Avropa Şurası Parlament Assambleyası (AŞPA) Azərbaycana qarşı bunu da etdi. Belə ki, qurum Azərbaycanla bağlı bəyanat qəbul edib. Bəyanatı AŞPA-da təmsil olunan 47 deputat dəstəkləyib.
Bəyanatda qeyd edilir ki, Bakı Ermənistanın ərazi bütövlüyünə qarşı növbəti təcavüzkar hərəkətlərdən çəkinməlidir. Azərbaycan öz silahlı qüvvələrini Ermənistanın suveren ərazisindən dərhal və qeyd-şərtsiz çıxarmalıdır. Bəyanatda xüsusi vurğulanır ki, guya özünümüdafiə xarakterli olmayan bu təcavüz zamanı Azərbaycan iri yaşayış məntəqələrində mülki infrastruktura hücum edib: “Biz Azərbaycanı Ermənistanın ərazi bütövlüyünə qarşı növbəti təcavüzkar hərəkətlərdən çəkinməyə və sülh danışıqları prosesinə qoşulmağa çağırırıq. Biz Azərbaycan silahlı qüvvələrinin Ermənistanın suveren ərazisindən dərhal və qeyd-şərtsiz çıxarılmasını, eləcə də bütün hərbi əsirlərin və digər məhbusların dərhal geri qaytarılmasını tələb edirik”.
Məsələni doğru-düzgün araşdırmadan bu dərəcədə qərəzli yanaşma nə deməkdir?
“Bütövlükdə bütün Qərb dünyası regionda Rusiya və Türkiyənin birgə fəaliyyətinə qısqanclıqla yanaşır”
Məsələyə münasibət bildirən Azərbaycan Kommunist Partiyası MK-nın sədri Rauf Qurbanovun sözlərinə görə, Avropa istitutlarının Azərbaycana qarşı qərəzli mövqeləri bir daha onların Qarabağ məsələsinin həllinə necə yanaşmalarının bariz göstəricisidir: “30 ilə yaxın bir dövrdə Azərbaycan ərazisinin 20 faizi erməni işğalı altında olanda avropalılar bu qədər narahat olmurdular. Bu gün isə məsələni yerində araşdırmadan, Azərbaycanı delimitasiya olunmamış bir ərazidə Ermənistan sərhədlərini pozmaqda ittiham edərək, onu şər-böhtanla günahlandırmaq yolunu tutublar. Müstəqil Azərbaycan dövlətinə ultimativ qaydada tapşırıq vermək hansı məntiqə, hansı demokratik çərçivəyə sığır? Bu cür çağırışlar Avropanın demokratik prinsiplərdən daha çox diktaturaya, hegemonluğa yaxınlığını göstərir. Hesab edirəm ki, istər AŞPA, istər Avropanın digər institutları, istərsə də bütövlükdə Avropa dövlətləri Azərbaycanın 44 günlük Vətən müharibəsində əldə etmiş olduğu qələbəmizi həzm edə bilmirlər. Məsələnin başqa bir tərəfi isə ondan ibarət ki, bütövlükdə bütün Qərb dünyası regionda Rusiya və Türküyənin birgə fəaliyyətinə qısqanclıqla yanaşır. Rregionda sülhün və əminamanlığın təmin olmasında maraqlı deyillər. Onlar Cənubi Qafqazda belə bir tandemin olmasını qətiyyətlə istəmir və imkanları daxilində buna mane olmağa çalışırlar. Bu səbəbdən də Sorosun maliyyə dəstəyi ilə hakimiyyətə gəlmiş Ermənistan iqtidarı Azərbaycan-Ermənistan sərhədlərində vəziyyəti daima gərgin saxlayır, Rusiya və Türküyənin regionda təsir imkanlarını zəiflədərək, onları Qarabağ probleminin çözülməsində kənarda qoymağa çalışır. Bütün bunlarla yanaşı, rəsmi İrəvan Azərbaycanın guya Ermənistan ərazisinə müdaxilə etməsi pərdəsi altında Rusiya Federasiyasını KTMT üzvü kimi münaqişəyə cəlb etməklə, Rusiya üçün məqbul olmayan bir vaxtda ona Cənibi Qafqazda ikinci cəbhə açmaq istəyir. Məqsəd Qərbin tapşırığı ilə Rusiyanı bir dövlət olaraq zəiflətmək, onun beynəlxalq imicinə zərbə vurmaqdır. Çox yaxşı haldır ki, Rusiyanın hakim dairələri Ermənistanın öz əzəli müttəfiqinə qarşı bu cür qeyri-səmimi rəftarını və xəyanətini aydın başa düşürlər”.
Partiya sədri hesab edir ki, bütün bunlar Azərbaycan dövlətinin xeyrinə olan bir məsələdir.
Vidadi ORDAHALLI
