“Mosfilm”in direktoru, erməni (hərçənd, o özünü erməni saymır-İ.S) Karen Şahnazarov “Rossiya 1” kanalında yayımlanan ”Vladimir Solovyovla axşam" proqramının efirində Rusiyanın gələcəyi ilə bağlı dəhşətli proqnoz verib. “Rusiya Ukraynadakı savaşda məğlub olsa, daxildə heç kəs xilas ola bilməyəcək. Bu zərbə hamıya dəyəcək”.
K.Şahnazarov deyib ki, məğlubiyyət baş verərsə, heç kəs xilas ola bilməyəcək: “Hazırda Rusiya daxilində belə Kremlin Ukraynada məğlub olmasını istəyənlər var. Biz bunu bilirik. Lakin bir acı həqiqəti qəbul etmək lazımdır. Moskva məğlub olsa, hamımız məhv olacağıq. Elə bir xaos başlayacaq ki, heç kim xilas ola bilməyəcək. Heç soruşan da olmayacaq ki, sən hansı tərəfdə idin, sağçı idin, yoxsa solçu idin... Rusiyanın içində olan qatı qərbyönümlü LGBT nümayəndələri belə məhv olacaq. Rusiya ətçəkən maşını xatırladacaq”.
“Bilir ki, Rusiyaya nə isə olarsa ermənilərə arxa-dayaq duran olmayacaq”
K.Şahnazarovun açıqlamasına şərh verən AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO başqanının müavini, siyasi şəhçi Faiq Ələkbərli “Bakı-Xəbər”ə bildirdi ki, erməni kinorejissorun təqdim etdiyi ssenari ermənilərin, Ermənistanın özü üçün də dəhşətli ola bilər: “Şübhəsiz, Karen Şahnazarovun dediyi kimi, Rusiya Ukraynadakı müharibədə məğlub olacağı təqdirdə, bu onun özü və rəsmi Kreml üçün dəhşətli ola bilər. Çünki Rusiya Ukraynada məğlub olarsa, Şahnazarov nəinki hakimiyyətin, hətta bütün Rusiyanın darmadağın olacağını deyir. Şahnazarovun bu fikri heç də onun Rusiya üçün narahat olmasından irəli gəlmir, o, bölgədə ermənilərin sahibsiz qalmasından qorxur. Qorxur ki, Rusiya dağılar, yaxud parçalanar, ermənilər isə ortada “ağasız-sahibsiz” qalar. Onun əndişəsi bundandır. Şahnazarov daha çox ermənilərin gələcəyindən narahatdır, nəinki Rusiyanın. Bəli, Rusiyanın daxilində də müharibə ilə bağlı ciddi problemlər var. Ukraynada apardığı müharibədə get-gedə məğlub olan Rusiya hökuməti bir sıra islahatlar həyata keçirmək məcburiyyətindədir. Ümumiyyətlə, artıq Rusiya Federasiyası özünü fikirləşməlidir, postsovet ölkələrini təhdid etməkdən əl çəkməlidir, öz daxilindəki məsələləri həll etməlidir. Bu da onu göstərir ki, Rusiya daxilindəki yarımmüstəqil dövlətlər, Tatarıstan, Başqırdıstan, Kalmıkiya, Yakutiya və başqa respublikalar, xüsusən də Tatarıstanın müstəqilliyin bir addımlığında olması hər kəsə məlumdur. Bunlar olacaq.
Amma mənə elə gəlir, Şahnazarovun Rusiya daxilindəki Qərbyönümlüləri və üzdəniraq kəsimi-LGBT kimi məsələləri ortaya atması onu göstərir ki, o, onlarla Ermənistanın, ermənilərin taleyini eyniləşdirməyə çalışır. Bilir ki, Rusiyaya nə isə olarsa ermənilərə arxa-dayaq duran olmayacaq”.
F.Ələkbərlinin sözlərinə görə, Şahnazarov yaxşı bilir ki, daim Rusiyanın maşası olan Ermənistan və Rusiya daxilindəki ermənilər özlərinə sığınacaq tapa bilməyəcəklər, Qərb olsa belə, onlar ortada qalacaqlar. F.Ələkbərli qeyd etdi ki, iki əsrdir, Rusiya ermənilərə “atalıq” edir və Rusiya məğlub olarsa, bunun zərbəsi Ermənistana və ermənilərə də dəyə bilər. “Paşinyan hökuməti nə qədər Qərbə meyl edib ona sığınmaq istəsə də, ermənilərin əksəriyyəti Rusiyanın ətəyindən yapışır. Rusiya da Paşinyan hökumətinə hər cür təhdidlər edir. Təhlükə ancaq Rusiya hökumətinə və eyni zamanda onun maşaları olan Ermənistana və daxilində yaşayan ermənilərə ola bilər. Şübhəsiz ki, qazanan tərəf isə milli azadlıq hərəkatında daim fəal olan və bu gün də müstəqilliyini qorumaq üçün mübarizə aparan dövlətlər olacaq. Ermənistanı, Belarusu və bir neçə ölkəni isə Rusiyanın Ukrayna müharibəsində çöküşündən sonra ciddi problemlər gözləyir. Ümumiyyətlə, Rusiyanın daxilində ciddi narahatlıq var. Şahnazarov bunu demək istəyir, amma məsələni ümumiləşdirir, tamamilə başqa yerə çəkmək istəyir. Şahnazarovun bu açıqlaması Roma papasından daha çox katolik olmaq məsələsinə bənzəyir. Şahnazarov özünü elə göstərir ki, guya ruslardan çox Rusiyaçıdır. Bu da təbiidir, özlərini müdafiə etmək istəyir. Amma xeyri yoxdur. Tarix elə bir mərhələyə gəlib çatıb ki, Rusiya və onu müdafiə edənlər, yaxud onun müttəfiqləri üçün gələcəkdə yaxşı heç nə görsənmir. Ancaq düzgün yol tutan dövlətlər öz milli müstəqilliyini daha da gücləndirəcək”-deyə F.Ələkbərli qeyd etdi.
İradə SARIYEVA
