Ermənistanın baş naziri Nikol Paşinyan bir daha bəyan edib ki, sərhəd keçid məntəqələri ilə bağlı onların mövqeyi dəyişməyəcək.
O, bununla bağlı Tvitter hesabında paylaşımında qeyd edib ki, kimsə onları öhdəliklərdən yayınmaqda ittiham edə bilməz: “Heç kim Ermənistanı öhdəliklərindən yayınmaqda ittiham edə bilməz. Yenə deyirəm ki, biz öhdəliklərimizi yerinə yetirmək üçün 3 nəzarət-buraxılış məntəqəsi açmağa hazırıq və regionun blokadasının hərtərəfli açılmasından yaranan imkanlardan istifadə etməyə çalışacağıq”.
Qeyd edək ki, bu günlərdə Paşinyan Azərbaycandan cavab gözlədiyini demişdi. Hələ avqustun 4-də hökumətin iclasında Paşinyan bəyan etmişdi ki, Ermənistan Azərbaycanın qərb rayonları ilə Naxçıvan arasında əlaqəni bu gün də təmin etməyə hazırdır, lakin Azərbaycan Ermənistanın verdiyi imkandan istifadə etmir. O, Ermənistan qanunvericiliyi ilə müəyyən edilmiş qaydada Ermənistan sərhədini keçərək Naxçıvana getməyə çağırmışdı.
Avqustun 18-də Ermənistan Milli Təhlükəsizlik Şurası insanların, malların və nəqliyyat vasitələrinin keçidinin təşkili və həyata keçirilməsi üçün Ermənistan-Azərbaycan sərhədində nəzarət-buraxılış məntəqəsinin yaradılmasını təklif edən layihəni dərc edib. Nəzarət-buraxılış məntəqələrinin yerinə gəlincə, Ermənistan Kəlbəcər rayonu ilə sərhəddə “Zod”, Sədərək rayonu ilə sərhəddə “Arazdəyən” və Qubadlı rayonu ilə sərhəddə “Eyvazlı” nəzarət-buraxılış məntəqələrinin yaradılmasını təklif edib. Azərbaycan isə Naxçıvanla əlaqəni Zəngəzur dəhlizi vasitəsilə qurmağı hədəfləyib və bu istiqamətdə danışıqlar aparır. Ancaq Paşinyanın son açıqlaması onu göstərir ki, Ermənistan xoşluqla Zəngəzur dəhlizini açmaq istəmir.
“Ermənistan xoşluqla dəhlizi açmasa, zor gücü ilə bunu edəcəyik”
Məsələyə münasibət bildirən hərbi ekspert Ramil Məmmədlinin fikrincə, Paşinyan ard-arda belə açıqlamalar verməklə regionda vəziyyəti gərginləşdirmək istəyir: “Paşinyanın nə deməsindən asılı olmayaraq Zəngəzur dəhlizi açılacaq. Çünki 44 günlük Vətən müharibəsindən sonra regionda geosiyasi proseslər buna doğru gedir. Paşinyan bunun qarşısını ala bilməyəcək. Prezident İlham Əliyev çıxışlarının birində qeyd etdi ki, Ermənistan xoşluqla dəhlizi açmasa, zor gücü ilə bunu edəcəyik. Bu çox ciddi mesajdır. Nəzərə almaq lazımdır ki, 10 noyabr Bəyannaməsində Naxçıvana maneəsiz gediş-gəlişin təmin olunması öz əksini tapıb. Maneəsiz gediş-gəliş də yalnız Zəngəzur dəhlizi sayəsində mümkündür. Necə ki, Laçın yolu ilə maneəsiz şəkildə Ermənistandan Qarabağa gediş-gəliş təmin olunub, bənzər təminat bizim üçün də olmalıdır. Olmayacaqsa, o zaman Laçından keçən yola nəzarət postu qoyulacaq”.
Vidadi ORDAHALLI
