Belə görünür ki, Ukraynadaki uğursuzluğun bütün günahı müdafiə naziri Sergey Şoyqunun üzərinə qoyulacaq. Artıq neçə vaxtdır Şoyqunun “günah keçisi” elan edilməsi ilə bağlı hazırlıq gedir və bunun elementləri müxtəlif formada özünü göstərir. Belə ki, müharibədə məğlubiyyətin məsuliyyətini ona yükləməyə çalışırlar.
Hətta “Rossiya 1” telekanalının canlı efiri zamanı baş verən uğursuzluqlara görə Şoyqu ittiham edilir. İndiyədək belə hal olmayıb. Bundan başqa, Rusiya mediasında Şoyqunun hərbçi olmadığı tez-tez müzakirə olunur. Bütün bunlar onu göstərir ki, məsələ ciddidir. Nəzərə alsaq ki, Rusiya telekanalları Kremlin tezisləri əsasında sırf təbliğat xarakterli materiallar yayır, o zaman Şoyqu ilə bağlı tənqidləri təsadüf hesab etmək olarmı?
Digər tərəfdən, Ukrayna müharibəsinə qədər Şoyqunun adı həm də Putinin siyasi hakimiyyətinin varisi kimi hallanırdı. Bəlli müddətdən sonra Putinin hakimiyyəti ona ötürüləcəyi ehtimal edilirdi. Hətta ötən ilin ortalarında keçirilən Rusiyanın hakim “Vahid Rusiya” Partiyasının XX Qurultayında Dövlət Dumasına seçkilərdə federal siyahıya liderlərin beşliyi və namizədlərin siyahısı təsdiqləndi. Vladimir Putinin təklifi ilə federal siyahıya daxil edilən 5 nəfərdən biri Şoyqu idi. Şoyqunun müdafiə naziri olmağına rəğmən, seçkinin aparılmasında ona etimad göstərilirdi. İndi Şoyqunun dövlət televiziyasında tənqid edilməsi təkcə müharibədiki uğursuzluqlarla bağlı deyil. Ehtimal etmək olar ki, Putin bununla siyasi rəqiblərinin birini də sıradan çıxarır.
Maraqlıdır, bəs ekspertlər bütün bunları necə dəyərləndirir?
“Putinin onu vəzifəsindən kənarlaşdırması an məsələsidir”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, Şoyqunun vurulmasında başlıca səbəb Ukraynada yaşanan uğursuzluqdur: “Əvvəla, Rusiya avtoritar qaydada idarə olunan ölkədir. Orada əsas söz sahibi Putindir. Müharibənin başlanmasına qərar verən, onu aparan əsas adam Putindir. Onun qərarlarını hamı icra edir. Şoyqu müharibə başlayana qədər böyük nüfuza malik olan bir nazir idi və Putinə ən yaxın adamlardan biri hesab olunurdu. Digər tərəfdən, Şoyqu kökəncə rus deyil, Tuva türküdür. Bu səbəbdən ona qarşı bir qısqanclıq var. Müharibə başlayandan sonra bir sıra uğursuzluqlar oldu. Burda da Federal Təhlükəsizlik Xidməti ilə Müdafiə Nazirliyi arasında ziddiyyətlər ortaya çıxdı. Rusiya hakimiyyətində müəyyən bir kəsim var idi ki, bütün günahı Putindən kənarlaşdırmaq üçün məsuliyyəti Şoyqunun üzərinə atmağa çalışır. Bu müddət ərzində bir sıra generallar ordudan kənarlaşdırılıb. Ona görə də Rusiyanın dövlət kanallarında Şoyqu barədə xoşagəlməz mövqe səslənirsə, bu təsadüfi deyil. Planlı işin bir halqasıdır. Fikrimcə, bundan sonra Putinin Şoyqunu vəzifəsindən kənarlaşdırması an məsələsidir. Sadəcə, Şoyqu Putinə yaxın olan və onunla münasibəti olan adam olduğu üçün bugünə qədər vəzifəsini qoruya bilib. Ancaq məlum olur ki, artıq bu limit də tükənib”.
Bir sözlə, partiya sədri hesab edir ki, Putin istənilən vaxt Şoyqunu vəzifəsindən kənarlaşdıra bilər.
Vidadi ORDAHALLI
