Son günlər tez-tez erməni mediasında Qarabağda yaşayan ermənilərə rəsmi İrəvanın münasibətinin əvvəlki kimi olmadığını ifadə edən yazılar yer alır. Qeyd edilir ki, hazırda Rusiya sülhməramlılarının müvəqqəti olaraq məsuliyyət zonasında olan ərazidə yaşayan ermənilərə, separatçı kəsimə Ermənistan hökumətinin münasibəti pisdir.
Xankəndi ilə İrəvanın arasında ciddi problem yaşandığını yazan erməni mediası vurğulayır ki, Ermənistanın baş naziri Nikol Paşinyan artıq Xankəndidən gələn “nümayəndə heyəti”ni qəbul etmir, onlara “öz başınızın çarəsinə özünüz qalın” mesajını verir.
Ermənistanda nəşr olunan “Joqovurd” qəzetinin yazdığına görə, Ermənistan Baş naziri Nikol Paşinyan Xankəndidəki separatçı rejimin nümayəndələri ilə görüşdən imtina edir.
Qəzet Paşinyanın Xankəndidən gələn telefon zənglərini də cavabsız qoyduğunu bildirir: “Keçən həftə Xankəndidə başlayan etiraz aksiyalarından sonra orada yaşayan ermənilər tələb edirlər ki, Ermənistan rəhbərliyi qəfil sülh müqaviləsi imzalamaq qərarına gəlsə, onların taleyinin necə olacağına bəri başdan aydınlıq gətirsin. Bundan sonra məsələnin aydınlaşdırılması üçün Xankəndidən İrəvana nümayəndə heyəti gəldi. Amma nümayəndə heyətini İrəvanda qarşılayan olmadı. Ermənistan Baş naziri Nikol Paşinyan bir neçə gündür ki, Xankəndidən gələn nümayəndələrlə görüşməkdən qəti şəkildə imtina edir, onların telefon zənglərinə belə cavab vermir. Bu günlərdə təkcə Araik Arutyunyanı qəbul edən Paşinyan aşkar şəkildə görüşdən boyun qaçırır, görünür, onlardan nəyisə gizlədir”.
“Mənim gəldiyim qənaət budur ki, Paşinyan artıq Araikə “gedin Azərbaycana tabe olun” mesajını verib”
Müstəqil.az-ın baş redaktoru Faiq Balabəyli “Bakı-Xəbər”ə şərhində bildirdi ki, baş verənlər gözlənilən idi və təbii qarşılanmalıdır. “Paşinyanın separatçılarla görüşdən imtina etməsi, onlarla müzakirə aparmaması təbii qəbul edilməlidir. Əslində, bu gözlənilən idi. Xankəndidəki separatçılar, eləcə də kütlə Ermənistanın baş nazirinin son gedişlərindən narazı qalıb və onlar Paşinyanı bu fikirdən daşındırmaq üçün onunla görüşə can atırlar. Separatçılar ümid edirdilər ki, Paşinyana təsir edə bilərlər, amma son müşahidələr göstərir ki, artıq iş-işdən keçib. Separatçılar və sadə ermənilər indən sonra talelərinin necə olacağını bilmək istəyirlər və bu üzdən Paşinyanla görüşə “nümayəndə heyəti” göndəriblər. Paşinyanın da ancaq Araiki qəbul etdiyi deyilir. Paşinyan hökumətinin separatçılara bu cür münasibəti dünyadakı erməni lobbisini də ciddi narahat edir. Belə görsənir ki, Paşinyan artıq bu addımı ilə separatçılara “Ermənistanın Qarabağa heç bir iddiası yoxdur, gedin, Azərbaycan dövlətinin vətəndaşları kimi yaşayın” demək istəyib. Artıq Ermənistan əhalisi də müharibədən bezib və uşaqlarının yad torpaqlarda ölməsini istəmirlər, bu səbəbdən daxildə də Paşinyana “Azərbaycanla sülh bağla” kimi çağırışlar edilir. İnanmıram ki, Paşinyan beş-üç separatçının sözü ilə yenidən Azərbaycanın daxili işinə qarışsın, sülh danışıqlarını pozmaq üçün addım atsın. Paşinyan bilir ki, bu dəfə də revanşizmə rəvac versələr Ermənistanı dövlət kimi hansı aqibət gözləyir. Bu baxımdan istəyir ki, Ermənistanı məhv olmaqdan qorusun. Mənim gəldiyim qənaət budur ki, Paşinyan artıq Araikə “gedin Azərbaycana tabe olun” mesajını verib”.
F.Balabəylinin qeyd etdiyinə görə, Xankəndidəki ermənilərin “bizim taleyimizə aydınlıq gətirin” çağırışlarına da Paşinyan əhəmiyyət vermir və bu davranışı ilə onların Ermənistan üçün maraq kəsb etmədiyini bəyan edir. Ermənistanın üçtərəfli bəyanatın müvafiq bəndələrini tezliklə icra etməli olduğunu vurğulayan F.Balabəylinin sözlərinə görə, onlardan biri də bu ölkənin qanunsuz silahlı birləşmələrin Xankəndidən, Qarabağdan çıxarması ilə bağlıdır ki, Paşinyan bu barədə göstəriş verməlidir. Ermənistanın baş nazirinin Azərbaycan prezidentinin son bəyanatlarından nəticə çıxarmalı olduğunu deyən F.Balabəyli hesab edir ki, Ermənistan hökumətinin Qarabağdakı ermənilərə hər hansı bir jesti olarsa, bu, ölkənin Azərbaycanın daxili işinə qarışması kimi qiymətləndiriməlidir. “Əlbəttə, Paşinyan dərk etməlidir ki, Qarabağdakı ermənilərə hər hansı bir jesti, münasibəti Azərbaycanın daxili işlərinə qarışmaqdır. Cənab Prezident açıq şəkildə “Qarabağın erməni əhalisinin hüquqları və təhlükəsizliyi Azərbaycan Konstitusiyasına uyğun olaraq təmin ediləcək. Biz öz daxili məsələlərimizi heç bir tərəflə müzakirə etməyə hazırlaşmırıq. Praqa görüşünün yekunlarına əsasən də, başa düşdüyüm qədər, bu mövzu dördtərəfli görüşün bütün iştirakçıları arasında hər hansı fərqli şəkildə qəbul edilməyib” bəyanatını verdi. Azərbaycan Prezidentinin Qarabağda yaşayan ermənilərlə bağlı verdiyi bəyanatdan Paşinyan da öz dərsini götürüb və bu üzdən separatçıların “nümayədə heyətini” qəbul etməkdən imtina edib. Qarabağdakı ermənilər Azərbaycanın suveren ərazisində yaşayırlar və onların gələcəyi ilə bağlı qərarı yalnız Azərbaycan dövləti verə bilər”-deyə F.Balabəyli qeyd etdi.
İradə SARIYEVA
