“Naxçıvanı Azərbaycanın qərb rayonları ilə birləşdirəcək Zəngəzur dəhlizi ilə bağlı bəzi dairələrdəki qorxu və narahatlıq reallıqdan uzaqdır. Qarabağda atılan bütün bu addımlardan sonra belə bir qorxuya ehtiyac yoxdur”. Bu barədə Türkiyə Prezidenti Rəcəb Tayyib Ərdoğan Cəbrayıl şəhərində mətbuata bəyanatında bildirib.
Türkiyə Prezidenti bildirib ki, Azərbaycan əmin addımlarla yoluna davam edir: “Bu yol bölgənin sülh, əminamanlıq və sabitliyinə töhfə verəcəyi kimi, Xəzərdən keçməklə Şərq-Qərb Orta Dəhlizi marşrutu üzərində yerləşən bütün ölkələr üçün ticarət və sərmayə imkanları təqdim edəcək”.
Azərbaycanın 44 günlük Vətən müharibəsində öz torpaqlarını işğaldan azad etdiyini, otuz il verilməyən haqqını geri aldığını vurğulayan Prezident Rəcəb Tayyib Ərdoğan deyib: “Ermənistan ilə müzakirələrdə səmimi addımlar atan və müsbət təkliflər irəli sürən Azərbaycan əsas hədəfinin davamlı sülh, firavanlıq və sabitlik olduğunu ortaya qoyub. Hər zaman söylədiyim kimi, sülhün uduzanı olmaz. Yeganə məqsədimiz bölgəmizin firavan gələcəyini inşa etməkdir. Azərbaycan-Ermənistan və Türkiyə-Ermənistan normallaşma prosesləri bir-birini dəstəkləyəcək şəkildə irəliləməkdədir. Açılan bu fürsət pəncərəsini yaxşı dəyərləndirmək lazımdır”.
Ərdoğan bununla əslində İranın Zəngəzur dəhlizi ilə bağlı sərgilədiyi mövqeyə sətiraltı və dolayı olaraq mesaj vermiş oldu. Yəni bildirdi ki, İranın bununla bağlı yaratmaq istədiyi xofun heç bir əsası yoxdur.
“Zəngəzur dəhlizi təkcə region üçün deyil, Avropa və dünya üçün böyük əhəmiyyətə malikdir”
Məsələyə münasibət bildirən “İki sahil” qəzetinin baş redaktoru Vüqar Rəhimzadənin fikrincə, Ərdoğan Zəngəzurla bağlı nəinki İrana, dəhlizə qarşı olan digər tərəflərə də xəbərdarlıq etdi: “Bəyan etdi ki, Zəngəzurla bağlı bəd düşüncələrə qapılmağın heç bir əsası yoxdur. Ona görə də, bu həm İrana, həm də buna qarşı olan digər dövlətlərə bir mesaj idi. Çünki Zəngəzur dəhlizi açılacaq və İran bunun əngəlləyə bilməyəcək. O üzdən, İranın bununla bağlı hərbi təlimlər keçirib əzələ nümayiş etdirməsinin heç bir mənası yoxdur. Bunu nə qədər tez anlasalar o qədər yaxşıdır. Çünki Zəngəzur dəhlizi təkcə region üçün deyil, Avropa və dünya üçün böyük əhəmiyyətə malikdir. Belə bir meqa layihənin qarşısını İran ala bilməz. Ona görə ki, bu kifayət qədər böyük önəm kəsb edən bir dəhlizdir. Bu baxımdan hesab edirəm ki, Ərdoğanın məlum fikirləri çox dəqiq və hədəfə ünvanlanmış bir mesajdır. O üzdən, bəlli dairələr bundan ciddi nəticə çıxarmalıdır”.
V.Rəhimzadə hesab edir ki, xüsusilə İran özünü yığışdırmalıdır.
Vidadi ORDAHALLI
