Rusiya Dövlət Dumasının MDB işləri, Avrasiya inteqrasiyası və həmyerlilərlə əlaqələr üzrə komitəsinin sədr müavini Konstantin Zatulin Azərbaycanla Ermənistan arasında imzalanması planlaşdırılan sülh müqaviləsindən danışıb: “Rusiyanın iki qonşu ölkə arasında sülh müqaviləsinin bağlanmasına arzuolunan baxması şübhə doğurmamalıdır. Bu rəsmi mövqedir”.
K.Zatulin nə qədər ermənipərəst olsa da, artıq bəzi mqamları gizlədə bilmir. O etiraf edib ki, son vaxtlar Paşinyan və tərəfdarları Rusiyaya düşmən münasibət sərgilədiyi üçün artıq İrəvana inamla bağlı problemləri yaranıb: “Qafqaz istiqamətində fəallaşan Qərb dövlətləri Rusiyanı tez bir zamanda vasitəçilik missiyasından sıxışdırmaq istəyirlər. Paşinyan, onun tərəfdarları və onu dəstəkləyənlərin Rusiyaya qarşı açıq, bəzi hallarda düşmən münasibəti bu günlərdə xüsusilə açıq-aşkar görünür. Bu isə o mənada problemlər yaradır ki, biz Ermənistan kimi müttəfiqə indiki iqtidarı ilə etibar edirik”.
Bütün bunlar onu göstərir ki, Zatulin və onun kimi ermənipərəst mövqedən çıxış edən siyasilər Ermənistanı Rusiyaya bağlamağa nə qədər çox cəhd etsələr də, nəticə əldə edə bilmirlər. Vəziyyət o yerə gəlib çatıb ki, Zatulin Ermənistanla bağlı məyusluğunu açıq bəyan edir.
“Paşinyan və komandası hesab edir ki, Rusiya Ukrayna bataqlığından çıxa bilməyəcək”
Məsələyə münasibət bildirən AMİP sədri Arzuxan Əlizadənin fikrincə, qatı ermənipərəst olan Zatulinin Ermənistanla bağlı məyus formada danışmasını bir sıra faktorlar şərtləndirir: “Başlıca faktor odur ki, Ermənistan Rusiyanın vasitəçilik etdiyi, Putinin imza atdığı 10 noyabr Bəyannaməsinə əməl etmir. Üzərinə götürdüyü öhdəlikləri yerinə yetirmir. Əvəzində strateji müttəfiqini saya saymayaraq Qərblə yaxınlaşır. Fransanın regiona daxil olmasına çalışır. Ermənistan təmsil olunduğu Kollektiv Təhlükəsizlik Müqaviləsi Təşkilatını (KTMT) görməzdən gələrək, Avropa İttifaqının müşahidə missiyasını Azərbaycanla sərhədə dəvət edir. Ermənistanın bir sıra media orqanları davamlı olaraq Rusiyaya qarşı təbliğat kampaniyası aparırlar. Antirus siyasi təşkilatlara geniş meydan verilir, aksiyalar keçirirlər və s. Bütün bunlar, təbii ki, erməni cəmiyyətində Rusiyaya qarşı nifrəti artırır. Üstəlik, Paşinyan və komandası belə hesab edir ki, Rusiya Ukrayna bataqlığından çıxa bilməyəcək. Onsuz da prosesin uzanması Rusiyanın xeyrinə deyil. Ermənistanda Qərblə yaxınlaşma fonunda Avropanın sərmayəsinə ümid edirlər. Hesab edirlər ki, Qərbdən gələn sərmayə Ermənistan iqtisadiyyatını dirçəldəcək. Bütün bunları Rusiya siyasi elitası da bildiyi üçün Paşinyan hakimiyyətinə etibar etmir. İmkanları olsa, günü sabah Paşinyanı devirib Moskvapərəst birini hakimiyyətə gətirərlər, sadəcə, bunu edə bilmirlər. Ötən il Ermənistanda keçirilən seçkilər göstərdi ki, Rusiyanın bu ölkədə sosial dayaqları əhəmiyyətli dərəcədə zəifləyib”.
Partiya sədri hesab edir ki, Rusiyanın Ermənistanda sosial dayaqları zəif olduğundan Paşinyanı devirə bilmir.
Vidadi ORDAHALLI
