“Nəqliyyat-tranzit sahəsində Çin-Qırğızıstan-Özbəkistan-Xəzər yeni dəmir yolunun tikintisinə və istismarına başlamaqla əmtəə dövriyyəsinin artması və yüklərin daşınmasının ucuzlaşması üçün imkanlar yaranacaq”. Bu barədə Prezident İlham Əliyev Bişkekdə Azərbaycan-Qırğızıstan sənədlərinin imzalanması mərasimindən sonra mətbuata bəyanatında bildirib.
Qardaş Qırğızıstan xalqını, eləcə də digər tərəfdaş ölkələri bu mühüm layihənin icrasına başlanması münasibətilə təbrik edən dövlət başçısı deyib ki, nəqliyyat yoluna sahib olmaqla, Qırğızıstan hökuməti üçün prioritet sahələrdə investisiya siyasətini birgə həyata keçirməklə, bu gün Bişkekdə yarım il bundan əvvəl Bakıda imzalanan sənədlərə malik olmaqla, bəzi səbəblər üzündən əvvəlki illərdə əldən verdiklərimizin yerini qısa vaxt kəsiyində müəyyən dərəcədə doldururuq. Gələcək əməkdaşlığımızın başlıca istiqamətlərindən biri məhz konkret nəticələrə hədəflənməyimizdir.
Görünən odur ki, sözügedən dəmir yolunun çəkilişi iqtisadi əlaqələrdə yeni mərhələ açacaq.
“Bu dəmir yolu sayəsində Qırğızıstanın da tranzit gəlirləri artacaq”
Məsələyə münasibət bildirən iqtisadçı-ekspert Fuad İbrahimovun fikrincə, bu, regionda ümumi iqtisadi inkişafa müsbət təsir edəcək: “Məlum olduğu kimi, Çinin “bir kəmər, bir yol” layihəsi var. Azərbaycan sözügedən layihədə Şərqlə Qərbi birləşdirən körpü rolunda çıxış edir. Yəni Asiya ilə Avropanı birləşdirir. Azərbaycan və Qırğızıstanın bu dəhlizlərin genişlənməsi, şaxələnməsi istiqamətində birgə fəaliyyəti, əldə olunan anlaşmalar ciddi perspektivlər vəd edir. Necə deyərlər, sözügedən layihənin tamamlanması baxımından böyük əhəmiyyət kəsb edir. Biz nəzərə almalıyıq ki, bu gün Çindən Avropaya türk dövlətləri üzərindən gediş-gəlişi fikirləşiriksə, bunun relis anlayışı da var. Relis o deməkdir ki, məhsullar birtərəfli getməyəcək. Əks istiqamətdə də məhsulların daşınması imkanı yaradılacaq. Azərbaycan Qərblə ticarət dövriyəsini artırırsa, bu zaman həm də Şərqə doğru tranzit əlaqələri yaranacaq. Çinin Orta Asiya ölkələri vasitəsilə Azərbaycan üzərindən Avropaya yükləri daşıması ölkəmiz üçün çox böyük əhəmiyyət kəsb edir. Həm tranzit gəlirlərin artması baxımından, həm də ölkəmizin strateji önəminin güclənməsi baxımından vacib əhəmiyyət kəsb edir. Azərbaycan üzərindən keçən yol daha qısa olduğu üçün bəzi məhsulların bu yolla daşınması vaxt baxımından sərfəlidir. Bu dəmir yolu sayəsində Qırğızıstanın da tranzit gəlirləri artacaq. İqtisadi imkanları o qədər də böyük olmayan Qırğızıstan üçün bu, yeni gəlir mənbələri deməkdir. Bütün bunlar həm də türkdilli ölkələr arasında iqtisadi inteqrasiyaya təkan verəcək. İqtisadi baxımdan bunun faydası öz yerində. Siyasi nöqteyi-nəzərdən də bunun çox mühüm əhəmiyyəti var. Sevindirici hal odur ki, Azərbaycan bütün bu proseslərin mərkəzində yerləşir. Azərbaycan həm bu infrastrukturları, həm də bunun icra mexanizmini yaradıb. O üzdən bunun səmərəli olacağı qənaətindəyəm”.
Vidadi ORDAHALLI
