İranın Ermənistanın Qərbi Zəngəzur mahalında Baş Konsulluğu açılır. Bu barədə Ermənistan XİN məlumat yayıb. Bildirilib ki, 21 oktyabrda baş tutacaq açılış mərasimində İran XİN başçısı Hüseyn Əmir Abdullahian və erməni həmkarı Ararat Mirzoyan iştirak edəcək.
Qeyd edək ki, Zəngilanda Beynəlxalq Hava limanının açılışında qardaş Türkiyənin lideri R.T.Ərdoğan şəxsən iştirak edəndən sonra İranın XİN rəhbəri Abdullahian da İrəvana səfər edib.
Zəngilan hava limanının açılışı, Türkiyə dövlət başçısının tədbirdə iştirakından sonra İranın bu addımları təsadüfdür, yoxsa hansısa sətiraltı mesaj?
Cümhuriyyət Xalq Partiyasının sədri Bədrəddin Quliyev “Bakı-Xəbər”ə bildirdi ki, İranın açıq şəkildə Ermənistanı dəstəkləmısi tarixi irsə söykənən bir prosesdir: “Uzun illər farslar ermənilərdən xəyanətlər törətmək məqdədilə istifadə ediblər. Ermənilərə bu dəstəyi verməklə dünya erməni lobbisinin rəğbətini qazanırlar və onların lobbiçiliyi ilə Qərb və ABŞ-la gizli danışıqlar aparırlar. Ermənistan üzərində ofşor şirkətlər açıb öz alverlərini edirlər. İşğal dönəmində İranın tranzit əhəmiyyəti artmışdı. Hətta Aşqabaddan Məşhədə dəmiryolu da çəkildi. İndi görür ki, fərqli mənzərə yaranacaq. Ona görə də, Ermənistanla sərhədi İran özünün “qırmızı xətti” elan edib. Çox maraqlıdır, görəsən 30 ildə həmin sərhədlər nəzarətsiz qalanda “qırmızı xətt” hardaydı? Ermənistanı blokadadan çıxarıb nəfəslik verən də onlar olub. Ərdoğanın regiona səfəri, hava limanının açılışı onları dərindən narahat edib. Azərbaycan 2 ildən qısa müddətdə işğaldan azad olunan ərazilərimizdə ikinci beynəlxalq hava limanını istifadəyə verdi. Bu, ölkəmizin gücünü göstərməklə yanaşı, Qarabağ və Şərqi Zəngəzurun intensiv bərpa olunduğundan və eləcə də həmin bölgələrdə təhlükəsizlik tədbirlərinin daha da gücləndirildiyindən xəbər verir. Türkiyə Prezidenti Rəcəb Tayyib Ərdoğanın təyyarəsi ikinci dəfə azad Qarabağa eniş etdi. Qardaş ölkənin rəhbəri Azərbaycan Prezidenti İlham Əliyevlə birlikdə Zəngilan Beynəlxalq Hava Limanının açılışında iştirak etdi. Regionda baş verən iqtisadi və geosiyasi dəyişikliklər işğaldan azad olunan ərazilərimizdə 3 hava limanına niyə ehtiyacın olduğunu bir daha təsdiq etdi. Zəngilan iqtisadi və turizm baxımından böyük potensiala malik rayondur. Zəngilan Hava Limanı yaxın gələcəkdə istifadəyə veriləcək və Zəngəzur dəhlizinə inteqrasiya olunacaq. İran bununla, güya Zəngəzur dəhlizinə təzyiqini göstərir və Ermənistanı öz müttəfiqi kimi nümayiş etdirir. Düşmənimin düşməni mənim dostumdur prinsipi ilə hərəkət edir. Zəngəzurda konsulluğu açmaq da bu məqsədə xidmət edir. Butün bunlar antitürk layihələridi. İran öz daxilindəki gərginliyi nizama salmaq əvəzinə, gəlib bu regionda ara qarışdırır”.
Bununla yanaşı, İsrailin Ermənistanda ticarət varlığını gücləndirməsi də İran rəhbərliyini narahat edir. İsrail Qərbi Zəngəzurda – Ermənistanın Sünik vilayətində ticarət obyektləri tikməyi planlaşdır. Bu da İranı narahat edir. İran Qafanda konsulluq açmaqla İsrailin bu regionda iqtisadi və ticarət fəaliyyətinə nəzarət etməyə çalışacaq. Digər bir məsələ isə, İranın Qafandakı Baş konsulluğu vasitəsilə Azərbaycan ərazisindən keçən Qafan-Gorus yolunda öz ticarət maraqlarını yönləndirmək istəyidir”.
Məhəmmədəli QƏRİBLİ
