“Qarabağ çətin vəziyyətdədir və istənilən varianta hazırdır. Ancaq Rusiya indiki durumda Qarabağı ilhaq edə bilməz. Biz belə bir məsuliyyəti üzərimizə götürə bilmərik. Ona görə ki, bu, Azərbaycan və Türkiyə ilə birbaşa qarşıdurma deməkdir. Axı biz Ermənistandan tələb etmirik ki, Ukrayna ilə münaqişədə bizim tərəfimizdə çıxış etsin. Erməni cəmiyyəti bizdən tələb edir ki, "sərhədi pozan" Azərbaycana qarşı dərhal hərbi əməliyyatlara başlayaq”.
Rusiya Dövlət Dumasının MDB ölkələri ilə iş komitəsinin sədr müavini, ermənipərəst Konstantin Zatulin bu sözləri erməni jurnalistin “Qarabağ Rusiyaya ilhaq edilə bilərmi” təxribatçı sualına cavab verərkən deyib.
Zatulin qeyd edib ki, Ermənistanda Rusiyanı Azərbaycana silahlı müqavimət göstərməməkdə ittiham edən ictimai rəy formalaşıb: “Mənə elə gəlir, Ermənistanda insanlar başa düşməlidirlər ki, burada müəyyən mənada istənilən oyunun oynanılması mümkündür. O cümlədən dramatik oyun. Amma siz ermənilər nəyi nəyə dəyişdiyinizi da anlamalısınız. İndi Ermənistanda anti-Rusiya əhval-ruhiyyəsi var. Çünki Rusiya Federasiyası Azərbaycan və Türkiyəyə qarşı müharibəyə başlamır, Qarabağ erməniləri isə Rusiya sülhməramlılarından başqa özlərinə qarşı müdafiə görmürlər və çox vaxt Ermənistanla da hesablaşmırlar. Bütün məsələlər bundan ibarətdir. Biz nə Azərbaycana, nə də Türkiyəyə qarşı müharibəyə başlamağa tələsmirik. Çünki bizim mövqeyimiz ondan ibarətdir ki, sülh müqaviləsi imzalanmalıdır”.
Beləliklə, Zatulin yenə ermənipərəstliyini bir başqa formada göstərməklə, onları Rusiyaya çəkmək istəyir.
“İndi Zatulin yenə öz ampluasına xas formada erməniləri şirnikləndirmək istəyir”
Məsələyə münasibət bildirən AMİP sədri Arzuxan Əlizadənin fikrincə, Zatulin Ermənistanda son illər antiRusiya ovqatının daha da gücləndiyini yaxşı bilir: “Özü də bu, təkcə İkinci Qarabağ müharibəsində Azərbaycanın qələbəsindən sonra yaranmayıb. Ondan əvvəl yaranıb. Niyə? Ona görə ki, ermənilər öz gələcək inkişaflarını Rusiyada yox, Qərblə inteqrasiyada görürlər. Bunun nəticəsi idi ki, 2018-ci ilin aprelində Paşinyan rəngli inqilab dalğasında hakimiyyətə gəldi. Ermnistanda antirus ovqatı olmasaydı Paşinyan hakimiyyətə gələ bilməzdi. Məhz bunun nəticəsi idi ki, Rusiya 2020-ci ilin payızında Azərbaycanın öz ərazilərini işğaldan azad etməsinə qarşı mane olmadı. Düzdür, Rusiya imkan vermədi ki, biz Xankəndini azad edək. Ancaq ərazilərin böyük hissəsinin azad olunmasına mane olmadılar. Rusiyada elə bilirdilər ki, bu, ermənilərin ağıllanmasına səbəb olacaq, amma tam əksinə oldu. Ermənistanda Rusiyaya nifrət daha da artdı. Nəticədə Paşinyan parlament seçkilərində növbəti qələbə qazandı. İndi Zatulin yenə öz ampluasına xas formada erməniləri şirnikləndirmək istəyir. Ancaq bu, nəyisə dəyişə bilməyəcək. Çünki Cənubi Qafqazda tamamilə yeni reallıqlar yaranıb”.
Vidadi ORDAHALLI
