ATƏT-in Minsk Qrupunun keçmiş həmsədri, səfir, Rusiya diplomatik xidmətinin əməkdar işçisi Vladimir Kazimirov bəyan edib ki, Qarabağda yaşayan erməni əhali əslində nə Azərbaycana, nə də Ermənistana güvənir, onların güvəndiyi yeganə ölkə, güc Rusiyadır, bunu mütləq nəzərə almaq lazımdır:
“Qarabağ məsələsi inanılmaz dərəcədə çətinləşib. Qismən o, artıq Azərbaycanın nəzarətindədir. Onun qalan hissəsi hələ də Rusiya sülhməramlılarının nəzarətindədir və taleyinin gələcəkdə necə inkişaf edəcəyi hələ də bəlli deyil. Amma Qarabağ əhalisi, demək olar ki, birmənalı şəkildə formalaşıb: böyük əksəriyyəti ermənilərdir. Bunu komandir olacaq hər kəs nəzərə almalıdır. Qarabağ erməniləri Rusiyaya hamıdan çox güvənir və bunu nə İrəvan, nə də Bakı dəyişə bilər. Gəlin, beş illik müddətin bitməsini gözləyək”.
Kazimirovun qərəzli olmağı, ermənipərəstliyi Azərbaycanda kifayət qədər məlumdur. Kazimirov 1992-1996-cı illərdə Rusiyanın Minsk Qrupunda həmsədri olub. Onun qədər odioz, Azərbaycana mənfi münasibət bəsləyən, Qarabağ danışıqlarını təhrif olunmuş şəkildə təqdim edən ikinci bir diplomat təsəvvür etmək çətindir. Məhz Kazimirovun həmsədrliyi dövründə Şuşa və Qarabağ ətrafında yerləşən 7 rayon Ermənistan tərəfindən işğal edildi. Ancaq bir dəfə olsun, Kazimirov Ermənistana yönəlik bir cümlə belə tənqidi fikir səsləndirmədi. Hər dəfə həyasızcasına Azərbaycanı günahlandırdı. 2000-ci ildə rəsmi diplomatik fəaliyyəti başa çatsa da, yenə müsahibələrində, yazılarında Azərbaycanı qaralamaqla məşğul oldu. Nə yaxşı ki, Kazimirov Vətən müharibəsinə qədər ölmədi və sağlığında Azərbaycanın öz ərazilərini işğaldan azad etməsini görüb məyus oldu.
Burada diqqəti çəkən məqam odur ki, Kazimirov indiyə qədər məsələyə belə yanaşmayıb. Kazimirovun bu açıqlamasının ara-sıra Rusiyanın bəzi dairələrinin gündəmə gətirdiyi “Qarabağda rus icması mövcuddur” fikrindən sonra səslənməsi diqqəti çəkir. Sanki indidən məsələni ona kökləmək istəyirlər ki, Qarabağdaki ermənilərin məsələsi Rusiyalıqdır. Yenə də Kazimirov “ənənəsinə” sadiq qalaraq Azərbaycana qarşı öz bildiyini edir.
“Kazimirovun məlum bədnam açıqlamaları da təsadüfi deyil və ona verilən tezislərə söykənir”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, Kazimirovun Qarabağ ermənilərinin Rusiyaya inam bəslədiyi ilə bağlı fikirlər səsləndirməsi təsadüfi deyil: “Çünki Qarabağla bağlı proseslər çox sürətlə inkişaf edir. Son aylar Ermənistan-Azərbaycan sərhədində baş verənlərə çox böyük maraq var. Bir tərəfdən ABŞ, o biri tərəfdən Avropa İttifaqı proseslərə təsir etməyə çalışır. Bütün bunlar da Rusiyanı çox narahat edir. Kreml istəmir ki, Azərbaycanla Ermənistan arasında münasibətlərin yoluna qoyulmasında Qərb təşəbbüsü ələ alsın. Kazimirovun Azərbaycana qərəzli münasibəti bəllidir. Rusiya istəyir ki, Qarabağ erməniləri bu ölkəyə tabe olsun. Biz nəzərə almalıyıq ki, Rusiya Vətən müharibəsinin sonlarında Xankəndinin azad olunmasına imkan vermədi. 10 noyabrdan sonra bütün vasitələrlə Qarabağı tərk edən ermənilərin geri qayıtmasına şərait yaratdı. Yeri gələndə, Rusiya Qarabağ separatçıları vasitəsilə Ermənistana təzyiq edir. O həqiqətdir ki, Qarabağdakı ermənilər daha çox Rusiyaya inanır, nəinki Paşinyan hakimiyyətinə. Separatçılar açıq deyirlər ki, Paşinyanın onları müdafiə etmək gücü yoxdur. Bu səbəbdən Rusiya Qarabağ erməniləri üzərindən növbəti oyun oynamaq istəyir. Kazimirovun məlum bədnam açıqlamaları da təsadüfi deyil və ona verilən tezislərə söykənir”.
Bu səbəbdən partiya sədri hesab edir ki, Azərbaycan ayıq-sayıq olmalıdır.
Vidadi ORDAHALLI
