Fransa prezidenti Emmanuel Makron “France 2” telekanalının efirində Rusiyanı Qafqaz regionunda və onun hüdudlarından kənarda sabitliyi pozmaq üçün Azərbaycan və Ermənistan arasında son toqquşmaları qəsdən təhrik etməkdə ittiham edib.
Makron bildirib ki, son aylar Moskva Azərbaycanın xeyrinə gərginliyi artırıb:
“Son iki ildə sərhəddə baş verənlər... Guya sərhədi 5 min rus əsgəri qoruyur, amma ruslar çoxəsrlik bu münaqişədən sui-istifadə edərək, Türkiyənin şərikliyi ilə Azərbaycanın xeyrinə oynadılar və yaxın olduqları Ermənistanı zəiflətmək yolunu tutdular.
Baş verənləri görürsünüzmü? Bu, güya Rusiyanın vəziyyəti sabitləşdirmək cəhdidir. O, hamımızı zərərsizləşdirmək üçün Qafqazda xaos yaratmaq istəyir".
Makronun bu ittihamlarına hansı adı vermək olar?
Politoloq Rəşad Bayramov “Bakı-Xəbər”ə açıqlamasında bildirdi ki, Rusiyanın Azərbaycanla Ermənistan arasında münasibətlərin normallaşmasında maraqlı olmadığını, bu məqsədlə də zaman-zaman gərginlik yaratmaq cəhdi ilə bağlı məsələ yeni deyil: “Biz bunun indiyə kimi olan proseslərdə dəfələrlə şahidi olmuşuq. Rusiya tərəfi üçün münaqişənin uzun müddət davam etməsi maraqlıdır. Çünki Azərbaycanla Ermənistan arasında gərginliyin davam etməsi Rusiyaya Cənubi Qafqazda öz mövqelərini qoruyub saxlamaq və təzyiq göstərmək imkanları verir. Amma məsələ bundadır ki, hazırda Rusiya tərəfindən hazırlandığı bilinən sülh müqaviləsi, orada Qarabağa status məsələsinin açıq saxlanılması ilə bağlı deyilənlər də Rusiyanın bu məsələdə maraqlı olmadığını göstərir. Məsələ bundadır ki, bu sözləri Fransa prezidenti Makron belə təqdim edir ki, sanki savaşda Rusiya Azərbaycan tərəfindən çıxış edib, Azərbaycanın maraqlarına xidmət edib. Əslinə baxanda, vəziyyətin gərginləşməsində maraqlı olan, sülh sazişinin imzalanmamasını istəyən tərəflərdən biri Fransanın özüdür. Fransa senatının Qarabağ müstəqilliyinin tanınması ilə bağlı qərarının şahidi olmuşuq. Biz sonrakı dövrlərdə açıq şəkildə Ermənistan tərəfindən çıxış edərək, ayrı-ayrı bəyənatların verilməsini görmüşük. Biz Fransanın Qarabağda sülhməramlılarını yerləşdirmək fikirlərini də bilirik. Rusiyanın sülhməramlı missiyasını tənqid edən Makron bununla Rusiyanı tənqid etmək yox, həm də nail olmaq istəyir ki, bu gün həmin sülhməramlı missiya Fransa qoşunları ilə əvəz olunsun. Bununla bağlı ayrı-ayrı bəyanatların da şahidi olduq”.
Məhəmmədəli QƏRİBLİ
