“Türkiyə-Azərbaycan birliyi bölgədə çox önəmli bir amildir”. Bunu Prezident İlham Əliyev oktyabrın 20-də Cəbrayılda Türkiyə Prezidenti Rəcəb Tayyib Ərdoğanla birgə mətbuata bəyanatla çıxışı zamanı deyib.
Ölkə başçısının sözlərinə görə, İkinci Qarabağ savaşı, savaşdan sonrakı dövr Azərbaycan-Türkiyə birliyini daha da gücləndirdi: “Türkiyə kimi qüdrətli ölkə bizim qardaşımızdır, bu bizim üçün böyük xoşbəxtlikdir. İkinci Qarabağ savaşı, savaşdan sonrakı dövr bu birliyi daha da gücləndirdi. Keçən il biz Şuşada Şuşa Bəyannaməsini imzaladıq və Türkiyə və Azərbaycan rəsmən müttəfiq oldu. Bütün sahələrdə müttəfiq oldu və bu həm xalqlarımıza ciddi gözaydınlığıdır, eyni zamanda, bölgəyə və dünyaya ciddi mesajdır. Çünki Türkiyə-Azərbaycan birliyi bölgədə çox önəmli bir amildir. Bu, sülh, sabitlik amilidir. Ancaq eyni zamanda, əgər kimsə yenə də bizə qarşı ədalətsiz hərəkət etmək istəsə, əlbəttə ki, bu amili ciddi nəzərə almalıdır”.
Görünən odur ki, Prezident İlham Əliyev Şuşa Bəyannaməsinə xüsusi önəm verir. Bəyannamə Azərbaycanın təhlükəsizliyinin təmin olunmasında qarant rolunu oynayır.
“Bu o deməkdir ki, Azərbaycanın çox güclü təhlükəsizlik çətiri var”
Məsələyə münasibət bildirən Yeni Yol Partiyasının sədri Ramil Hüseynovun fikrincə, Prezidentin məlum açıqlaması bir çox dövlətlərə ciddi mesajdır: “Yəni Azərbaycanın ciddi müttəfiqi var və bütün tərəflər bunu nəzərə almalıdır. İkinci Qarabağ müharibəsi vaxtı Azərbaycanla Türkiyə arasında müttəfiqliq sazişi yox idi. Ancaq müharibə başlayan gündən Türkiyə Azərbaycanın yanında oldu. Bu, müharibə bitənə qədər və ondan sonra da davam etdi. Türkiyənin həmin vaxt sərgilədiyi qəti mövqe imkan vermədi ki, 44 günlük müharibə vaxtı hansısa dövlət prosesə müdaxilə etsin. Şuşa Bəyannaməsindən sonra isə iki ölkə arasında müttəfiqlik münasibətləri rəsmiləşdirildi. Bu o deməkdir ki, Azərbaycanın çox güclü təhlükəsizlik çətiri var. Nəinki Ermənistan, digər hansısa dövlət də Azərbaycanı təhdid edərsə, qarşısında Türkiyəni görəcək. Özü də tərəflər arasında imzalanan sazişə dayanaraq gərəkən addımları atacaq. Çünki Türkiyə Azərbaycanın təhlükəsizliyinin qarantı rolunda çıxış edir. Türkiyənin də hərbi baxımdan necə güclü dövlət olduğunu geniş izah etməyə ehtiyac yoxdur. Ən azından ona görə ki, Türkiyə NATO-da ikinci böyük orduya malikdir. Türkiyə ordusu ciddi döyüş təcrübəsinə sahibdir. Bütün bu və digər məsələlər çox önəmli faktorlardır. Ona görə də Azərbaycana düşmən gözü ilə baxanlar bunu nəzərə almalıdır”.
Vidadi ORDAHALLI
