Ermənistanın Baş naziri Nikol Paşinyan Azərbaycan Müdafiə Nazirliyinin yaydığı bəyanata reaksiya verib. O, Azərbaycanı Ermənistana yeni hücum üçün bəhanə yaratmaqda ittiham edib.
Məlumat üçün qeyd edək ki, Müdafiə Nazirliyinin yaydığı məlumata görə, oktyabrın 16-sı günün ikinci yarısında Ermənistan silahlı qüvvələrinin Azərbaycan ordusunun Daşkəsən istiqamətində bölmələri ilə üzbəüz mövqelərinə hərbi nəqliyyat vasitələri ilə əlavə şəxsi heyət və 4 artilleriya qurğusunu cəmləşdirməsi müşahidə edilib: “Bildiririk ki, bölgədə yarana biləcək gərginliyə görə bütün məsuliyyət məhz Ermənistanın hərbi-siyasi rəhbərliyinin üzərinə düşür”.
Paşinyan isə iddia edir ki, Azərbaycan sərhəddə “atəşkəsi pozur” və bu, yeni hərbi hücum üçün bəhanədir. Əlavə edir ki, “atəşkəs rejimini saxlamaq və təhlükəsizliyi təmin etmək üçün beynəlxalq mexanizmlər lazımdır”. Daha sonra bunları qeyd edib: “Azərbaycan özünün atəşkəsi pozmasını daim Ermənistanın adına yazır. Aydındır ki, bu, Ermənistana qarşı yeni hərbi təcavüz üçün zəmin yaradır”.
Görünən odur ki, Paşinyan bütün hoqqalardan çıxaraq, nəyin bahasına olursa-olsun, Rusiyanı nəzərə almadan sərhədə beynəlxalq mexanizmləri cəlb etməyə çalışır.
“Bütün bunlarda məqsəd odur ki, Qərb hərbi baxımdan Ermənistana yerləşsin”
Məsələyə münasibət hərbi ekspert İbrahim Rüstəmlinin fikrincə, Paşinyan faktiki olaraq odla oynayır: “İstisna deyil ki, o, bununla bağlı Qərbdə onu himayə edən dairələrdən təlimat alır. Paşinyanı bu yöndə ruhlandıran başlıca amil Rusiyanın əsas diqqətinin Ukraynaya yönəlməsidirsə, digər amil Fransa prezidenti Emmanuel Makronun Azərbaycana qarşı məlum həyasız açıqlamasıdır. Bütün bunlardan çıxış edən Paşinyan həm Azərbaycanla sərhəddə təxribatlara rəvac verir, həm də Qərbin müşahidə missiyasının daha geniş tərkibdə Ermənistanda yerləşməsinə can atır. Bütün bunlarda məqsəd odur ki, Qərb hərbi baxımdan Ermənistana yerləşsin. Paşinyan və komandası hesab edir ki, ondan sonra Rusiyanı Ermənistandan sıxışdırıb çıxarmaq daha asan olacaq. Ancaq Paşinyan nəzərə almaq istəmir ki, Ermənistanın yetərincə iqtisadi, hərbi nöqteyi-nəzərdən Rusiyadan asılı olduğu, sıx bağlı olduğu bir dövrdə bu asan olmayacaq. Məlum olduğu kimi, Rusiya bu şantaja diplomatik səviyyədə cavab verərək avropalı müşahidəçilərə qarşı tarazlıq yaratmaq üçün öz müşahidəçilərini göndərməyə hazır olduğunu bəyan edib. Ancaq rəsmi İrəvan bütün vasitələrlə bundan yayınmağa çalışır. Moskva hələ ki, Ermənistan hakimiyyətinin fitnəkarlığına yumşaq reaksiya göstərməyə çalışır. Ancaq düşünmürəm ki, bu belə davam edəcək. Fikrimcə, bir müddət sonra Rusiya tərəfindən daha sərt bəyanatlar verilə bilər. Ondan sonra digər təzyiq rıçaqları işə salınacaq. Bu zaman artıq Paşinyan üçün gec olacaq”.
Vidadi ORDAHALLI
