Erməni mediası yazır ki, Praqa görüşünün nəticələri erməni hakimiyyəti üçün gözlənilməz olub. Məsələ burasındadır ki, Nikol Paşinyan Praqa səfərindən əvvəl Qərbin və xüsusən də ABŞ-ın vasitəçiliyi ilə keçirilən görüşlərdə dəhliz sözünün danışıqların gündəmindən çıxarıldığını bildirib.
Hətta bunu Təhlükəsizlik Şurasının sədri Armen Qriqoryanın böyük nailiyyəti kimi qələmə verib.
Sitat: “Praqadan sonra Paşinyan dedi ki, Əliyev yolların açılmasının əleyhinədir, çünki o, yolun dəhliz rejimində açılmasını istəyir. Bu o deməkdir ki, ya sülh müqaviləsi heçə çevriləcək, ya da Azərbaycan dəhlizi güclə – müharibə yolu ilə əldə etməyə çalışacaq”.
Göründüyü kimi Ermənistan tərəfi, xüsusilə də Paşinyan Praqa görüşünün yekun bəyanatında dəhliz ifadəsinin işlədilməməsini az qala özlərinin böyük diplomatik nailiyyəti olaraq qəbul edir.
Birincisi, Paşinyanın özünün də imzaladığı 10 noyabr yekun bəyanatında Zəngəzur dəhlizinin açılması ilə bağlı xüsusi bənd var. Hər dəfə bunu xüsusi vurğulamağa heç bir ehtiyac duyulmur. İkincisi, Praqa sənədində kommunikasiyaların açılmasından söhbət gedirsə, bu elə Zəngəzur dəhlizi deməkdir. Bunu bilə-bilə erməni tərəfi niyə siyasi manipulyasiya ilə məşğul olur?
Politoloq Əhəd Məmmədli “Bakı-Xəbər”ə açıqlamasında bildirdi ki, 10 noyabr bəyanatından sonra Paşinyan belə söz oyunu ilə məşğul olur: “Deyir ki, 10 noyabr sənədində söhbət dəhlizdən yox, yoldan gedir. Açıq mətnlə bildirir ki, Ermənistan öz ərazisində heç kimə dəhliz yaratmaq fikrində deyil, lakin bütün qonşuları, o cümlədən Azərbaycan üçün kommunikasiyalar açmağa hazırdır. Hətta 10 noyabr bəyanatından sonra da, 2021-ci il yanvarın 11-də Rusiya, Ermənistan və Azərbaycan liderlərinin Moskvada keçirilən görüşü zamanı regional kommunikasiyaların açılması barədə razılıq əldə olunub. Bu məqsədlə tərəflər üç ölkənin baş nazirinin müavinləri səviyyəsində regionda nəqliyyat və iqtisadi əlaqələrin qurulmasına diqqət yetirəcək işçi qrupun yaradılması barədə qərar qəbul ediblər. İşçi qrupun son iclası bu il sentyabrın əvvəlində Moskvada baş tutub. Paşinyan gözəl bilir ki, Azərbaycan onlardan haqlı olaraq yol deyil, dəhliz tələb edir. Necə ola bilir ki, müharibəni udan və güclü tərəf kimi biz Qarabağda yaşayan bir ovuc erməniyə Ermənistanla əlaqə üçün dəhliz veririk, onlar isə bizə Naxçıvanla əlaqə saxlamaq üçün yol verir?
Praqa sənədində kommunikasiyaların açılmasından söhbət gedirsə, bu elə Zəngəzur dəhlizi anlamına gəlir. Çünki Azərbaycanın nəyi tələb etdiyi hamıya gözəl aydındır. Bundan əvvəlki sənədlərdə ehtiva olunan bəndi hər dəfə təkrarlamağa ehtiyac yoxdur. Ermənistan bilməlidir ki, öz öhdəliyindən yayına bilməyəcək. O bu öhdəliyi öz xoşuna üzərinə götürməyib. Müharibədə daha biabırçı məğlubiyyəti önləmək üçün buna gedib. Unutmasın ki, Azərbaycan ordusu hər an həmin nailiyyətləri təkrarlamağa hazırdır. Ermənistan elə vəziyyətdə deyil ki, bizə və ya vasitəçilərə nəyin müzakirə olunub-olunmadığını diqtə etsin. Bütün bunları Paşinyanın növbəti uydurması saymaq olar”.
Məhəmmədəli QƏRİBLİ
