"Son illərdə türkdilli ölkələr arasında münasibətlərin dinamizm qazanmasının şahidi oluruq. Xüsusi vurğulamalıyam ki, bu inteqrasiyada Azərbaycan Prezidenti İlham Əliyevin rolu çox böyükdür. Ölkə başçısının Mərkəzi Asiyada yerləşən türkdilli dövlətlərə etdiyi səfərlər qarşılıqlı iqtisadi-siyasi yaxınlaşmalarla yanaşı, tarixi bağlarımızın yenilənməsinə, qardaşlıq münasibətlərinin daha da möhkəmlənməsinə yol açır. Bu mənada, Prezident İlham Əliyevin Qırğızıstana etdiyi dövlət səfəri də xüsusi anlam daşıyır".
Bu fikirləri Azərbaycan Sosial Rifah Partiyasının sədri Əsli Kazımova bildirib. Partiya sədri qeyd edib ki, iki ölkə arasında diplomatik münasibətlərin 30 ilə yaxın yaşı var. Hazırki dönəmdə isə bu əlaqələr strateji tərəfdaşlıq səviyyəsinə çatır. "Bu ilin aprel ayında Qırğız Respublikasının Prezidenti Sadır Japarov ölkəmizə səfər etmişdi. Səfər çərçivəsində müxtəlif istiqamətləri əhatə edən çoxsaylı sənədlər, o cümlədən “Azərbaycan Respublikası və Qırğız Respublikasının Dövlətlərarası Şurasının yaradılması haqqında Memorandum” və “Azərbaycan Respublikası və Qırğız Respublikası arasında Strateji Tərəfdaşlıq haqqında Bəyannamə” imzalanmışdı. Prezident İlham Əliyev Bişkekdə mətbuat qarşısındakı çıxışında da bildirdi ki, yarım il öncə imzalanmış strateji tərəfdaşlıq haqqında Bəyannamə münasibətləri keyfiyyətcə yeni səviyyəyə çıxarıb. Yarım il bundan əvvəl müəyyən edilənlərin çoxu artıq real siyasət sahəsinə transformasiya olunur. Mədəni-humanitar, iqtisadiyyat, nəqliyyat, təhsil, yüksək texnologiyalar sahələri ilə bağlı geniş məsələlər ətraflı müzakirə olunub", -deyən Ə.Kazımova əlavə edib ki, ölkələr arasında effektiv əməkdaşlığın konkret nümunələri də mövcuddur. Məsələn, Azərbaycanın iki peyki – “Azersky” və “Azerspace-1” Qırğız tərəfdaşlarımıza xidmətlər göstərir. Nəqliyyat-tranzit sahəsində Çin-Qırğızıstan-Özbəkistan-Xəzər yeni dəmir yolunun tikintisinə və istismarına başlamaqla əmtəə dövriyyəsinin artması və yüklərin daşınmasının ucuzlaşması üçün imkanlar yaranacaq: "Dövlətlərimiz arasında mühüm siyasi dialoq da mövcuddur. əməkdaşlığımız beynəlxalq təşkilatlar çərçivəsində də möhkəmdir və səmimidir. Prezident İlham Əliyev Azərbaycanla Qırğızıstan arasında Birinci Dövlətlərarası Şuranın iclasında da bildirdi ki, bu gün Türk dünyası yeni potensial əldə edir. Həm Azərbaycan, həm də Qırğızıstan türkdilli dövlətlər arasında qardaşlıq münasibətlərinin möhkəmlənməsinə fəal töhfə verir. Gələn ay keçiriləcək Zirvə Görüşü bizim həmrəyliyimizin möhkəmlənməsi işində daha bir addım olacaq. Qarşıdakı dövrdə əlaqələr daha da inkişaf etdiriləcək. Strateji tərəfdaşlıqla bağlı bəyannamənin də daha konkret məzmunla zənginləşdirilməsi nəzərdə tutulur. O cümlədən, Birgə İnvestisiya Fondunun yaradılması da mühüm qərarlardandır. Qırğızıstan Azərbaycanın malik olduğu kommunikasiya imkanlarından da istifadə edə bilər. Prezident ilham Əliyevin bildirdiyi kimi, Azərbaycan artıq mühüm nəqliyyat şəbəkəsi yaradıb. İndiki mərhələdə nəqliyyat-tranzit sahəsində əməkdaşlığın vacibliyi xüsusilə vurğulanmalıdır. Artıq fəaliyyət göstərən, eləcə də planlaşdırılan yeni nəqliyyat yolları kommunikasiyalarımızı daha sıx birləşdirməyə imkan verəcək. Xəzərin bizim tərəfində tam olaraq Avropa istehlakçılarına qədər - həm dəmir yolu, həm avtomobil yolu, həm hava yolu və bizim yük hava nəqliyyatının potensialı nəzərə alınmaqla artıq geniş nəqliyyat infrastrukturu var. Çin-Qırğızıstan-Özbəkistan dəmir yolu Orta Dəhlizin bir hissəsi olacaq. Ələt ticarət limanının potensialı 15 milyon tondan 25 milyon tona qədər artacaq".
