“KTMT öz müşahidəçilərini Ermənistana yollamağa hazırdır. Bunun üçün lazım olan kollektiv təhlükəsizlik şurasının qərarıdır. Şuranın çağırılması isə KTMT-yə sədrlik edən ölkənin, yəni Ermənistanın ixtiyarındadır”.
Bunu Rusiya xarici işlər naziri Sergey Lavrov erməni həmkarı Ararat Mirzoyanla görüşdə deyib.
A.Mirzoyan da öz növbəsində bildirib ki, İrəvan müşahidəçiləri gözləyir. Sadəcə belə bir görüş razılaşdırılmayıb: “Amma Avropa İttifaqı Ermənistan-Azərbaycan sərhədinə missiya göndərmək barədə artıq qərar verib”.
Bir tərəfdən Rusiya XİN rəsmisi Mariya Zaxarova Avropa İttifaqını mülki missiyaya görə ittiham edir. Qeyd edək ki, Zaxarova Aİ-nin mülki missiya göndərməsini prosesə müdaxilə kimi dəyərləndirib: “Bu, Moskvanın vasitəçilik səylərinə təzyiq göstərmək cəhdi kimi qiymətləndirilir. Qərb Qarabağda Rusiyaya təzyiq etmək istəyir. Biz ondan çıxış edirik ki, İrəvanla Bakının barışmasının, regionda davamlı sülhün və uzunmüddətli sabitliyin bərqərar olmasının yeganə açarı Rusiya, Azərbaycan, Ermənistan liderlərinin üçtərəfli bəyanatlarının tam şəkildə həyata keçirilməsidir”.
Bu biri tərəfdən də Lavrov Aİ-yə alternativ olaraq KTMT-nin özünün də müşahidə missiyasının göndərməsi ideyasını ortaya gətirib. Bu, bir növ Avropa İttifaqının monitorinq missiyası ilə bağlı atdığı addımın alternativ cavabıdı.
“Lavrovun məlum açıqlaması Aİ-yə qarşı alternativ ortaya qoymaqda qərarlı olmasından irəli gəlir”
Məsələyə münasibət bildirən politoloq Tural İsmayılovun sözlərinə görə, bütün bu oyunlar Ermənistanın müstəqil olmamasından irəli gəlir: “Hesab edirəm ki, Ermənistanın Avropa İttifaqı və Fransadan olan müşahidəçiləri öz ərazilərinə buraxmağı, bu ölkənin suveren və müstəqil olmadığını növbəti dəfə göstərir. Eyni zamanda, son vaxtlar Rusiya ilə Ermənistan arasında münasibətlər onsuz da kifayət qədər gərgindir. Avropa İttifaqının mülki missiya ilə bağlı qərarından sonra iki ölkə arasında gərginlik daha da artır. Nəzərə almaq lazımdır ki, Rusiya heç bir formada Avropa İttifaqından və Fransadan müşahidəçilərin Ermənistan sərhədinə gəlməsində maraqlı deyil. İki ay belə, Rusiya üçün böyük müddətdir. KTMT üzvü olan Ermənistan sərhədində Aİ monitorinq qrupu bir növ mədəni formada Rusiyanın alçaldılması deməkdir. Lavrovun məlum açıqlaması Aİ-yə qarşı alternativ ortaya qoumaqda qərarlı olmasından irəli gəlir. Bir növ Ermənistan hazırda futbol meydançasında olan top kimi xarakterizə oluna bilər. Kim istəsə Ermənistana bir təpik vurur və onun ərazisini özünün siyasi məqsədlərinin arealına çevirir. Aİ-dən olan müşahidəçilərin Ermənistana daxil olmasından sonra, yəqin ki, KTMT də analoji addım atacaq. İstənilən halda görünən odur ki, Ermənistan hansısa siyasi qərar vermək qabiliyyətinə malik deyil. Bu isə Aİ ilə Rusiya arasında növbəti siyasi rəqabətə rəvac verəcək”.
Politoloq onu da əlavə etdi ki, bütün bunlar bir daha Ermənistanın forpost olduğunu ortaya qoyur.
Vidadi ORDAHALLI
