Azərbaycan Müdafiə Nazirliyindən də verilən məlumata görə, oktyabrın 16-sı günün ikinci yarısında Ermənistan silahlı qüvvələrinin Azərbaycan Ordusunun Daşkəsən istiqamətində yerləşən bölmələri ilə üzbəüz mövqelərinə hərbi nəqliyyat vasitələri ilə əlavə şəxsi heyət və 4 ədəd artilleriya qurğusunu cəmləşdirməsi müşahidə edilib.
Nazirlikdən bildirilib ki, bölgədə yarana biləcək gərginliyə görə bütün məsuliyyət məhz Ermənistanın hərbi-siyasi rəhbərliyinin üzərinə düşür.
Son vaxtlar yenə də müxtəlif təxribatlara əl atmağa çalışan, atəşkəsi pozan Ermənistan tərəfi bu dəfə sərhədə şəxsi heyət və artilleriya qurğuları cəmləşdirməklə hansı məqsədi güdür?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Ermənistan Azərbaycanla sərhədboyu ərazilərdə yeni mühəndis-istehkam xəttinin qurulmasını həyata keçirir: “Bu müdafiə xətti təxminən 400 km-lik sərhəd zolağını əhatə edəcək. Yəni müdafiə xətti Göyçədən Araz çayına qədər olan Azərbaycanla həmsərhəd bölgəni əhatə edir.
Ermənistan ordusunun yeni müdafiə xəttinin inşası prosesini həyata keçirən mühəndis-istehkam xidmətinə silahlı pilotsuz uçuş aparatlarından və döyüş təyyarələrinin hava zərbələrindən qorunmaq üçün zəruri sayılan amillərə diqqət yetirilməsi tapşırılıb.
Ermənistanın yeni müdafiə xəttini yaratması hücum əməliyyatının tərkib hissəsidir. Azərbaycan Müdafiə Nazirliyinin, o cümlədən qeyri-rəsmi mənbələrin Ermənistanın Göyçə və Zəngəzur istiqamətinə hərbi texnika və canlı qüvvə topladığına dair informasiyaları da bu ümumi prosesin tərkib hissəsi hesab oluna bilər.
Ermənistanın hərbi-siyasi rəhbərliyi yaxşı bilir ki, müdafiə xətti olmadan həmin istiqamətdə hücum əməliyyatının başlanması məqəsəduyğun deyil.
Ermənistanın bölgədəki bu addımları sülh müqaviləsinin imzalanmasına, sərhədin delimitasiyası və demarkasiyası işlərinə mənfi təsir göstərməklə yanaşı, yeni müharibənin başlanğıcını qoya bilər”.
Ramil Məmmədlinin sözlərinə görə, Ermənistanın bu cür addımları sülh müqaviləsinin bağlanması və sərhədlərin müəyyənləşməsinin ləngidilməsi üçün atılan addımlardır: "Düşünürəm ki, Ermənistanın bölgədəki bu addımları sülh müqaviləsinin imzalanmasını ləngitməyə yönəlib. Həmçinin sərhəd zolağının delimitasiya və demarkasiyası işlərinə də mənfi təsir göstərmək üçün atılan addımlardır. Yəni həmin ərazinin hərbiləşdirilməsi birmənalı olaraq bu işlərə mənfi təsir göstərir. Hesab edirəm ki, bu da həmin istiqamətdə müəyyən müharibə işartılarının yaranması deməkdir. Təhlükə var, ordu yığılırsa, hərbi birləşmə varsa, yeni müdafiə xətti formalaşdırılırsa, artıq buna birmənalı olaraq yeni müharibənin başlanğıcı kimi yanaşmalıyıq. Hətta qarşdurma olmasa belə, biz buna bu cür yanaşmalıyıq”.
Məhəmmədəli QƏRİBLİ
