Avropa Şurasının Monitorinq komitəsi Azərbaycan üzrə yeni həmməruzəçi seçib. Bu, Norveçin Əmək Partiyasından Liz Kristofersondı. Monitorinq Komitəsi ona 5 illik mandat verib. Xanım Liz Kristoferson Azərbaycanda demokratiya, insan haqları, korrupsiya, seçki sahəsində baş verəcək bütün nöqsanları monitorinq altında saxlayacaq.
Qeyd edək ki, bundan əvvəl AŞPA-nın Monitorinq Komitəsinin Azərbaycan üzrə məruzəçisi Ştefan Şennak olub.
Ümumilkdə, Avropa Şurasının indiki dövrdə belə bir addım atmasının heç yeridirmi? Bir tərəfdən Avropa enerji ilə bağlı Azərbaycandan mədət umur, o biri tərəfdən yeni məruzəçi təyin edilərək tərəflər arasında gərginlik yaradılır. Bu nə deməkdir?
“Sadəcə olaraq, bu cür piar oyunları Qərbyönümlü müxalifətin “beşinci kolon”unun nümayəndələrinə...”
Məsələyə münasibət bildirən Azərbaycan Kommunist Partiyası MK-nın sədri Rauf Qurbanovun sözlərinə görə, əgər yaxın keçmişə bir balaca ekskurs edib, baş vermiş hadisələri təhlil etsək hər şey aydın görünəcək: “Aydın görərik ki, 2020-ci ildə 44 günlük vətən mübaribəsində əldə etdiyimiz qələbədən sonra, ABŞ başda olmaqla, əksər Qərb dövlətlərinin Azərbaycana münasibətləri pis istiqamətdə dəyişib. Onsuz da ona qədər olan dövrdə də onların respublikamıza qarşı olan münasibətləri o qədər səmimi və ədalətli deyildi. Əgər ədalətli olsaydılar, Qarabağ problemi 30 il müddətində öz həllini tapardı. Son günlər ABŞ-da, Fransada və digər Avropa dövətlərində, erməni diasporalarının guya təşkilatçılığı ilə Azərbaycanın səfirliklərinə və o cümlədən beynəlxalq təşkilatlarda fəaliyyət göstərən Azərbaycan nümayəndəliklərinə planlaşdırılmış şəkildə həmlələr olunması, əslində həmin dövlətlərin erməni diasporasının adından istifadə edərək respublikamıza qarşı apardıqları çirkli kampaniyadır. Görünür ki, Azərbaycanın öz əzəli torpaqlarını düşmən işğalından azad etməsi onların maraqlarına cavab vermir”.
R.Qurbanov hesab edir ki, Avropa Şurasının məlum qərarı anlaşılan deyil: “Avropa Şurasında Norveçin Əmək Partiasından təmsil olunan Liz Kristofersona AŞ Monitorinq Komitəsi tərəfindən beş il müddətinə Azərbaycan üzrə məruzəci mandatının verilməsi başadüşülən olsa da, anlaşılan deyil. Anlamaq olmur ki, bu xanım Azərbaycan Konistitusiyasına müvafiq olaraq ölkəmizdə hansı səlahiyyətlərə malik olacaq. Respublikamız üçün əhəmiyyətli olan siyasi proseslərə necə nəzarət edəcək? Azərbbaycan müstəqil suveren bir dövlətdir. Konisitusiyaya görə heç bir xarici vətəndaşın və ya beynəlxalq təşkilatın ölkəmizin daxili işlərinə qarşımaq hüququ yoxdur. Azərbaycan təmsil olunduğu bütün beynəlxalq təşkilatlarda könüllülük prinsipi əsasında fəaliyyət göstərir. HHeç bir qurum və ya xarici dövlət qarşısında öhdəlik götürməyib. Əgər belə olmasaydı, onda Azərbaycan müstəqil dövlət olmazdı. İstər Avropa Şurasında, istərsə də digər beynəlxalq təşkilatda Azərbaycan üzrə kimin məruzəçi və ya hansısa vəzifəyə seçilməsi ölkəmizdə mahiyyətcə heç nəyi dəyişməyəcək. Sadəcə olaraq, bu çür piar oyunları Qərbyönümlü müxalifətin “beşinci kolon”unun nümayəndələrinə düşmən dəyirmanına su tökmək üçün verilmiş bir ipucudur ki, cəmiyyətdə vəziyyəti gərginləşdirsinlər. Sizi əmin edə bilərəm ki, belə piyada gedişlərlə Azərbaycanda milli həmrəyliyi pozmaq və cəmiyyətdə xaos yaratmaq mümkün deyil”.
Sonda partiya sədri onu da əlavə etdi ki, sözün əsl mənasında Azərbaycan xalqı və iqtidarı hələ indiyə kimi bu qədər həmrəy olmayıb.
Vidadi ORDAHALLI
