Fransa Azərbaycanın ərazi bütövlüyünə qarşı təxribatlarını günü-gündən gücləndirir. Ən müxtəlif səviyyələrdə Qarabağda mövcud olan ermənilərin, daha dəqiq desək, separatçı kəsimin dəstəkçisi olduğunu bəyan edir.
Məsələ burasındadır ki, Fransanın separatçılara bu canfəşanlığı yalnız Azərbaycana qarşı gəlmək deyil, bu həm də əraziyə müvəqqəti olaraq nəzarət edən Rusiyaya, onun sülhyaratma qüvvələrinə qarşıdır. Xüsusən də son təxribatlarını buna kökləyib. Fransanın növbəti təxribatı Xankəndidə humanitar ofis yaradılmasına hazırlaşmasıdır.
News.am saytının yaydığı məlumata görə, Fransa Xankəndidə humanitar ofis yaradılmasına hazırlaşır.
Oktyabrın 10-da Fransa Senatı Azərbaycan Respublikasının ermənilərin məskunlaşdığı ərazisində humanitar ofisin yaradılması məsələsini müzakirə etməyə çağırıb. News.am saytının yazdığına görə, Senata Fransa hökumətini Qarabağda humanitar ofisin yaradılmasını müzakirə etməyə çağıran qətnamə layihəsi təqdim edilib.
Qətnamə Azərbaycana qarşı sanksiyaların tətbiqinə və onun qüvvələrinin Ermənistan ərazisindən dərhal çıxarılmasına, 9 noyabr 2020-ci il tarixli atəşkəs razılaşmasının yerinə yetirilməsinə və iki ölkə arasında davamlı sülhün bərqərar edilməsinə yönəlmiş hər hansı təşəbbüslərin təşviqinə çağırır.
Qətnamə müəllifləri hökuməti Dağlıq Qarabağda humanitar ofisin yaradılması məsələsini müzakirə etməyə, xüsusilə Ermənistanın ərazi bütövlüyünü təmin etmək üçün müdafiə qabiliyyətinin gücləndirilməsini nəzərə alaraq Fransanın Ermənistana dəstəyini hər vasitə ilə nümayiş etdirməyə çağırıblar.
Bundan əlavə, Fransa hökuməti beynəlxalq səviyyədə tanınmış sərhədlər daxilində erməni əhalisinin və Ermənistanın təhlükəsizliyinə zəmanət vermək üçün dərhal istənilən təşəbbüslə çıxış etməyə çağırılıb və bu məqsədlə beynəlxalq ictimaiyyətin himayəsi altında aralıq qüvvələrin yerləşdirilməsi xahiş edilib"- erməni nəşrinin yaydığı xəbərdə belə deyilir.
Qətnamədə Qarabağdakı separatçı-terrorçu rejimin "respublika" kimi tanınmasının və davamlı sülhün bərqərar olması üçün bu tanınmanın danışıqlar alətinə çevrilməsinin zəruriliyi təsdiq edilib...
Mətbuat xəbər verir ki, 44 günlük savaşdakı hərbi qələbəmizdən sonra - 2020-ci il noyabrın 18-də Fransa Senatının Rəyasət Heyətində erməni diasporunun və lobbisinin təsiri altında olan bir qrup senator tərəfindən qondarma “Dağlıq Qarabağ Respublikasının tanınmasının zəruriliyinə dair” 145 nömrəli qətnamə layihəsi təqdim olunub, noyabrın 25-də müzakirə edilərək qəbul olunub.
Ötən ilin sentyabrında isə Xankəndidə Fransadan gəlmiş deputatların iştirakı ilə Pol Elüar adına frankofoniya mərkəzi (“Paul Eluard Francophone Center”) açılıb, Fransa bayrağı qaldırılıb. Bu barədə də fikirlər də mediada yer alıb.
