İran Ermənistanla əlaqənin kəsilməsinə imkan verməyəcək. Bunu İranın xarici işlər naziri Hüseyn Əmir Abdullahian deyib.
O bildirib ki, İran Ermənistanla əlaqənin kəsilməsinin qarşısını alacaq. Onun sözlərinə görə, bu məqsədə çatmaq üçün İran İslam Respublikası da bölgədə hərbi təlimlər keçirir.
“İran Ermənistanla əlaqə yolunun bağlanmasına imkan verməyəcək. Və bu məqsədlə İran İslam Respublikası, digər məsələlərlə yanaşı, bu regionda hərbi təlimlərə başlayıb”, - deyə Abdullahian Azərbaycan və Ermənistan arasında sərhəd münaqişəsi ilə bağlı regiondakı vəziyyəti şərh edib.
Qeyd edək ki, İİKK ölkənin şimal-qərbində Azərbaycanla sərhəddə genişmiqyaslı təlimlər keçirir. Bütün bunlar bir daha onu göstərir ki, İranın Azərbaycanla bağlı qərəzi bitmək bilmir. Bununla İran rəsmisi təlimlərin əsas hədəfini aydın şəkildə göstərmiş oldu. Açıq deyirlər ki, Azərbaycanın Zəngəzurla bağlı planlarının reallaşmasına qarşı çıxacaqlar.
“İran Turan birliyinin yaranmasından çox ehtiyat edir və o birliyi birləşdirən yol Zəngəzurdan keçəcək”
Məsələyə münasibət bildirən Demokratik Dəyişim Partiyası Təşkilat Komitəsinin sədri Əli Mustafayevin fikrincə, Tehranın bu dərəcədə narahat olması və Azərbaycanı hədəf göstərməsi bir sıra məsələlərdən qaynaqlanır: “Bunun başlıca səbəbi Zəngəzur dəhlizi ilə bağlıdır. Məsələ ondadır ki, Zəngəzur dəhlizinin açılması Azərbaycanın Naxçıvan və Türkiyə ilə əlaqələrini sürətləndirəcək. Eyni zamanda bu, İran-Ermənistan gizli əlaqələrinə nəzarəti təmin edəcək. Çünki İran həmin ərazidən Ermənistana silah və digər məhsullar daşıyır. Zəngəzur dəhlizi işə düşəndən sonra istər-istəməz buna nəzarət olacaq. Qanunsuz ticarətin qarşısı alınacaq. Necə deyərlər, İran-Ermənistan qardaşlığı gözümüzün önündə olacaq. İran müsəlman, şiə təəssübkeşi kimi ifşa olunacaq. İranın narahatlığı tək bununla bağlı deyil. Digər məsələlərin də burada rolu var. Məsələ ondadır ki, Zəngəzur dəhlizi işə düşəndən sonra daşımalar əsasən bu yolla həyata keçiriləcək. Ona görə ki, bu yol daha qısa və əlverişlidir. İran həm də buna görə narahatdır. Türkiyə ilə Orta Asiya arasında ticarət əlaqələri bu yolla reallaşacaq. Nəticədə İrandan asılılıq əhəmiyyətli dərəcədə azalacaq. Başqa bir tərəfdən, İranda illərdir gizli antitürk, anti-Azərbaycan ovqatı var. İranın Azərbaycana qarşı təhdidləri həm də buradan qaynaqlanır. Ona görə də bütün vasitələrlə Ermənistanı qorumağa çalışırlar. Çünki İran Turan birliyinin yaranmasından çox ehtiyat edir və o birliyi birləşdirən yol Zəngəzurdan keçəcək. İran xarici işlər naziri Hüseyn Əmir Abdullahianın narahatlığı həm də buradan qaynaqlanır”.
Ancaq bütün bunlara rəğmən, Əli Mustafayev hesab edir ki, İran öz məqsədinə çata bilməyəcək.
Vidadi ORDAHALLI
