Oktyabrın 22-də Qarabağda yaşayan Rusiya vətəndaşlarının toplantısı olacaq. Bu barədə məlumatı saxta təşkilat kimi fəaliyyət göstərən “Dağlıq Qarabağın rus icması” yayıb.
Qeyd edək ki, sözügedən qondarma icmanın 2021-ci ilə aid hesabatında Qarabağın dağlıq hissəsində daimi yaşayan 1500 rus və 2500 slavyanın qeydiyyatdan keçdiyi yer alıb. Bundan başqa, son yüzildə Qarabağda ilk pravoslav məbədinin ucaldıldığı qeyd olunub.
Qeyd edək ki, Qarabağda ilk pravoslav kilsə 1894-cü ildə Qızılqayada (Hadrut yaxınlığında) inşa edilmişdi. Lakin ermənilər I Qarabağ savaşında Terek kazaklarının tikdiyi bu məbədi içəridən və çöldən minalayaraq məhv ediblər. Səbəb isə özlərinin qriqoryan, katolik məzhəbinə yaxın olmaları və pravoslavlığı qəbul etməməkləri olub.
Məlum məsələdir ki, Qarabağda deyildiyi qədər rusun yaşaması barədə göstərilən rəqəm ağ yalandır. Qondarma toplantının “Qarabağ ermənilərinin nicatı Rusiyadadır” çağırışlarının artdığı bir vaxta keçirilməsinin planlaşdırılması diqqət çəkir.
“Separatçıların “rus icması” oyunları saman çöpündən yapışmaq cəhdidir”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyevin fikrincə, separatçıların “rus icması” oyunları saman çöpündən yapışmaq cəhdidir: “Bu faktın özü ilk baxışdan belə nəticəyə gəlməyə zəmin yaradır ki, məqsəd iki müttəfiq ölkə - Azərbaycanla Rusiyanın münasibətlərinə xələl vurmağa hesablanıb. O cümlədən, heç kim, eləcə də son günlərini sayan Qarabağdakı separatçılar unutmamalıdırlar ki, bu region Azərbaycanın ayrılmaz və suveren ərazisidir. Orada yaşayanlar barədə Prezident İlham Əliyev öz bəyanatını dəfələrlə səsləndirib, izahını da verib. Yəni onlar Azərbaycan vətəndaşlarıdırlar və ölkəmizin qanunları əsasında həmin ərazilərdə yaşamağa davam edəcəklər. Əlbəttə ki, seçim də onlara qalıb. Azərbaycanın vətəndaşları olmaq istəmirlərsə yolları Ermənistana və s. ölkələrə tərəf açıqdır. Qaldı ki, haqqında bəhs edilən “Dağlıq Qarabağın rus icmasına”, bir daha qeyd edim ki, belə bir ərazi vahidi ölkəmizdə mövcud deyil. Üstəlik, Qarabağda rusdilli əhali mövcud deyil və deyilən rəqəm saxtadır. Artıq bütün dünyaya bəyan olunub ki, Qarabağ Azərbaycanın regionlarından biridir”.
B.Quliyev hesab edir ki, “Qarabağda yaşayan rus icması” məsələsi erməni separatçılarının təxribatçılıq əməlidir: “Şuşadakı məşhur və tarixi Qazançı kilsəsini rus pravoslav kilsəsindən erməni apostol kilsəsinə çevirənlər, məbədin qübbələrini dəyişdirənlər kimlər olub? Yaxud Xocavənddə rus pravoslav kilsəsinin qalıqları indi də qalır, internet resurslarında fotoları da mövcuddur. Bu kilsə, demək olar ki, təməlli şəkildə dağıdılıb. Onu da belə bir acınacaqlı vəziyyətə gətirənlər məhz erməni separatçıları, erməni quldurları olub. Yaxşı, bəs indi nə baş verdi ki, birdən-birə Xankəndidə “rus icması” üzə çıxdı? Bəli, Azərbaycan multikultural və tolerant ölkə olaraq bütün xalqların, millətlərin, dini inanclıların birləşdiyi, birgəyaşayışları yüksək şəkildə təmin edildiyi, habelə dünyaya nümunə etalonu kimi təqdim olunduğu bir məkandır. Nəticə etibarı ilə separatçıların oyunbazlıqlarından bu cür nəticə hasil etmək mümkündür ki, son vaxtlar əllərinin hər yerdən, hətta Ermənistandan da üzüldüyünü görən separatçı rejimin rəhbərliyi indi bu kimi vasitələrlə “nicatlarını Rusiyada” görür. Amma qatar çoxdan gedib və bu gün Rusiya Azərbaycanın ərazi bütövlüyünü Qarabağ regionu da daxil tanıyır. Həmin tendensiya məhz Rusiyanın ali rəhbərliyi, prezidenti Putin tərəfindən də bir neçə dəfə bəyan olunub. Belə olan halda isə “Dağlıq Qarabağın rus icması” iddiaları suda boğulanın saman çöpündən yapışmaq cəhdindən başqa bir şey deyil. Hətta göstərilən rəqəmlər belə saxtakarlığı açıq-aydın sübuta yetirir. Hesab edirəm ki, belə bir cılız təxribatçı plan da fiaskoya uğrayacaq. Yaxşı olardı ki, separatçılar bu kimi uğursuz oyunbazlıqlarını yürütməkdənsə öz müqəddəratları, aqibətləri haqqında düşünsəydilər daha yaxşı olar. Çünki Qarabağ Azərbaycandır və orada yaşayan bütün azsaylı etniklər də Azərbaycanın vətəndaşlarıdır. Bu faktı isə heç bir halda inkar etmək mümkün deyil”.
Bir sözlə, politoloq hesab edir ki, sözügedən məkrli plan da fiaskoya məhkumdur.
Vidadi ORDAHALLI
