Məlum olduğu kimi, ötən həftə Çexiyanın paytaxtı Praqada keçirilən Avropa Siyasi Birliyinin Zirvə Toplantısında Prezident İlham Əliyev də iştirak etdi. Bu onu göstərir ki, Azərbaycanın rolu artır. Yəni təkcə Qərbin yox, həm də Şərqin hər iki istiqamətdə Azərbaycanın roluna böyük ehtiyacı var.
Xüsusilə də Avropanın təkcə iqtisadi, nəqliyyat, ticarət kommunikasiyalarında yox, eyni zamanda siyasi və təhlükəsizlik dialoqunun həyata keçirilməsində də Azərbaycana çox böyük ehtiyacı var. Azərbaycanın Avropa Siyasi Birliyinin sammitinə dəvət olunması Avropanın təkcə iqtisadi, kommunikativ nəqliyyat, enerji ehtiyaclarının yox, eyni zamanda onun siyasi təhlükəsizlik məsələlərinin həllində, həmçinin siyasi dialoqun həllində Azərbaycanın roluna çox böyük önəm verilməsilə bağlıdır. Prezident İlham Əliyev Azərbaycan televiziyalarına müsahibəsində dedi ki, son aylar ərzində Avropa İttifaqı ilə Azərbaycan arasında həm təmasların sayı kəskin artıb, eyni zamanda, mahiyyət də yeni müstəviyə çıxıb və qarşılıqlı etimad artıb.
Bütün hallarda, Avropa Siyasi Birliyinin ilk sammitinə Azərbaycanın da belə hörmətlə dəvət olunması nə deməkdir? Avropa Birliyi ilə Azərbaycanın münasibətlərində yeni mərhələdə nələrə önəm verilir? Azərbaycanın rolunun artması nə ilə bağlıdır? Prezident niyə Avropa Birliyi ilə təmasların artmasını, əməkdaşlığın mahiyyətinin genişlənməsini qeyd etdi?
“Məhz bunun nəticəsidir ki, keçirilən mötəbər tədbirdə ölkəmizin roluna xüsusi önəm verildi”
Sözügedən məsələyə aydınlıq gətirən Dövlət İdarəçilik Akademiyasının müəllimi, sosioloq Hüseyn İbrahimovun fikrincə, bir sıra faktorlar Azərbaycanın Avropada önəmini artırır: “Bu, təkcə enerji faktoru ilə bağlı olan məsələ deyil. Düzdür, Avropanın şaxələndirilmiş enerji siyasətində Azərbaycan müəyyən rol oynayır. Ancaq təkcə bu, mütləq rola malik deyil. Azərbaycanın yerləşdiyi coğrafi mövqe, aparılan siyasət ölkəmizin önəmini artırır. Prezident İlham Əliyevin apardığı diplomatik siyasətin uğurlu tərəflərindən biri də budur ki, o, Avropa İttifaqı ilə kompleks şəkildə əlaqələr qurur. Həmçinin, Avropa İttifaqı üzvlərinin hər biri ilə diplomatik əlaqələri xeyli genişləndirib. Son 5 ilin təcrübəsinə nəzər salsaq görərik ki, yalnız Aİ ilə birbaşa, çoxtərəfli əlaqələrdən, müxtəlif konvensiyaların ratifikasiyasından başqa, eyni zamanda hər bir Aİ ölkəsi ilə ayrıca diplomatik münasibətlər qurulub. Azərbaycan Aİ-nin təkcə öndə olan aparıcı ölkələri ilə deyil, Şərqi Avropa ölkələri ilə də çox yaxın təmasdadır. Cənab prezidentin Bolqarıstan və digər səfərləri də buna əyani sübutdur. Azərbaycanın mədəniyyətlərin dialoqu, insanların sosial haqlarının qorunması sahəsində gördüyü işlər də Avropada maraqla qarşılanır. Müasir qloballaşma ideyasının dünyada reallaşması çox aktual paradiqmadır. Avropa Siyasi Birliyi də bu paradiqmanın siyasi-iqtisadi, sosial tərəfləri ilə bağlı çoxşaxəli işlər aparır. Azərbaycan o ölkələrdəndir ki, müxtəlif sahələrdə qloballaşma ideyalarını bir araya gətirə bilib. Həm mədəniyyətlərin dialoqu, həm də enerji daşıyıcılarının şaxələndirilməsi sahəsində. Görülən kompleks işlər, aparılan vahid siyasət Azərbaycanın Avropada önəmini artırır. Məhz bunun nəticəsidir ki, keçirilən mötəbər tədbirdə ölkəmizin roluna xüsusi önəm verildi”.
Sosioloq onu da əlavə etdi ki, bütün bu uğurların əldə olunmasında Prezident İlham Əliyevin müstəsna xidmətləri var.
Vidadi ORDAHALLI
