“Bizə məlumdur ki, noyabrın ortalarına Fransa Senatında Azərbaycan əleyhinə növbəti qətnamə hazırlanır”. Bunu Prezident İlham Əliyev Astanada MDB Dövlət Başçıları Şurasının iclasında çıxışı zamanı deyib.
Ölkə başçısının sözlərinə görə, Fransanın indiki rəhbərliyi əvvəlki prezidentlərin müəyyən balanslı münasibətinin üstündən xətt çəkdi: “Fransanın xarici işlər naziri Azərbaycanın əleyhinə yalan bəyanatlar verib, Fransa Senatı və aşağı palata İkinci Qarabağ müharibəsi dövründə qondarma “Dağlıq Qarabağ”ı tanıyan qətnamələr qəbul ediblər. Baxmayaraq ki, hətta Ermənistan özü onu tanımayıb. Bizə məlumdur ki, noyabrın ortalarına Fransa Senatında Azərbaycan əleyhinə növbəti qətnamə hazırlanır. Beləliklə, təəssüf ki, Fransanın indiki rəhbərliyi əvvəlkilərdən fərqli olaraq, - mənim isə Prezident Şirakla da, Prezident Sarkozi ilə də, Prezident Ollandla da kifayət qədər sıx ünsiyyət qurmaq imkanım var idi və münasibətlər kifayət qədər ölçülüb-biçilmiş, kifayət qədər mehriban idi və Fransada müəyyən erməni diasporu amilinə baxmayaraq, biz həmişə Fransanın əvvəlki prezidentlərinin fəaliyyətini, balanslaşdırılmış qəbul edirdik, - mahiyyət etibarilə bütün bunların üstündən xətt çəkdi”.
Prezidentin noyabrın ortalarına Fransa Senatında Azərbaycan əleyhinə növbəti qətnamə hazırlanması ilə bağlı səsləndirdiyi fikirlər maraq doğurur. Maraqlıdır, bu qətnamə nə ilə bağlı ola bilər? Bunun qarşısını necə almaq olar, indidən nə etmək lazımdı? Fransanın Bakıdakı səfirliyi qarşısında etiraz aksiyalarının keçirilməsi qətnamənin önlənməsində nə kimi effekt verə bilər?
“Hesab edirəm, Azərbaycan diplomatik müstəvidə belə qərarların qəbulunu önləmək üçün səylərini artırmalıdır”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bununla bağlı bir sıra məqamlara toxundu: “Əvvəla, Fransanın Azərbaycana qarşı ədalətsiz siyasətini uzun illərdir görürük. Ölkə hakimiyyəti erməni lobbisinin diqtəsi ilə hərəkət edir. Makronun sonuncu qərəzli mövqeyi Praqada imzalanan razılaşmaya kölgə saldı. Bir daha məlum oldu ki, Fransa öz imzasına hörmət etmir. Ola bilsin ki, noyabrda Senatda Qarabağdaki separatçılarla bağlı növbəti qətnamə qəbul olunsun. Düzdür, 2020-ci ilim noyabrında separatçıların “tanınması” ilə bağlı qətnamə qəbul olunub. Bu dəfə növbəti belə bir qətnamə bir qədər fərqli formada gündəliyə gətrilə bilər. Düzdür, Senatın istənilən qərarı Azərbaycanın Qarabağla bağlı mövqeyinə təsir etməyəcək. Ancaq Azərbaycan-Fransa əlaqələrinə ciddi təsir edəcək. Fransanın Cənubi Qafqazda mövqeyini zəiflədəcək. Azərbaycan regionda aparıcı geoiqtisadi layihələr həyata keçirən ölkədir və bununla bağlı Parisin atdığı əks addımlar Fransanın özünə qarşı çevriləcək. Hesab edirəm ki, Azərbaycan diolomatik müstəvidə belə qərarların qəbulunu önləmək üçün səylərini artırmalıdır. Eyni zamanda, Fransanın Azərbaycandakı səfirliyi qarşısında aksiyalar da keçirilməlidir. Belə görünür ki, Senatın qətnamə qəbul etməsinə Fransa hökuməti yaşıl işıq yandırıb. Ancaq bu, Azərbaycanın Qarabağla bağlı prinsipial mövqeyinə təsir edə bilməyəcək”.
Vidadi ORDAHALLI
