ATƏT oktyabrın 21-27-də Ermənistan hökumətinin dəvətilə bu ölkəyə ehtiyacların qiymətləndirilməsi qrupu göndərəcək.
Qurumun rəsmi saytında xəbər verilir ki, səfərin məqsədi ATƏT-in inteqrasiya olunmuş təhlükəsizlik konsepsiyası çərçivəsində onun mandatı və təcrübəsi əsasında müəyyən sərhədyanı ərazilərdə vəziyyəti qiymətləndirməkdir.
Beynəlxalq ekspertlərdən və ATƏT Katibliyinin nümayəndələrindən ibarət texniki qrup Ermənistan-Azərbaycan şərti sərhədi boyu ərazilərə səfər edəcək, eləcə də yerlərdə beynəlxalq tərəfdaşlarla məsləhətləşəcək.
Qeyd edək ki, ATƏT 30 il müddətində münaqişənin tənzimlənməsi ilə bağlı heç bir uğura imza atmayıb, əksinə, prosesi ləngitməklə məşğul olub. Belə reputasiyaya malik bir təsisat hansı obyektiv qiymətləndirməni aparacağına ümid edir? Bəllidir ki, ermənilər bu təsisatdan əvvəlki fəaliyyəti gözlədikləri üçün onu bura dəvət edirlər. Bir də, Avropanın bir müşahidə missiyası regionda varsa, ikinciyə nə ehtiyac duyulur?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, Ermənistanın bu prosesdəki məkrli niyyəti bəllidir: “Ermənistan öz ərazilərinə xarici ölkələrin nümayəndələrini, müxtəlif qiymətləndirmə qruplarını, cürbəcür missiyaları cəlb etməklə sülh danışıqları və sülh müqaviləsinin imzalanması prosesini ləngitmək istəyir. Praqa görüşü zamanı Paşinyanın Aİ missiyasının Ermənistan ərazisinə gəlməsinə razılıq verməsi, bu günlərdə isə ATƏT-in Ermənistana qiymətləndirmə qrupu göndərməsi eyni zamanda onu göstərir ki, rəsmi İrəvan kənar qüvvələrin təsiri altındadır və həmişə olduğu kimi, müstəqil siyasət yürüdə bilmir. Əslində, bu kimi halların baş verməsi Ermənistanın dövlət və milli maraqlarına tamamilə zidd addımdır və Paşinyan öz ölkəsinin müstəqilliyinə xələl gətirir. Avropa dairələrinin də bu prosesə xüsusi həvəs və canfəşanlıqla qoşulması bölgədə gedən proseslərə nəzarət etmək, nəyəsə nail olmaq istəklərini açıq büruzə verir. Bütün hallarda, bu cür manipulyasiyalar Ermənistanla Azərbaycan arasında sülh müqavilsənin imzalanmasına ciddi maneələr yaradır. Bu, həm də sülh prosesinə zərbə vurur, bölgədə təhlükəsizliyə təhdid yaradır. Bu bir faktdır ki, son günlər Ermənistanın hərbi-siyasi rəhbərliyi Avropa dairələrinə güvənərək Azərbaycanla sərhəddə gərginliyi artırır, hətta düşmənin genişmiqyaslı hərbi təxribatlara hazırlaşdığı sirr deyil. Düşünürəm ki, istər hərbi, istərsə də siyasi müstəvidə bu kimi mənasız gedişlər növbəti mərhələdə Ermənistana çox baha başa gələcək. Çünki Ermənistan bəzən unudur ki, qarşısında güclü və qüdrətli Azərbaycan var. Həm siyasi, həm də hərbi anlamlarda Azərbaycanın qarşısında heç bir qüvvə dayana bilməyəcək və Ermənistan ortada yenə tək qalacaq”.
Siyasi şərhçinin sözlərinə görə, ATƏT münaqişənin tənzimlənməsi ilə bağlı heç bir uğurlu fəaliyyət ortaya qoymayıb: “Niyyət Ermənistanı öhdəliklərindən yayındırmaq, sülh sazişinin imzalanmasını yubatmaqdır. Hələ bir Avropa missiyası işini tamamlamamış digərinə nə ehtiyac ola bilər? Bütün bunlar oyunbazlıqdan başqa nəsə deyil”.
Məhəmmədəli QƏRİBLİ