"Fransanın "humanitar ofis" oyunu Rusiyanın da mövcud fəaliyyətinə qarşı ola bilər"
Siyasi ekspert Rövşən Rəsulov hesab edir ki, əslində Fransa "humanitar ofis" açmaq adı altında pozuculuq işləri ilə məşğul olmağı hədəfləyib, bu səbəbdən də Xankəndidə belə bir ziyanlı iş görmək istəyir.
"Ümumiyyətlə, Fransa-Ermənistan məsələsindən danışarkən biz dəfələrlə vurğulamışıq ki, Fransada hakimiyyətdə kimlərin olmasına baxmayaraq, bu ölkədə fəaliyyət göstərən erməni diasporu bütün iqtidarlarla sıx əlaqədə olub. Torpaqlarımızın işğal dövründə də bu hal mövcud olub, torpaqlarımız azad edildikdən sonra da aparılan danışıqlarda, bir sıra məsələlərdə Fransa diplomatiyasının davamlı olaraq ermənilərə havadarlıq etməsinin, təəssüblərini çəkməsinin şahidi olmuşuq, indi də oluruq. Təbii ki, bütün bunlardan sonra Fransa Senatında Qarabağda, Azərbaycanın suveren ərazisində hər hansısa "humanitar" ofisin yaradılması təşəbbüsü ilə çıxış edilməsi, bu məsələ Senat səviyyəsində müzakirəyə çıxarılması bilavasitə Azərbaycanın daxili işinə qarışmaq, müdaxilə etmək mənasını verir. Söz yox ki, Azərbaycanın müvafiq strukturları, diplomatik qurumları, xüsusən də Xarici İşlər Nazirliyi Fransa Senatının bu həyasız və özbaşına davranışına qəti mövqeyini bildirəcək və bu "ofisin" açılmasına imkan verməyəcək. O da gizlin deyil ki, ermənilərin yaşadıqları əraziyə hazırda müvəqqəti olaraq Rusiya sülhməramlıları nəzarət edir. Fransanın "humanitar ofis" oyunu Rusiyanın da mövcud fəaliyyətinə qarşı ola bilər. Bu da istisna deyil. Əslində, Fransa öz addımları ilə həm də Rusiyanın missiyasına qarşı çıxır".
R.Rəsulovun sözlərinə görə, ümumiyyətlə, Praqa danışıqlarından sonra Ermənistanın baş naziri bilavasitə elan etdi ki, artıq Ermənistan Qarabağ mövzusunu danışıqlar predmetindən çıxarıb, Qarabağ Azərbaycanın suveren ərazisi kimi Ermənistan, rəsmi İrəvan tərəfindən də tanınır. "Bütün bunlardan sonra Fransa hakim dairələrinin, eləcə də qanunverici orqanlarının müxtəlif cəhdlərlə bu kimi məsələlərə müdaxilə etməsi əslində Azərbaycanın nəbzini yoxlamaq anlamı da daşıya bilər. Lakin Azərbaycanın nəbzi normal və yerində vurur, lazım olanda da öz cavabını verir. Ümumiyyətlə, bir ekspert olaraq düşünürəm ki, Fransanın bu kimi davranışının qarşısının alınması üçün ona 44 günlük Vətən müharibəsi dövründə necə cavab verilirdisə, indi də o cür diplomatik cavablar verilməlidir. Fransa səfirinə nota təqdim edib bu təxribatların qarşısının alınması üçün qətiyyətli addımlar atmaq lazımdır.
Fransızların bu kimi davranışlarının gələcəkdə də gözləmək olar. Bütövlükdə, bu addımların aradan qaldırılması istiqamətində artıq daha qətiyyətli, daha sərt addımların atılması zərurəti yaranıb.
Qarabağda "humanitar" adı altında fəaliyyəti bəlli olmayan bir ofisin açılmasına qətiyyən yol vermək olmaz, bu rədd edilməlidir. Bunun qarşısının alınması mütləq bir vasitəyə çevrilməlidir"- deyə E.Rəsulov vurğuladı.
İradə SARIYEVA
