“...Ermənistan tərəfindən 30 ilə yaxın davam edən işğal zamanı şəhərlərimiz və kəndlərimiz, mədəni və dini abidələrimiz, məscidlərimiz məqsədli şəkildə dağıdılıb, təhqir və talan edilib. Hətta məscidlərdən heyvan saxlamaq üçün tövlə kimi istifadə olunurdu.
Təəssüf ki, 30 il ərzində biz erməni cəmiyyətinin bu cür vandalizmə qarşı heç bir etirazını eşitmədik, əksinə, hətta bu dağıntılar, erməni vandallar və hərbi cinayətkarlar təqdir edilir və qəhrəmanlaşdırılırdı...” Bu fikirləri Prezident İlham Əliyev oktyabrın 13-də Astanada Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) 6-cı Zirvə Toplantısının plenar iclasında səsləndirib.
Prezident Astanada açıq bəyan etdi ki, Ermənistan 30 il vandalizm törətdi və erməni cəmiyyəti də buna heç bir reaksiya vermədi, əksinə, bəhrələndilər. Prezidentin bu açıqlamasından bilinir ki, Azərbaycana qarşı törədilən cinayətlərdə Ermənistanın hərbi-siyasi rəhbərliyi qədər erməni cəmiyyəti də məsuliyyət daşıyır.
“Erməni xalqı öz məsuliyyətini dərk etməli, canilərin cəzalandırılmasına çalışmalıdır”
AVCİYA-nın vitse-prezidenti, siyasi şərhçi, professor Məhərrəm Zülfüqarlı bizimlə söhbətində bildirdi ki, Ermənistan cəmiyyətində faşist təfəkküründə olanlar çoxdur. Azərbaycan Prezidentinin bu mühüm faktı beynəlxalq ictimayyətin diqqətinə çatdırmasının böyük siyasi əhəmiyyəti var. Dünyaya özlərini “məzlum” xalq kimi təqdim edən ermənilərin, “sülhpərvər” erməni cəmiyyətinin əslində öz hərbi-siyasi rəhbərləri kimi düşündüyü deyən M.Zülfüqarlının sözlərinə görə, ermənilərin əksəriyyəti revanşistdir. “1988-ci ildə erməni separatizmi Qarabağda başlayanda, erməni cinayətləri Qarabağ da daxil olmaqla əksər ərazilərimizdə, o cümlədən də azərbaycanlıların yaşadığı Ermənistanda baş verəndə heç bir sadə erməni buna etiraz etmədi. 30 ildən artıqdır ki, erməni cəmiyyəti hərbi-siyasi rəhbərliklərinin azərbaycanlılara qarşı cinayətlərinə göz yumur, bir dəfə də olsun buna səslərini qaldırmırlar. Erməni cəmiyyəti azərbaycanlılara qarşı törədilən vandalizmə, cinayətlərə səssiz qalmaqla öz hərbi-siyasi rəhbərlərinə dəstək vermiş olublar. Necə deyərlər, onlar da bununla müharibə canilərinə şərik olduqlarını göstəriblər. Əslində, sadə ermənilər bu cinayətlərə öz etirazlarını bildirsəydilər Ermənistanın cinayətləri bu qədər geniş miqyas almazdı. Qatı millətçi, şovinist ermənilər bu məsələdə heç də Sarkisyandan, Köçəryandan az məsuliyyət daşımır”.
M.Zülfüqarlı hesab edir ki, indiyə qədər Azərbaycan və Ermənistan arasında sülh danışıqlarının bu vəziyyətdə olmasında da şovinist ermənilərin günahı var. “Bu insanlar Azərbaycan xalqına qarşı qətliamlar törədənləri qınamaq əvəzinə onlara büt kimi səcdə ediblər. Halbuki, cinayətə göz yummaq onu törədənə şərik olmaq kimi bir şeydir. Revanşizm erməni cəmiyyətinin qanına elə hopub ki, onu təmizləmək xeyli vaxt apara bilər. Amma bütün hallarda erməni xalqı öz məsuliyyətini dərk etməli, canilərin cəzalandırılmasına çalışmalıdır. Çünki o canilər onların övladlarını yad torpaqda apardıqları haqsız müharibəyə cəlb ediblər. Erməni cəmiyyəti özü Sarkisyanları, Köçəryanları, başqa qəhrəmanlaşdırdıqları hərbi-siyasi caniləri cəzalandırmalıdır”-deyə M.Zülfüqarlı qeyd etdi.
İradə SARIYEVA
