Azərbaycan Sosial Rifah Partiyası bəyanat yayıb. Bəyanatda deyilir:
“30 ilə yaxın davam etmiş Ermənistanın işğalçılıq siyasəti 2020-ci ildə baş vermiş 44 günlük İkinci Qarabağ müharibəsində Azərbaycanın parlaq qələbəsi nəticəsində başa çatdı. Öz torpaqlarını işğaldan azad edən Azərbaycan regionda yeni siyasi reallıqlar formalaşdırdı. Azərbaycan beynəlxalq hüququn prinsip və normalarına əsaslanaraq beynəlxalq ədaləti bərpa etdi.
44 günlük müharibə regionun siyasi mənzərəsinə, o cümlədən iqtisadi inkişafına yeni temp qazandırır. Ermənistan ilə münasibətlərin normallaşdırılması, kommunikasiyaların bərpası, regionda sülhün və təhlükəsizliyin bərpası qalib ölkə olan Azərbaycanın maraqlarına xidmət edir. Təssüfləndirici haldır ki, Ermənistan 2020-ci ilin 10 noyabrında imzalanan Üçtərəfli Bəyanatın müəddaları əsasında üzərinə götürdüyü öhdəlikləri yerinə yetirmir. Bu isə, regionda sülhün və sabitliyin formalaşmasına mənfi təsirlər göstərir, mane olur. Bu gün beynəlxalq aləm iki ölkə arasındakı problemin həllinin məhz Ermənistanın destruktiv mövqeynə görə gecikdiyinin, sülh müqaviləsinin imzalanmasının ləngidiyinin şahidi olur. Təssüf ki, bəzi ölkələrin rəhbərləri erməni diasporuna xoş gəlmək, onların gücündən seçkilərdə istifadə etmək üçün reallıqdan kənar ifadələrlə Ermənistana dəstək verirlər.
Fransa dövlətinin prezidenti Emmanuel Makronun bir neçə gün öncə mətbuata müsahibəsində işlətdiyi ifadələr qəbuledilməzdir və heç bir həqiqəti əks etdirmir. 44 günlük İkinci Qarabağ müharibəsindən ötən 2 il ərzində Azərbaycan yenə də Ermənistanın törətdiyi təxribatlarla üz-üzə qalmışdır. Bu təxribatlar nəticəsində yüzlərlə insan həyatını itirib. İkinci Qarabağ müharibəsi başa çatandan sonra Azərbaycanın 250-dən çox vətəndaşı əsasən işğal dövründə basdırılan minaların partlaması nəticəsində ya həlak olub, ya da ciddi xəsarət alıb. Həmçinin Azərbaycanın bir hərbi mövqeyindən digərinə aparan yollar minalanıb. Bütün baş verənlərdən sonra Fransan dövlətinin başçısının təcavüzkar Ermənistanı dəstəkləməsi heç bir beynəlxalq konvensiya ilə uzlaşmır.
2020-ci ildən sonrakı sülh danışıqları prosesində Azərbaycan hər zaman barışdırıcı mövqeyi ilə seçilib. İstər Avropa İttifaqının, istərsə də Rusiyanın vasitəçiliyi ilə aparılan danışıqlar zamanı Azərbaycan humanist mövqeyini hər zaman nümayiş etdirib. Bunun əksinə olaraq, Azərbaycanı ittiham etməklə Fransa birtərəfli mövqe tutduğunu, ermənipərəst addımlarını davam etdirdiyini təsdiqləyir. Hansı ki, ATƏT-in Minsk Qrupunun həmsədri kimi münaqişənin tənzimlənməsində vasitəçi rol oynamalı olan Fransa ötən 28 ildə də birtərəflli mövqeyi ilə seçilib. Bu, tərəflər arasında fərqli standartların nümayişi ilə müşayət edilib.
Azərbaycan Sosial Rifah Partiyası olaraq Fransa dövlət başçısının bu ədalətsiz, qərəzli mövqeyini pisləyirik. 44 günlük Vətən müharibəsi dövründə olduğu kimi bu gün də milli maraqlarımız ətrafında həmrəylik nümayiş etdirdiyimizi bildirir, Azərbaycan Prezidentinin apardığı siyasəti dəstəkləyirik. Beynəlxalq təşkilatları Fransa prezidentinin bu qərəzli fikirlərinə etiraz etməyə çağırır, bu fikirləri sülh danışıqları prosesinə təzyiq kimi qiymətləndirilməli olduğunu düşünürük. Bəyan edirik ki, Azərbaycan dövləti heç bir zaman hansısa qonşusunun torpağına göz dikməyib, hər zaman beynəlxalq hüquq çərçivəsində davranış nümayiş etdirib”.
