Rusiya prezidenti Vladimir Putindən sonra sabiq prezident, Təhlükəsizlik Şurasının sədr müavini Dmitri Medvedev də Makronun Ermənistanla bağlı tərəfkeşliyini sərt tənqid edib.
Makronun Rusiyanı Ermənistan-Azərbaycan sərhədində vəziyyəti qızışdırmaqla bağlı ittiham etməsinə cavab olaraq Medvedev qeyd edib ki, bu bəyanat daha çox yanlışdır: “Avropa siyasətinin sevimli metodu günahı sağlam başın üzərinə yıxmaqdır. Fransa prezidenti Emmanuel Makronun son bəyanatını izah etməyin başqa yolu yoxdur. Makron əslində Rusiyanı günahlandırmadı, əksinə, özünə haqq qazandırdı. Fransanın özünün 1960-cı illərin sonundan bəri keçmiş müstəmləkələrində necə davrandığını xatırlamaq lazımdır. O, Fransanın Ermənistanı nə qədər çox sevdiyini şiddətlə deyir. Bununla o, müdrik və nəcib görünməyə çalışır. Son açıqlama açıq-aşkar erməni diasporasının rəğbətini qazanmağa hesablanıb. İyrənc müstəmləkə keçmişi, hazırda isə açıq-aşkar amerikapərəst mövqeyi üçün - ayıb olsun, cənab Prezident!”.
Görünən odur ki, Makronun son açıqlaması bütün siyasi etik normaları pozmaqla yanaşı, regionda növbəti qarşıdurmaların qızışmasına xidmət edir.
“Torpaqlarımız işğal alında olan dövrdə Fransa Rusiyanı ittiham etmirdi”
Məsələyə münasibət bildirən AMİP funksioneri Əli Orucovun fikrincə, ümumən Fransa hər zaman ermənipərəst mövqedən çıxış edib: “Ancaq bu dərəcədə tərəfkeşlik və həyasızlıq olmayıb. Məsələ ondadır ki, Makron “Frans-2” televiziyasına müsahibəsində Azərbaycanın ünvanına sərt, qərəzli, əsası olmayan ifadələr işlətdi. Bununla Fransanın tərəflər arasında vasitəçi olmaq imkanının üzərindən birdəfəlik xətt çəkdi. Prezident İlham Əliyev ona cavabında Fransa hökumətinin artıq Azərbaycan-Ermənistan danışıqlarında iştirak etmək haqqını itirdiyini bəyan etdi. Makronun Qarabağla bağlı Rusiyaya yönəlik tənqidləri daha çox Vətən müharibəsində Moskvanın tutduğu müəyyən qədər tərəfsiz mövqe və Ukrayna ilə bağlıdır. Bəli, Rusiya əvvəllər Qarabağla bağlı daha çox təsir imkanına malik olub. Ancaq torpaqlarımız işğal alında olan dövrdə Fransa Rusiyanı ittiham etmirdi. Bir dəfə də olsun Ermənistana təzyiq edilməsi ilə bağlı Rusiyaya çağırış etmirdi. Niyə? Ona görə ki, Fransa ərazilərimizin işğaldan azad olunmasını istəmirdi. Fransada hesab edirdilər ki, proses nə qədər çox uzansa, bu bir o qədər Ermənistanın xeyrinə olacaq. Yəni zamanla Azərbaycan bununla barışacaq. Ancaq 44 günlük Vətən müharibəsi bütün bu mənfur planların üstündən xətt çəkdi. O üzdən, Moskvaya qarşı qəzəblidilər və Rusiyanın üzərinə gedirlər. Ancaq düşünmürəm ki, Makronun son sərsəmləməsi Rusiyanın Ermənistanla bağlı siyasətində hansısa dönüş yaradacaq. Əksinə, Ermənistan-Rusiya qarşıdurması daha da kəskinləşəcək. Bu da taktiki baxımdan Azərbaycanın xeyrinədir”.
Vidadi ORDAHALLI
