BMT-nin Baş Assambleyası oktyabrın 12-də böyük səs çoxluğu ilə dünya ölkələrini Ukraynanın dörd regionunun Rusiya tərəfindən ilhaq cəhdini pisləyən və Moskvanı bu ilhaq üçün keçirilmiş referendumların nəticələrindən imtina etməyə çağıran qətnamə qəbul edib.
BMT-nin 143 üzvü bu qətnamənin lehinə, 5 üzvü əleyhinə səs verib. 35 ölkə səsvermədə bitərəf qalıb.
Azərbaycan, Burkina Faso, Kamerun, Cibuti, El Salvador, Ekvatorial Qvineya, İran, Türkmənistan və Venesuela səsvermədə ümumiyyətlə iştirak etməyiblər.
Bitərəf qalan ölkələrin arasında Ermənistan, Qazaxıstan, Tacikistan və Özbəkistan da var.
Türkiyə qətnamənin lehinə səs verib.
Qətnamədə BMT Nizamnaməsinə uyğun olaraq bildirilir ki, Ukraynanın Donetsk, Luqansk, Xerson və Zaporojye regionları təcavüz nəticəsində Rusiya tərəfindən işğal olunub və bu hərəkətlə Ukraynanın ərazi bütövlüyü, suverenliyi və siyasi müstəqilliyi pozulub.
BMT-nin Baş Assambleyası oktyabrın 10-da keçirilən səsvermə ilə bu həftə Rusiyanın Ukraynanın dörd regionunu ilhaq etməsini pisləyəcək qətnaməyə gizli səs verilməsinə dair Moskvanın çağırışını rədd edib.
Rusiyanın BMT-dəki daimi nümayəndəsi Vasili Nebenzya Rusiyanı pisləyən qətnamənin zəruriliyini lüzumsuz sayıb:
"Bunun sülhə və təhlükəsizliyə və ya münaqişənin həllinə çalışılmasına nə dəxli var? Bu, bölücülüyə və ya eskalasiyaya doğru yönəlmiş daha bir addımdır. Əminəm ki, bu otaqdakıların tam çoxluğunun buna ehtiyacı yoxdur”.
Məlumdur ki, Azərbaycan birmənalı olaraq Ukraynanın ərazi bütövlüyünü tanıyıb və tanımaqda davam edir. Özünü Rusiyanın yaxın müttəfiqi sayan Ermənistanın davranışı çox müəmmalıdır. Əslində, bu məsələdə bitərəf qalmaq elə Rusiyanın əleyinə getmək anlamına gəlir. Hər halda, səsvermədə ümumiyyətlə iştirak etməməklə ən doğru gedişi elə Azərbaycan edib. Ölkəmizin BMT-dəki səsvermədə son diplomatik gedişi, yəni səsvermədə iştirak etməməsi Ukraynanın ərazi bütövlüyü ilə hər hansı formada ziddiyyət təşkil edirmi?
Politoloq Yeganə Hacıyeva “Bakı-Xəbər”ə açıqlamasında bildirdi ki, Ukraynada hərbi əməliyyatlar başlayan ilk gündən Azərbaycan daima həmin ölkənin ərazi bütövlüyünü tanıdığını bəyan edib: “BMT-dəki səsvermədə bizim nümayəndə heyətinin niyə iştirak etməməsi ilə bağlı rəsmi izah olmadığı üçün bunun səbəbi ilə bağlı konkret nə isə söyləmək çətindir. Azərbaycan Prezidenti son illərdə Avropanın beyin mərkəzlərində keçirdiyi görüşlərdə, Avropa Şurası, Avropa Birliyi, BMT səviyyəsində olan təmasların hamısında Ukraynanın ərazi bütövlüyünü tanıdığını bəyan edib. Bizim beynəlxalq platformalarda çıxış edən bütün QHT-lərimiz də Ukraynanın ərazi bütövlüyünə dəstək ifadə edirlər. Bizim cəmiyyətimiz Ukraynaya əlindən gələn maddi və mənəvi dəstəyi ifadə edir. SOCAR onların yanğınsöndürən və təcili tibbi yardım maşınlarını pulsuz benzinlə təmin edir. Yəni Azərbaycanın növbəti dəfə Ukraynanın ərazi bütövlüyünü dəstəkləməsinə ehtiyac yoxdur. BMT-də bizim açıq şəkildə Rusiya əleyhinə səs verməmiz nəyisə dəyişməyəcəkdi, əksinə, münasibətləri daha da korlayardı. Biz qonşu ölkələrlə münasibətlərimizi korlamaq istəmirik. Rusiya ilə biz strateji müttəfiqik, eyni zamanda həmin ölkədə bizim milyonlarla soydaşımız yaşayır. Bizim Rusiyadan narazı olduğumuz məqamları ikili münasibətlər kontekstində onların diqqətinə çatdırırıq. Bu qarşılıqlı münasibətlərin pozulması bizim bu coğrafiyadakı mövqeyimizi zəiflədə bilər. Bəzən bizim bu cür addımlarımıza Rusiya beynəlxalq təşkilatlarda adekvat cavab vermir. Biz istərdik ki, beynəlxalq platformalarda bizimlə bağlı keçirilən qərəzli müzakirələrdə Rusiya da eyni davranışı ortaya qoysun”.
Məhəmmədəli QƏRİBLİ
