Ermənistan Baş naziri Nikol Paşinyan öz Tvitter səhifəsində yazıb ki, 10 noyabr 2020-ci il bəyanatında yalnız bir - Laçın dəhlizi haqda qeyd var:
“10 noyabr tarixli üçtərəfli bəyanatda Ermənistan ərazisinə aid hansısa “dəhliz” haqqında bir qeyd tapa bilərsinizmi? Əlbəttə ki, yox! 10 noyabr üçtərəfli bəyanatında “dəhliz”dən bəhs edilirmi? Bəli və bu, Laçın dəhlizidir, Dağlıq Qarabağda yerləşir. Bu, yeganə variantdır”.
Paşinyan həm də qeyd edib ki, Ermənistan üzərinə götürdüyü bütün öhdəlikləri yerinə yetirməyə hazırdır:
“Aşağıdakı tvit və ona verilən reaksiya sübut edir ki, heç kim Ermənistanı öhdəliklərindən yayınmaqda ittiham edə bilməz. Bir daha bildirirəm ki, biz öhdəliklərimizi yerinə yetirmək üçün 3 nəzarət-buraxılış məntəqəsi açmağa, eləcə də regionun hərtərəfli blokadadan çıxarılmasından yaranan imkanlardan istifadə etməyə hazırıq”.
Bütün bunlar Nikol Paşinyanın növbəti dəfə 10 noyabr bəyanatındakı ifadələrdən “hərfi mənada” sui-istifadə etməklə öhdəlikdən boyun qaçırmasının sübutu sayıla bilərmi?
Politoloq Rəşad Bayramov “Bakı-Xəbər”ə açıqlamasında bildirdi ki, Paşinyan iki ildir söz oynatmaqla məşğuldur: “Bununla da üzərinə götürdüyü öhdəliklərdən yayınmağa cəhd göstərir. Paşinyan növbəti dəfə yalan danışır. 10 noyabr bəyanatının 6 və 9-cu bəndlərində bu məsələyə tam aydınlıq gətirilir. Sənədin 6-cı bəndində deyilir ki, keçmiş “Dağlıq Qarabağ”la Ermənistan arasında əlaqəni təmin edəcək və bununla belə Şuşa şəhərinə toxunmayacaq Laçın dəhlizi (5 kilometr enliyində) Rusiya sülhməramlı kontingentinin nəzarəti altında qalır. Tərəflərin razılığı əsasında növbəti üç il ərzində Dağlıq Qarabağla Ermənistan arasında əlaqəni təmin edən Laçın dəhlizi üzrə yeni hərəkət marşrutunun inşası planı müəyyən ediləcək və bununla da həmin marşrutun mühafizəsi üçün Rusiya sülhməramlı kontingentinin gələcək yerdəyişməsi nəzərdə tutulur. Azərbaycan Respublikası Laçın dəhlizi üzrə hər iki istiqamətdə vətəndaşların, nəqliyyat vasitələrinin və yüklərin hərəkətinə təhlükəsizlik zəmanəti verir.
Gəlin görək, 10 noyabr bəyanatının 9-cu bəndində nə deyilir?
Həmin bənddə deyilir ki, bölgədəki bütün iqtisadi və nəqliyyat əlaqələri bərpa edilir. Ermənistan Respublikası vətəndaşların, nəqliyyat vasitələrinin və yüklərin hər iki istiqamətdə maneəsiz hərəkətinin təşkili məqsədilə Azərbaycan Respublikasının qərb rayonları və Naxçıvan Muxtar Respublikası arasında nəqliyyat əlaqəsinin təhlükəsizliyinə zəmanət verir. Nəqliyyat əlaqəsi üzrə nəzarəti Rusiyanın Federal Təhlükəsizlik Xidmətinin sərhəd xidmətinin orqanları həyata keçirir. Tərəflərin razılığı əsasında Naxçıvan Muxtar Respublikası ilə Azərbaycanın qərb rayonlarını birləşdirən yeni nəqliyyat kommunikasiyalarının inşası təmin ediləcək.
Göründüyü kimi, Azərbaycan 6-cı bənddə üzərinə düşən öhdəliyi yerinə yetirib. Orda qeyd edilən yeni yolu vaxtından çox əvvəl çəkib istifadəyə verdi. Ancaq Ermənistan 9-cu bənddə qeyd edilənləri icra etmir. Sənəddə Naxçıvana açılacaq yola nəzarət Rusiya sülhməramlılarına həvalə edilirsə, bu elə dəhliz deməkdir. Bəli, Ermənistan Naxçıvana əlavə yolların açılması öhdəliyini də üzərinə götürüb. Ancaq bu, Zəngəzur dəhlizindən əlavədir. İndi isə Paşinyan həmin yolları bizə təqdim etməklə, Zəngəzur dəhlizindən yayınmaq istəyir.
Paşinyan hansı oyun oynadığını, bu oyunun birbaşa müharibə çağırışı olduğunu yaxşı bilir. Bu siyasət hansısa sülhə imkan vermir. Belə çıxır ki, Ermənistan rəhbərliyindən imzasına hörmət gözləmək mənasızdır. Bir daha təsdiq olunur ki, Paşinyan nə özünə, nə də ölkəsi adından çəkdiyi imzaya hörmət qoyur”.
Məhəmmədəli QƏRİBLİ
