Son vaxtlar Ermənistan hakimiyyətində, bir sıra parlament deputatları arasında Qarabağla bağlı bədbin fikirlər artır. Özü də hər keçən gün daha qabarıq formada bu tendensiya özünü göstərir.
Məsələ ondadır ki, erməni siyasilərin timsalında Ermənistan Dağlıq Qarabağın təhlükəsizliyini təmin etmək gücündə deyil kimi bəyanatların sayı artır. Bununla bağlı müxtəlif arqumentlər səslənir. Qeyd edilir ki, nə hərbi, nə də iqtisadi baxımdan Ermənistanın belə bir imkanı var.
Maraqlıdır, Ermənistanda belə bəyanatların arxasında nə dayanır? Bununla onlar nə demək istəyirlər? Bununla Ermənistanın gücsüz olduğunu etiraf edirlər, yoxsa Qarabağın təhlükəsizliyini təmin etmək kimi bir yükü çiyinlərindən yerə qoymaq istəyirlər? Ümumiyyətlə, belə fikirlərin mahiyyəti nə deməkdir?
“Bu, sadəcə Ermənistanın son çırpınışlarıdır və bu müstəvidə biz həmin tarixi anları müşahidə etməkdəyik”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev Ermənistanda belə rəylərin formalaşmasını bir sıra faktorlarla əsaslandırdı. Onun fikrincə, bu, Ermənistanın son çırpıntısıdır: “Azərbaycan özünün siyasi-diplomatik və qüdrətli hərbi potensialı ilə Ermənistanı sülhə məcbur edir. Belə bir fonda onların parlamentndə və hakim dairələrində bədbin fikirlərin artmasından təəccüb etməyə dəyməz. Çünki mövcud reallıqlar onları belə düşünməyə məcbur edir. Eyni zamanda, Ermənistanda yaxşı anlayırlar ki, artıq erməni utopiyasının “artsax” təsəvvürləri sıfır həddindədir. Bunu onların baş nazirləri Nikol Paşinyan da Praqa görüşündən sonra etiraf etməyə məcbur oldu. Məlum oldu ki, dünya sözügedən məsələdə onları dəstəkləmir. Ancaq biz onu da nəzərə almalıyıq ki, hər şeyə rəğmən, həm hakimiyyət dairələrində, həm də müxalifətdə mövcud reallıqla barışmaq istəməyən müəyyən tərəflər var. Onlar əllərinə düşən hər imkanda bəyanatlar səsləndirirlər, amma özləri də yaxşı dərk edirlər ki, həmin bəyanatların heç bir çəkisi, rəsmiyyəti və s. yoxdur”.
B.Quliyev hesab edir ki, Qarabağ Ermənistan üçün əlavə yükdür: “Belə tipli fikirlərin mahiyyəti həm də digər məqamı da ehtiva edir - artıq Qarabağ Ermənistan üçün əlavə yükdür. Bildiyimiz kimi, Prezident İlham Əliyev hazırda Zəngəzur dəhlizinin açılması, kommunikasiyaların işə salınması və həmin istiqamətdə olan digər aktual tələbləri önə sürür. Bunu rəsmi Bakı ilə yanaşı, vasitəçilər, həmçinin beynəlxalq dairələr də dilə gətirirlər. İndi Ermənistan hakimiyyətini narahat edən, təlaşlandıran məsələ də məhz budur. Çünki Qarabağın Azərbaycanın tərkib hissəsi olması artıq fakt olaraq isbatlanıb. Ümumiyyətlə, Ermənistan hakimiyyəti son danışıqlar prosesindən sonra sözün əsl mənasında başını itirib. Hansı mövzuda necə qərarlar verəcəyini də doğru-dürüst bilmir. Lakin İrəvanın qarşısında dayanan bütün tələblər qeyd-şərtsiz yerinə yetirilməlidir və qəbul edilən bəyanatlardakı müddəalarda, bəndlərdə də hər şey açıq-aydın vurğulanıb. Bu baxımdan, istər Qarabağın təhlükəsizliyi, istərsə də digər məsələlərdə səslənən bəyanatları, fikirləri ciddiyə almaq doğru olmazdı. Bu, sadəcə, Ermənistanın son çırpınışlarıdır və bu müstəvidə biz həmin tarixi anları müşahidə etməkdəyik”.
Bir sözlə, politoloq hesab edir ki, proseslər Azərbaycanın xeyrinə inkişaf edir.
Vidadi ORDAHALLI
