Türkiyə Prezidenti Rəcəb Tayyib Ərdoğan beynəlxalq təşkilatları Cəbrayıldakı erməni vandallığını görməzdən gəldiklərinə görə tənqid edib. Bu barədə Türkiyə Prezidenti oktyabrın 20-də Cəbrayıl şəhərində Azərbaycan Prezidenti İlham Əliyevlə mətbuata birgə bəyanatlarla çıxışı zamanı danışıb.
Dövlət başçısı bildirib ki, işğaldan azad edilən qədim Azərbaycanın ərazisində ikinci hava limanının açılışına qatılmaq və sıxıntılı dövrdən sonra müasir tələblərə cavab verən belə limanın açılması hər ölkənin edə biləcəyi iş deyil: "Sağıma, soluma baxıram. Gör işğal dövründə Cəbrayılı nə hala gətiriblər?! Qardaşıma sual verdim və dedim ki, aidiyyəti beynəlxalq təşkilatlar gəlib bu mənzərəni heç görmədimi? Yox, gəlmirlər dedi. Niyə gəlmirlər, çünki öz üzqaralarını, Qərbin etdiklərini görəcəklər. Çünki dəstək verdikləri Ermənistanın işğal müddəti içərisində Cəbrayılı, digər bütün Qarabağı nə hala saldıqlarını görəcəklər. Təbii ki, bütün bunları görmək istəmirlər. Əslində, onlar nələr edildiyini bilirlər. Ona görə də baş verənlərin təzminatını tələb etmək lazımdır. Bununla da onları dalana dirəmək lazımdır".
Qərb-Ermənistan tandemini işfşa etmək baxımından Ərdoğanın bu açıqlamasını necə dəyərləndirmək olar?
Hüquqşunas Mehman Muradlı “Bakı -Xəbər”ə açıqlamasında bildirdi ki, bu məsələyə həm hüquqi, həm də siyasi qiymət verilməlidir: “Erməni vandalizminin Cəbrayılda aşkar olunan növbəti nümunəsi bir daha onu deməyə əsas verir ki, erməni barbarlığına lazımi qiymət vermək üçün artıq beynəlxalq qurumlar hərəkətə keçməlidir.
Azərbaycan qəbiristanlığını dağıtmaqla, bizə aid olan maddi-mənəvi dəyərləri məhv etməklə o torpaqların əsl sahiblərini unutdurmaq mümkün deyil. Qarabağ bizə aiddir və biz 44 günlük Vətən müharibəsində canımız-qanımız bahasına bunu sübut etdik. Təəssüfləndirici məqam var ki, biz dəfələrlə belə faktları beynəlxalq qurumlara göstərsək də, sübüt etsək də, əməli addımlar atılmır. Əlbəttə, bu addımlardan nəticə çıxararaq YUNESKO kimi qurumlar hərəkətə keçməli və bizim digər tarixi abidələrimizlə bağlı da araşdırma aparmaqla vandalizmin qarşısını almalıdırlar.
Amma YUNESKO kimi mötəbər təşkilatın bu məsələlərə biganə münasibəti onlara imkan verir ki, mədəni irsimizə qarşı vandallığı davam etdirsinlər”.
Hüquqşunasın sözlərinə görə, nəinki erməni silahlı birləşmələri, hətta mülki ermənilər də Azərbaycanın mədəni-tarixi irsinə düşmən münasibət sərgiləyirlər: "Ermənilər Azərbaycan xalqına qarşı müharibə cinayətlərində, vandalizm hərəkətlərində daim iştirak ediblər. Birinci Qarabağ müharibəsində erməni vəhşiləri xalqımıza qarşı soyqırımlar, qətliamlar, dəhşətli cinayətlər, terror aktları törədiblər. Azərbaycan tarixinə, mədəni irsimizə, milli-mənəvi dəyərlərimizə çirkin hücumlar ediblər. Hər zaman çalışıblar ki, xalqımızın həmin torpaqlarda əsrlər boyu yaşadığına dair bütün tarixi izləri yox etsinlər. Türkiyə prezidenti çox doğru olaraq Qərbin bu məsələdəki ikili standartını ifşa etdi. Bütün bunlara baxmayaraq erməni cinayətlərini sistemli şəkildə bir yerə toplamaq, sübut və dəlillərlə beynəlxalq məhkəmələrə, Haaqa və İnsan Haqları üzrə Avropa Məhkəməsinə müraciət etmək lazımdır”.
Məhəmmədəli QƏRİBLİ
