“Yunanıstan Cənub Qaz Dəhlizinin genişləndirilməsini tam dəstəkləyir”. Bunu Trend-ə Yunanıstanın Azərbaycandakı səfiri Nikolaos Piperiqkos deyib: “Azərbaycanla Aİ arasında Avropaya qaz tədarükünün iki dəfə artırılması barədə anlaşma memorandumu çərçivəsində biz Azərbaycanla enerji sektorunda əməkdaşlığımızın genişlənməsini səbrsizliklə gözləyirik. Biz bununla bağlı bütün imkanlara müsbət yanaşırıq”.
Səfir əlavə edib ki, Trans-Adriatik qaz xəttinin (TAP) tərkib hissəsi olan Yunanıstan-Bolqarıstan interkonnektoru (IGB) daha çox sayda Avropa ölkəsini vahid enerji sisteminə bağlayıb. “Əlbəttə ki, biz gələcəkdə tədarükün artırılması imkanlarını nəzərdən keçirəcəyik", - səfir deyib.
Yunanıstan Ermənistanla hər cür münasibət qurub, çox isti təmasları, bir-birinə siyasi dəstəkləri var. Yunanıstan açıq şəkildə Ermənistana dəstək verir. Bir müddət əvvəl Yunanıstanın baş naziri Ermənistanda səfərdə idi və ordan Azərbaycanın əleyhinə bəyanatlar verdi. Bütün bunlardan sonra onların Azərbaycandan daha çox qaz almaq istəklərinə Azərbaycan nə dərəcədə şərait yaratmalıdır? Onlar siyasətlərini dəyişməmiş nəyə görə Azərbaycandan artıq qaz almalıdırlar?
“Biz iki dəfə qaz tədarükünü artıranda bu heç də o anlama gəlmir ki, Yunanıstana qaz tədarükü iki dəfə artır”
Liberal İqtisadçılar Mərkəzinin rəhbəri Akif Nəsirli “Bakı-Xəbər”ə şərhində bildirdi ki, əvvəla, ayrı-ayrı şəxslərin münasibətləri ilə dövlətin münasibətlərini eyniləşdirmək olmaz. “Məsələyə şəxslərin simasında baxanda düşünürsən ki, o sənin düşməninlə dostluq edirsə, sənə də düşməndir. Yəni mənim düşmənimlə dostluq edən adamla mən də düşmənəm, dostluq etmirəm. Amma insani münasibətlərdən fərqli olaraq, dövlətlərarası münasibətlər yalnız maraqlar üzərində qurulur. Tutaq ki, Rusiya ilə Ukrayna düşməndir, amma Türkiyə həm Rusiya, həm də Ukryana ilə əməkdaşlıq edir. Bu müasir anlamda tam yerinə düşən misaldır. Türkiyə öz dövlət maraqlarından çıxış edir. Dövlət başçısı dövlətin maraqlarından çıxış etməyə borcludur. Azərbaycan da həmçinin. Biz Yunanıstanın Ermənistanla münasibətləri istidir deyə bu ölkə ilə münasibətlərimizi pisləşdirməməliyik. Yunanıstan Azərbaycanın qaz ixracatında əsas rola malik olan ölkələrdən biridir. Bizim Avropaya çıxışda Türkiyədən sonra Yunanıstan ərazisindən TAP boru kəməri təxminən 1500 kilometrdən çox ərazidən keçərək Albaniya ərazisində daxil olur və oradan da Adriatik dənizinin dibi ilə İtaliyaya keçir. Ona görə də buna Trans Adriatik boru kəməri deyilir. Bu qısa şəkildə TAP adlanır”.
A.Nəsirli vurğuladı ki, biz Yunanıstan ərazisindən keçən qaz kəməri ilə qaz tədarükünü iki dəfə artırıılması ilə Yunanıstana qaz tədarükünün artırılmasını fərqləndirməliyik: “Biz iki dəfə qaz tədarükünü artıranda bu heç də o anlama gəlmir ki, Yunanıstana qaz tədarükü iki dəfə artır. Xeyr. Yunanıstanın ərazisindən keçən kəmərdə qaz tədarkü iki dəfə artır və bu kəmər əsasən hazırda Albaniyanı və İtaliyanı qazla təmin edir. Ordan digər Avropa ölkələrinə keçməsi nəzərdə tutulur. Lakin biz Yunanıstana qaz satışını artırmaq qərarına gəlsək və Yunanıstan bizdən bunu istəsə, o zaman bəli, bu iqtisadi sövdələşmədə siyasi məsələlər qoya bilərik ki, sizə bu qədər qaz veririk, siz niyə bizim düşmənimizlə dostluq edirsiz? Bu halda Yunanıstana sual edə bilərik ki, niyə haqqın-ədalətin yanında olmursuz? Biz ən azı Yunanıstan hökuməti, prezideti ilə bu məsələləri çözüb siyasi uğur qazana bilərik, nəinki Yunanıstanla münasibətləri kəsməklə”-deyə A.Nəsirli qeyd etdi.
İradə SARIYEVA
