Fransanın Bakıdakı səfiri Zaxari Qroşun Praqadakı dördtərəfli görüşün nəticələrini Makronun adına yazmaq cəhdi onun özü üçün də, Makron üçün də, Fransa üçün də uğursuz oldu.
Bunu “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır: “Səfir məqalə yazıb və məqaləsində deyib ki, Makronun Praqa görüşündə iştirakı uğurlu nəticələr üçün həlledici oldu və "Yaşasın Praqa ruhu".
Bu lap fransızların elə özlərinin məşhur "kral öldü, yaşasın kral" aforizmi kimi pafoslu səslənsə də, mahiyyətindəki yalan və riyakarlığa görə, mənasız bir şeyə çevrilir .
Əvvəla, Azərbaycanla Ermənistan arasında sülh prosesinin ədalətli gedişində maraqlı olan ölkənin səfiri bütün azərbaycanlılar üçün tarixi qürur və şərəf mənbəyi olan Şuşanın azadlığından məyus olmaz, başqa səfirlər kimi ürək genişliyi ilə Şuşaya ilk anda gedərdi.
İkinci, səfirin Praqa ruhu ilə sevinməsi səmimi olsaydı, öz prezidenti Makronun açıq ermənipərəst müsahibəsindən sonra belə sözlər yazmazdı. Axı Makron həmin müsahibəsi ilə səfirin öyündüyü Praqa ruhunu miskin "Ermənistan ruhuna" sadəcə olaraq satdı... Praqa ruhu deyilən uğurlu nəticədə Makronun rolu belə böyük idisə, niyə Makron təcavüzkarlığa görə burnu təzəcə əzilmiş "Ermənistanın yanında həmişə varıq" kimi rüsvayçı bəyanatı bütün dünyanın gözü qarşısında açıqca verdi?
Üçüncü, Praqa ruhlu qələbədə həqiqətən Makronun payı var idisə, niyə Fransa prezidenti Praqa görüşündən sonra bircə dəfə dilinə gətirmədi ki, Ermənistan Azərbaycanla dəhlizi açmalı, qanunsuz slahlıları Qarabağdan xoşluqla çəkməli, mina xəritələrini və 1-ci Qarabağ müharibəsində itkin düşürülmüş 4 min azərbaycanlının öldüsü-qaldısı barədə məlumatları paylaşmalıdır… Demədi, çünki Praqa ruhunda Makronun nəinki bir qram da payı yoxdur, əksinə, Makron öz siyasəti və davranışları ilə Azərbaycan-Ermənistan sülh normallaşmasının yolunda əsil ballast rolu oynayır. Bu gün açıq şəkildə Azərbaycana qarşı revanş yanğısı ilə yaşayan bir ölkəyə "heç vaxt səni tək qoymaram" deyən Makron sülhə, əmin-amanlığa necə xidmət edə bilər? Mahiyyəti "şeytana nökərçilikdən" ibarət olan belə əməlləri dəstəkləyən səfir Zaxari Qroş Makrondan da pis günə düşmüş oldu.
Səfir Qroş hansı məntiq və ədalətlə Makronu Praqa ruhunun qəhrəmanı hesab edir ki, həmin Makron Əliyevlə görüşdən gedən kimi Azərbaycanın Parisdəki səfirliyinə iki dalbadal quldur hücumu təşkil etdirdi? Ayıb deyilmi cənab səfir? Heç olmasa nəzərə alaydınız ki, Prezident Əliyev Parisdə birinci quldur basqından sonra Makrona səhvlərini anlamasına daha bir xoşməramlı şans verərək telefonla danışdı, Makron söz verdi ki, səfirliyə bir daha belə hücumlar olmayacaq. Makron sözünü tuta bilmədi, Qroş isə onun yerinə heç olmasa utanmaq fürsətini qaçırdı...”
İradə SARIYEVA
