“...Azərbaycan dünyada mina ilə ən çox çirklənmiş ölkələr sırasındadır. İlkin hesablamalara görə, Ermənistan işğal zamanı əraziərimizə bir milyondan çox mina basdırıb. İkinci Qarabağ müharibəsinin başa çatmasından keçən iki il ərzində 250-dən çox Azərbaycan vətəndaşı mina partlayışları zamanı həlak olub və ya ağır yaralanıb. Beynəlxalq mütəxəssislərin hesablamalarına görə, Azərbaycana ərazilərin minalardan təmizlənməsi məsələsini həll etmək üçün təxminən 30 il və 25 milyard ABŞ dolları lazımdır”. Bu barədə Prezident İlham Əliyev oktyabrın 13-də Astanada Asiyada Qarşılıqlı Fəaliyyət və Etimad Tədbirləri üzrə Müşavirənin 6-cı Zirvə Toplantısının plenar iclasındakı çıxışı zamanı bildirib.
Ermənistanın bu cinayətlərinə dünyanın hələ də ciddi reaksiya verməməsi təəssüf doğurur. Ermənistana təzyiq göstərməməklə görün dünya, beynəlxalq aləm Azərbaycanı necə dəhşətli faciə ilə üz-üzə qoyub. Dünya birliyi haqdan-ədalətdən danışır, lakin Ermənistana təzyiq etmirlər, ərazilərimizin minalardan təmizlənməsinə dəstək göstərmirlər. Bu doğrudan da Azərbaycanın çox dəhşətli problemlə üz-üzə qalmağı və tək buraxılmağıdır. Azərbaycana kömək olmasa Ermənistanın vurduğu zərərləri, mina terrorunu aradan qaldırmaq üçün bizə 30 il lazım olacaq və bu dövr ərzində də nə qədər günahsız insanlarımız, uşaqlarımız minaya düşərək ya həlak olacaqlar, ya da əlsiz-ayaqsız qalacaqlar. Müharibə bitsə də, biz hər gün Ermənistanın insanlıq əleyhinə cinayətləri, mina terroru ilə üzləşirik...Dünya dövlətləri, beynəlxalq qurumlar təcili şəkildə Ermənistana təzyiq göstərməlidir ki, mina xəritələrini ortaya qoysun, mina probleminin həll edilməsi üçün isə dünya birliyi Azərbaycana hərtərəfli dəstək verməlidir.
“...Bu cinayətlərinin dünya dövlətləri tərəfindən tanınmasına, bu ölkənin cəzalandırılmasına nail olmalıyıq”
Beynəlxalq Münasibətlərin Təhlili Mərkəzinin aparıcı məsləhətçisi, siyasi elmlər üzrə fəlsəfə doktoru Mətin Məmmədli bildirdi ki, bu çox vacib məsələdir və beynəlxalq aləm buna reaksiyasız qalmamalıdır: “Yerinə düşən bir mövzudur. Cənab Prezident zirvə toplantısında olduqca aktual bir məsələni qaldırdı. Son iki ilə yaxın dövr ərzində 250-yə yaxın vətəndaşımız mina terrorunun qurbanı olub. Ermənistanın mina terroru nəticəsində vətəndaşlarımız ya həyatını itirib, ya da sağlamlıqlarına ciddi zərər dəyib. Ümumiyyətlə isə, Ermənistanın insanlıq əleyhinə cinayətləri son 34 il ərzində durmadan davam edib. İstər Birinci Qarabağ müharibəsi illərində, istərsə də ondan sonra bunun şahidi olmuşuq. İnsanlıq əleyhinə cinayətlər yalnız cəbhə ilə məhdudlaşmayıb. Yəni müharibə əməliyyatları getdiyi bölgə ilə, Qarabağla məhdudlaşmayıb, qeyri-cəbhə ərazilərimizdə də, şəhərlərimizdə də onların insanlıq əleyhinə cinayətləri baş verib. Mən bəzi faktları qeyd edə bilərəm ki, 1988-1994-cü illər ərzində Ermənistan vətəndaşlarımıza qarşı 30-dan artıq terror aktı təşkil edib. Bu terror hücumları nəticəsində 2 minə yaxın vətəndaşımız həyatını itirib”.
M.Məmmədlinin sözlərinə görə, eynilə biz Ermənistan dövlətinin terrorçu mahiyyətini İkinci Qarabağ müharibəsində də gördük. Ekspert qeyd etdi ki, tamamilə cəbhə bölgəsindən uzaqda yerləşən Gəncə və digər yaşayış məskənlərimizə raket zərbələri endirdilər, xeyli sayda günahsız, dinc insanımız həyatını itirdi. M.Məmmdəli bildirdi ki, dünya dövlətləri, beynəlxalq birlik Azərbaycana qarşı davam edən və insanlarımızın həyatı üçün böyük təhlükə olan mina terroruna qarşı səsini qaldırmır, halbuki, onlar Ermənistanın cinayətlərinin ifşa olunmasında mühüm rol oynamalıdırlar. “Hesab edirəm ki, dünya birliyi, beynəlxalq ictimaiyyət və dünyanın aparıcı dövlətləri bu məsələyə adekvat reaksiya nümayiş etdirmirlər. Yəni bu gün Ukraynada baş verən qətliamı, insanlıq əleyhinə cinayətləri, zorakılığı, təcavüzü haqlı olaraq beynəlxalq ictimaiyyət qınayır, sanksiyalar tətbiq edir və sair. Ancaq nədənsə, iki il əvvəl Gəncəyə, Bərdəyə, Beyləqana edilən terror hücumlarına səssiz yanaşıldı, hər hansı bir ciddi reaksiya ortaya qoyulmadı. Təbii ki, bu da dünya siyasətinin, dünyanın ikili standartlarla idarə olunmasının dəyərlərə deyil, beynəlxalq hüquq normalarına deyil, maraqlara əsaslanaraq idarə olunmasının göstəricisidir. Hesab edirəm ki, biz daim bu məsələni gündəmə saxlamalıyıq. Müxtəlif forumlarda, zirvə toplantılarında səsləndirməliyik, diplomatiyamızın əsas hədəflərindən biri məhz bizə qarşı edilmiş bu müharibə cinayətlərini daim gündəmdə saxlamaq olmalıdır. Ermənistanın bu cinayətlərinin dünya dövlətləri tərəfindən tanınmasına, bu ölkənin cəzalandırılmasına nail olmalıyıq”- deyə M.Məmmədli qeyd etdi.
İradə SARIYEVA
