“Geosiyasi və regional vəziyyət dəyişdiyi üçün Qarabağ məsələsi ilə bağlı qərarlar erməni tərəfinin istəklərini təmin etməyəcək”. Bunu Ermənistan prezidenti Vaaqn Xaçaturyan deyib.
Ermənistan prezidentinin sözlərinə görə, buna səbəb həm geosiyasi, həm də regional vəziyyətin dəyişməsidir: “Həqiqətən çətin dövrdür. İndi hər şey həlledici mərhələyə qədəm qoyub. Bu, Ermənistan Respublikasının mövcudluğuna və Qarabağ məsələsinin həllinə aiddir. Bizdən isə realizm tələb olunur ki, düzgün qərarlar qəbul edək. Əksər hallarda onlar istəklərimizi təmin etməyəcək, lakin istəklərimizdən imtina etdiyimizə görə yox. Geosiyasi və regional vəziyyət dəyişib və bunu dəyərləndirməyə bilmirik. Hər şey çox sürətlə dəyişir”.
Bu, müəyyən mənada həm də Ermənistan cəmiyyətini sülhə hazırlamaq anlamına gəlir. Çünki ən yüksək səviyyədə etiraf edilir ki, 44 günlük müharibədən sonra Ermənistan Qarabağla bağlı yaranan reallıqları dəyişə bilməyəcək. O baxımdan bütün bunları ekspertlər necə dəyərləndirir?
“İndi əsas odur ki, qarşı tərəf bu yöndə real addımlar atsın”
Məsələyə münasibət bildirən Aydınlar Partiyasının sədr müavini Qorxmaz İbrahimlinin fikrincə, reallıqlar dəyişsə də, xəstə erməni cəmiyyətinin düşüncələrini dəyişmək elə də asan olmayacaq: “Problem ondadır ki, başda Rusiya olmaqla, 300 il müxtəlif imperiyalar bunların beynini zəhərləyib. Ermənilərin beynini elə yuyublar ki, bunlar xəstədilər. Paşinyanın hakimiyyətə gəlməsindən sonra orada baş verən hadisələr, Azərbaycanın tarixi qələbəsi xəstə erməni təfəkküründə bir bomba effekti yaratdı. Ancaq bununla iş bitmir. Çünki illərlə ermənilər türkə nifrət ruhunda tərbiyə edilib və bunu tez bir zamanda dəyişmək o qədər də asan deyil. Bunları ortadan qaldırmaq üçün Ermənistan rəhbərliyinin üzərinə çox iş düşür. Ermənilər anlamalıdılar ki, əvvəlki vəziyyəti geri qaytarmaq mümkün olmayacaq. Bunun üçün Ermənistanın nə hərbi, nə də sosial-iqtisadi resursları var. Ermənistan rəsmiləri ilə yanaşı, ölkənin ziyalıları da cəmiyyəti sülhə hazırlamalıdır. Söhbət sağlam düşünən ziyalılardan gedir. Düzdür, belələrinin sayı elə də çox deyil, amma var. Sözügedən proses çətin olacaq, amma biz səbrlə bunu gözləməliyik. Biz də bir sıra məsələlərə hazır olmalıyıq. Qarabağdaki etnik ermənilər Azərbaycan vətəndaşı olduğu üçün biz də buna hazır olmalıyıq. Düzdür, burada əsas vəzifə Ermənistan dövləti üzərinə düşür. Ancaq biz də bu yöndə müəyyən addımlar atmalıyıq. Ermənistan prezidenti və baş nazirinin bu yöndə müsbət mesajları işin xeyrinədir. İndi əsas odur ki, Ermənistan bu yöndə real addımlar atsın”.
Partiyanın sədr müavini onu da əlavə etdi ki, Ermənistan tərəfi onlara verilən şansdan nə qədər tez istifadə etsə, bu bir o qədər onların xeyrinə olacaq.
Vidadi ORDAHALLI
