. Konsul Mortez Varaminin açıqlaması Fransa prezidenti Emmanuel Makronun ermənipərəstliyini belə kölgədə qoydu. Makron bir həftə əvvəl demişdi ki, Ermənistanı tək qoymayacağıq. Açıq dedi ki, Ermənistanı Türkiyədən, Rusiyadan və Azərbaycandan qoruyacağıq. Konsul erməniləri konkret kimdən qoruyacaqlarını deməsə də, bütövlükdə ermənilərə qahmar çıxdı. Xristian Fransanı belə arxada qoydu.
Məsələyə münasibət bildirən ekspert Azər Həsrətin sözlərinə görə, bütün bunlar onu göstərir ki, İran xain dövlətdir: “Əvvəla, konsul Mortez Varamin öz vəzifələrini bilmir. Konsulun vəzifəsi olduğu ölkədə hansısa yerli xalqı kimdənsə qorumaq deyil. Onun işi sadəcə olaraq özünün ölkəsinin vətəndaşları ilə bağlı müəyyən birokratik məsələlərin həlli ilə məşğul olmaqdır. Bundan artıq konsulun edə biləcəyi bir şey yoxdur. Bütün bunlar bir daha onu göstərir ki, İran diplomatiyası naşıdır. Ümumiyyətlə, dünya diplomatiyasından bunlar xəbərsizdirlər. İkinci bir tərəfdən, İranın olmur, kimin konsulluğu olursa-olsun Azərbaycanın o əraziyə hücum etmək planı yoxdur. Başqa bir tərəfdən o ərazidən Azərbaycana hücum edilərsə, ölkəmiz buna hərbi güclə cavab verəcək. Çünki bu, Azərbaycanın hüququdur. Ümumiyyətlə, İranın bu ritorikası anlaşılan deyil. Bütün bunlar ondan xəbər verir ki, İran xain dövlətdir. Adətən xain dövlətlər hər zaman xoflu olurlar. Molla rejimi Fransadan çox Azərbaycana qarşıdır. Halbuki, Azərbaycanın ümumiyyətlə, İranla münasibətləri pozmaq fikiri yoxdur. Ancaq belə anlaşılır ki, İran erməniləri müdafiə edəcəyini deməklə əslində iki ölkə arasında münasibətlərin normallaşmasında maraqlı deyil. İran istəmir ki, Azərbaycanla Ermənistanın münasibətləri normallaşın. Ermənilər İranın siyasətinin əsil mahiyyətini bilmədikləri üçün molla rejiminə alət olurlar. Elə bilirlər ki, İran erməniləri azərbaycanlılardan qorumaq üçün oradadır. Əslində isə, elə deyil. Tehranın məqsədi Ermənistanın Azərbaycan və Türkiyə ilə münasibətlərinin düzəlməsini əngəlləməkdir. Bundan da ən çox əziyyəti çəkəcək xalq ermənilərdir. O üzdən, hesab edirəm ki, İranın bu fitnəsinə uymaqla Ermənistan özünə böyük zərbə vurdu. Digər tərəfdən, İran bizə müsəlman qardaş dediyi halda Azərbaycan ərazilərini işğal edən Ermənistana bu qədər açıq mesajlarla dəstək verməklə, İslamdan uzaq olduğunu göstərdi. Ona görə də Azərbaycanda İrana rəğbət göstərənlər bütün bunlardan sonra düşünməlidirlər. Əfsuslar olsun ki, ölkəmizdə müəyyən kəsim var onların gözü hələ açılmayıb. İndi İranın işğalçı Ermənistana necə qucaq açdığını görüb bunlardan bir nəticə çıxarsınlar”.
Vidadi ORDAHALLI
