İran İslam İnqilabı Keşikçiləri Korpusu (SEPAH) ölkənin Şərqi Azərbaycan və Ərdəbil vilayətlərindən keçən Araz çayı sahillərində hərbi təlimlərə başlayıb.
Bu barədə SEPAH-ın quru qoşunlarının komandanı general Məhəmməd Pakpur məlumat verib. O bildirib ki, hərbi təlimləri SEPAH-ın “Aşura” qərargahı keçirir. Təlimlər 3 gün davam edəcək. Təlimlərdə üzən körpü quraşdıracaq şəxsi heyətin və hərbi avadanlıqların su hövzəsindən keçirilməsi məşq ediləcək.
İranın Azərbaycandakı səfiri Seyid Abbas Musəvi İran İslam İnqilabı Keşikçiləri Korpusunun (SEPAH) quru qoşunlarının Azərbaycanla həmsərhəd bölgədə davam edən təlimləri barədə danışarkən deyib ki, İran hərbi təlimlər barədə Azərbaycan tərəfinə məlumat veriib:
“Biz qardaş Azərbaycana bu hərbi təlimlər barədə məlumat vermişik”.
O, təlimlərin sülh naminə keçirildiyini söyləyib.
İran rəsmilərinin tez-tez Ermənistanın xeyrinə bəyanatlar verməsi məsələsinə münasibət bildirən diplomat vurğulayıb ki, söhbət İranın hansısa tərəfi dəstəkləməsindən getmir: “İran öz maraqları çərçivəsində mövqeyini ifadə edir”.
İranın Zəngəzur dəhlizi ilə bağlı hədələrindən sonra məhz sərhədlərimizə yaxın ərazilərdə hərbi təlimlərə başlaması təsadüfdür?
Hərbi-siyasi ekspert Emin Həsənli “Bakı-Xəbər”ə bildirdi ki, İran Azərbaycanla səmimi münasibət qurmur: “Azərbaycan dövləti hər zaman qonşuları ilə mehriban qonşuluq siyasəti həyata keçirir. İranla da həmçinin eyni siyasətdə olub. İranın müstəqilliyini təhdid edəcək addımlar atmayıb. Amma İran Azərbaycan torpaqlarını işğal edən Azərbaycanı bütün gücü ilə dəstəkləyir. Məhz İranın dəstəyi sayəsində ermənilər ayaq üstə durur. Onların dəstəyi olmasaydı Ermənistan çoxdan çökərdi. Gürcüstan və Türkiyə ilə də yollar bağlı olduğu bir müddətdə bu dəstək güc verdi onlara. Hətta müharibə bitəndən sonra, 2021-ci ilin noyabr ayında və sonra gördük ki, bir neçə ayın içərisində Qarabağ ərazisinə İranın nə qədər hərbi maşınları gəldi. Onlar özləri bəyan edir ki, islam idealarını təbliğ edirlər. Əgər islam ideyalarını təbliğ edirsə, islam torpaqlarının işğalda qalmasını qəbul etməlidirmi? Hec cür başa düşə bilmirəm. Bu gün münaqişənin həll edilməsi üzrə danışıqlar gedir. Avropa və Rusiyanın vasitəçiliyi ilə sülh müqaviləsi imzalanır. İran bütün bunlardan, xüsusən də Zəngəzur dəhlizinin açılmasından çox ciddi narahat olur. Bütün vasitələrdən istifadə edir ki, bölgədə sülh qorunmasın. İran dəfələrlə fikir bildirib ki, son zamanlar qonşuluqda olan milli sərhədlərin dəyişməsini qəbul etmir. Hansı sərhədlərdən söhbət gedir? 30 ildi Azərbaycan torpaqları işğal altındadır. Niyə İran məhz o vaxt bu bəyənatları vermirdi, indi verir? O bilmir ki, milli sərhədlər hansıdır? Yaxşı bilir. Sadəcə, son illər Türkiyə və Azərbaycanın yüksəlişi, Turan birliyinin güclənməsi İranın molla rejimini çox narahat edir. Ona görə də belə addımlar atır. Amma keçirdiyi heç bir təlimləri real addıma çevirə bilməz. Bizim Türkiyə kimi, Pakistan kimi müttəfiqlərimiz var. Cənubi Azərbaycanda 40 milyona yaxın azərbaycanlı yaşayır. İran bilir ki, hansısa bir xəyanətkar vəzifə həyata keçirərsə, vəziyyəti daha da ağır olacaq. Azərbaycana qarşı olan bu hallar təhdiddir. Bunun başqa adı yoxdur. İran unudur ki, Azərbaycan 90-cı illərin Azərbaycanı deyil. Qarabağ müharibəsindən İran da özü üçün ibrət götürüb. Sadəcə, bu cür vasitələrlə təhdid edir. Zamanında, 2020-ci ildə İranın hərbi təyyarələri Xəzər dənizi üzərində uçuşlar etdi və türk şahinlari Azərbaycanda uçuşlar keçirərək İrana mesaj verdi. Hesab edirəm ki, İran bu mesajlardan ciddi nəticə çıxardı. Ancaq bu addımlarından da əl çəkən deyil. Azərbaycanın şəhərlərinin dağılmasında İranın müstəsna rolu var. İranda bir dənə belə Azərbaycan məktəbi yoxdur. Ermənilərin isə həm məktəbi, həm də universitetləri var. İranın bu pozuculuq fəalliyətlərinə Azərbaycan öz hiddətini bildirib. Azərbaycan xalqının böyük əksəriyyəti dostu və düşməni çox yaxşı tanıyır. Vətən müharibəsində də tanıdıq. Gürcüstanla sərhədlər bağlı olanda İranın üzərindən məhz Rusiya Ermənistana hərbi təyyarə ilə silah-sürsat göndərmişdi və daim də silahın böyük əksəriyyəti İran üzərindən Ermənistana keçib. Bu cür fəaliyyət onu göstərir ki, İranın dəyişmək niyyəti yoxdur. İran dəyişməyəcəksə, o zaman orada olan rejim dəyişəcək. Bunun başqa bir alternativi yoxdur”.
Məhəmmədəli QƏRİBLİ
